Rekordleë Kavango-, Kunenerivier
Twee noordelike riviere bevat tans die minste water in vyf jaar, terwyl die Zambezi plek-plek oorstroom.
Elvira Hattingh – Terwyl waarskuwings oor vloede deurlopend oor die Zambezi- en laer Oranjerivier uitgereik word, meen ‘n kenner dit is kommerwekkend dat die vlakke van beide die Kavango- en Kunenerivier die laagste in vyf jaar is.
Me. Pauline Mufeti, hoof van hidrologie by die ministerie van landbou, water en bosbou se hidrologiese diens sê in beide die twee riviere se opvangsgebiede, wat in Angola is, het dit nie baie gereën nie.
Sy sê ook dat enigiets nog kan gebeur omdat die reënseisoen maar nou eers sy piek bereik en Maart en April steeds voorlê.
“Veral die Kunenerivier het verlede jaar só sterk geloop dat die Caluequedam se sluise toe talle kere oopgetrek moes word,” sê sy.
Mufeti sê terselfdertyd het dit die afgelope tyd báie in die noordooste gereën, met gelokaliseerde vloede wat in die Kavango-Oosstreek ervaar is. “Al die water neem tyd voor dit in die rivier sal afkom,” sê sy.
Mufeti voeg by dat bonormale reën steeds vir die res van die reënseisoen verwag word.
VERSLAG
Volgens die Namibiese Hidrologiese Diens se vloedverslag van Maandag, het die Kunenerivier by Ruacana verlede jaar ‘n nuwe vyfjaar rekord-sterkte bereik toe daar teen die einde van Februarie meer as 2 000 m³ water per sekonde verbygevloei het.
Die naaste wat dié rivier ooit aan die rekord gekom het, was in 2018, toe dit in April en Mei digby 1 700 m³ gedraai het.
Die Kunenerivier het egter vanjaar op 22 Februarie teen net sowat 28,6 m³ per sekonde verby Ruacana gevloei en nog nie een maal sedert die aanvang van die reënseisoen die 250 m³-merk bereik nie.
Dit beteken ook die Ruacana hidrokragstasie verskaf tans nou slegs 140 MW elektrisiteit gedurende piektye, waar dit normaalweg tussen 35% en 40% van die land se elektrisiteit verskaf, deur 347 MW te voorsien.
Die 2018-’19-reënseisoen het ook baie min water aan die Kunenerivier besorg.
Intussen het die Kavangorivier Maandag 1,51 meter diep by Nkurenkuru gevloei, 3,97 m diep by Rundu en 3,09 m diep by Divundu. Volgens die vloedbulletin is dit beslis die laagste vir Maart in vyf jaar.
In Maart verlede jaar het dié rivier tussen 7 m en 8 m diep by Rundu gevloei. Tussen 2015 en 2020, was die rivier se laagste vlak nog bó 5 m in Maart.
Hierteenoor loop die Zambezirivier by Katima Mulilo tans 6,07 m diep – die sterkste in vyf jaar, met die laer Oranjerivier wat 2,36 m diep by Blouputs loop.
Waarskuwings dat gemeenskappe in die oostelike Zambezi-vloedvlaktes asook teen die laer Oranjerivier bedag op vloede moet wees, is opnuut uitgereik.
– [email protected]
Me. Pauline Mufeti, hoof van hidrologie by die ministerie van landbou, water en bosbou se hidrologiese diens sê in beide die twee riviere se opvangsgebiede, wat in Angola is, het dit nie baie gereën nie.
Sy sê ook dat enigiets nog kan gebeur omdat die reënseisoen maar nou eers sy piek bereik en Maart en April steeds voorlê.
“Veral die Kunenerivier het verlede jaar só sterk geloop dat die Caluequedam se sluise toe talle kere oopgetrek moes word,” sê sy.
Mufeti sê terselfdertyd het dit die afgelope tyd báie in die noordooste gereën, met gelokaliseerde vloede wat in die Kavango-Oosstreek ervaar is. “Al die water neem tyd voor dit in die rivier sal afkom,” sê sy.
Mufeti voeg by dat bonormale reën steeds vir die res van die reënseisoen verwag word.
VERSLAG
Volgens die Namibiese Hidrologiese Diens se vloedverslag van Maandag, het die Kunenerivier by Ruacana verlede jaar ‘n nuwe vyfjaar rekord-sterkte bereik toe daar teen die einde van Februarie meer as 2 000 m³ water per sekonde verbygevloei het.
Die naaste wat dié rivier ooit aan die rekord gekom het, was in 2018, toe dit in April en Mei digby 1 700 m³ gedraai het.
Die Kunenerivier het egter vanjaar op 22 Februarie teen net sowat 28,6 m³ per sekonde verby Ruacana gevloei en nog nie een maal sedert die aanvang van die reënseisoen die 250 m³-merk bereik nie.
Dit beteken ook die Ruacana hidrokragstasie verskaf tans nou slegs 140 MW elektrisiteit gedurende piektye, waar dit normaalweg tussen 35% en 40% van die land se elektrisiteit verskaf, deur 347 MW te voorsien.
Die 2018-’19-reënseisoen het ook baie min water aan die Kunenerivier besorg.
Intussen het die Kavangorivier Maandag 1,51 meter diep by Nkurenkuru gevloei, 3,97 m diep by Rundu en 3,09 m diep by Divundu. Volgens die vloedbulletin is dit beslis die laagste vir Maart in vyf jaar.
In Maart verlede jaar het dié rivier tussen 7 m en 8 m diep by Rundu gevloei. Tussen 2015 en 2020, was die rivier se laagste vlak nog bó 5 m in Maart.
Hierteenoor loop die Zambezirivier by Katima Mulilo tans 6,07 m diep – die sterkste in vyf jaar, met die laer Oranjerivier wat 2,36 m diep by Blouputs loop.
Waarskuwings dat gemeenskappe in die oostelike Zambezi-vloedvlaktes asook teen die laer Oranjerivier bedag op vloede moet wees, is opnuut uitgereik.
– [email protected]
Kommentaar
Republikein
Geen kommentaar is op hierdie artikel gelaat nie