‘Rehoboth is waar my hart is’

Clarice Gille-Theys is geen onbekende in die skrywerswêreld van Namibië nie en met ­Rehoboth – Waar my Hart is maak sy haar debuut.
In haar loopbaan in die media en korporatiewe wêreld bly skryf haar “eerste liefde”. Sy maak gereeld van sosiale media en plaaslike koerante gebruik om sketse en stories te publiseer.
Rehoboth – Waar my Hart is is ’n bundel stories oor haar kinderjare en waarin sy die leser uitnooi om saam met haar op dié paaie te stap.
Die eerste hoofstuk in die boek is ’n een-reël-brief aan haar oom, Dr Franz Stellmacher, wie sy heimlik bewonder het. Sy sluit die boek af met “Ek skryf ’n Boek vir jou” en hoop dat hy dit gelees gaan kry aangesien hy nooit die brief ontvang het nie.
Sedert die skryf van die brief het 50 jaar verloop en is die bundel in ’n sin ’n outobiografie waarin sy hoop om die leser met ’n glimlag, ’n traan en ook ’n bietjie stof tot nadenke te laat.
Die amptelike bekendstelling van Rehoboth – Waar my Hart is sal op 5 Desember op Rehoboth plaasvind. Windhoekers kan die boek vanaf 1 Desember by Book Den koop. Mense kan ook gebruik maak van haar spesiale “Early Bird”-aanbod van N$180. Vir meer inligting stuur ’n e-pos na [email protected].