Rittmann-moord: Eksminnaars skuldig
Ses jaar ná sy grumoord kan die gesin van 'n man, pa en broodwinner uiteindelik die skerwe begin optel.
Denver Kisting
Enkele minute nadat Rhyno du Preez (35) en sy 48-jarige eks, Rachel Rittmann, aan die grumoord op haar man skuldig bevind is, het hy aan Republikein gesê hy het geen kommentaar nie.
Geklee in 'n geruite hemp, peperduur jeans en ewe duur sportskoene en sonbril, het hy sy weg kort tevore voor Rittmann uit die hof na die selle gevind.
Gedurende die bykans 90 minute lange uitspraak van regter Christie Liebenberg in die Windhoek-hoërhof gister het hy deurgaans aantekeninge van die verrigtinge sit en maak.
Op die kop 11:27 het Liebenberg die oudminnaars in die beskuldigdebank laat opstaan en ingelig die hof is van mening hulle het saamgesweer om haar man, mnr. Loffie Rittmann (toe 34), te vermoor en het op 23 Augustus 2013 dié plan op Gobabis uitgevoer.
Af en toe het Du Preez 'n sluk water uit 'n bottel geneem, terwyl Rittmann Liebenberg stip dopgehou het.
Naas moord en sameswering, waaraan albei skuldig bevind is, is sy ook aan diefstal en hulle albei aan dwarsboming van die gereg skuldig bevind.
Du Preez het destyds vir mnr. Rittmann met 'n mes toegetakel, wat Rachel in die egpaar se kombuis gaan haal het.
Hulle het die moordtoneel opgeruim waarná Du Preez mnr. Rittmann se lyk in die oorledene se bakkie vervoer en tussen Windhoek en Gobabis met die oorskot daarin van die pad laat loop en aan die brand gesteek het.
Die eertydse paartjie is op Lentedag 2013, sowat agt dae ná die moord, onder die komberse in 'n huis in Otjomuise in Windhoek in hegtenis geneem.
Volgens Liebenberg was drie moontlike motiewe vir die moord ter sprake – om geld in die hande te kry om die klaer in 'n bedrogsaak terug te betaal waarby die oudminnaars betrek was, om te keer dat Rachel terugkeer na haar man wat haar glo mishandel het, en Du Preez se jaloesie.
Liebenberg reken dit was 'n kombinasie tussen die behoefte om vinnig geld te kry – waarvoor wyle Rittmann se gewysigde polisse sou sorg – en Du Preez se jaloerse geaardheid.
Die eertydse minnaars het mekaar in Mei 2012 op Facebook ontmoet.
In daardie stadium was hy in sy 20's en sy reeds in haar 40's.
Teen die volgende maand het hy by haar ingetrek.
Kort voor lank was hulle kollegas by die kontantleningsaak waar sy 'n bestuurder was.
Die oudminnaars het die verhouding meer as een keer sedert hul aanlyn ontmoeting en die moord verbreek, maar het gou weer versoen geraak.
Wyle Rittmann se drie sibbes, mnr. Sethrick en mee. Leana en Gledis Rittmann, moes gister na die grieselrige besonderhede van hul broer se dood in die uitspraak luister.
Die twee moet op 7 en 9 Oktober vir voorvonnisverrigtinge terug in die hof wees.
Die staat sal dan betoë ter strafverswaring lewer, terwyl die verdediging by die hof om genade sal pleit.
Leana Rittmann het ná gister se uitspraak gesê “albei families” sukkel steeds om afsluiting te vind.
[email protected]
Enkele minute nadat Rhyno du Preez (35) en sy 48-jarige eks, Rachel Rittmann, aan die grumoord op haar man skuldig bevind is, het hy aan Republikein gesê hy het geen kommentaar nie.
Geklee in 'n geruite hemp, peperduur jeans en ewe duur sportskoene en sonbril, het hy sy weg kort tevore voor Rittmann uit die hof na die selle gevind.
Gedurende die bykans 90 minute lange uitspraak van regter Christie Liebenberg in die Windhoek-hoërhof gister het hy deurgaans aantekeninge van die verrigtinge sit en maak.
Op die kop 11:27 het Liebenberg die oudminnaars in die beskuldigdebank laat opstaan en ingelig die hof is van mening hulle het saamgesweer om haar man, mnr. Loffie Rittmann (toe 34), te vermoor en het op 23 Augustus 2013 dié plan op Gobabis uitgevoer.
Af en toe het Du Preez 'n sluk water uit 'n bottel geneem, terwyl Rittmann Liebenberg stip dopgehou het.
Naas moord en sameswering, waaraan albei skuldig bevind is, is sy ook aan diefstal en hulle albei aan dwarsboming van die gereg skuldig bevind.
Du Preez het destyds vir mnr. Rittmann met 'n mes toegetakel, wat Rachel in die egpaar se kombuis gaan haal het.
Hulle het die moordtoneel opgeruim waarná Du Preez mnr. Rittmann se lyk in die oorledene se bakkie vervoer en tussen Windhoek en Gobabis met die oorskot daarin van die pad laat loop en aan die brand gesteek het.
Die eertydse paartjie is op Lentedag 2013, sowat agt dae ná die moord, onder die komberse in 'n huis in Otjomuise in Windhoek in hegtenis geneem.
Volgens Liebenberg was drie moontlike motiewe vir die moord ter sprake – om geld in die hande te kry om die klaer in 'n bedrogsaak terug te betaal waarby die oudminnaars betrek was, om te keer dat Rachel terugkeer na haar man wat haar glo mishandel het, en Du Preez se jaloesie.
Liebenberg reken dit was 'n kombinasie tussen die behoefte om vinnig geld te kry – waarvoor wyle Rittmann se gewysigde polisse sou sorg – en Du Preez se jaloerse geaardheid.
Die eertydse minnaars het mekaar in Mei 2012 op Facebook ontmoet.
In daardie stadium was hy in sy 20's en sy reeds in haar 40's.
Teen die volgende maand het hy by haar ingetrek.
Kort voor lank was hulle kollegas by die kontantleningsaak waar sy 'n bestuurder was.
Die oudminnaars het die verhouding meer as een keer sedert hul aanlyn ontmoeting en die moord verbreek, maar het gou weer versoen geraak.
Wyle Rittmann se drie sibbes, mnr. Sethrick en mee. Leana en Gledis Rittmann, moes gister na die grieselrige besonderhede van hul broer se dood in die uitspraak luister.
Die twee moet op 7 en 9 Oktober vir voorvonnisverrigtinge terug in die hof wees.
Die staat sal dan betoë ter strafverswaring lewer, terwyl die verdediging by die hof om genade sal pleit.
Leana Rittmann het ná gister se uitspraak gesê “albei families” sukkel steeds om afsluiting te vind.
[email protected]
Kommentaar
Republikein
Geen kommentaar is op hierdie artikel gelaat nie