Robot slaan rooi vir oudverkeershoof

Errol HurterDie man wat in Windhoek naam gemaak het as ’n streng, maar regverdige verkeershoof, is nie meer nie.In die wandel bekend as Giel, het mnr. Machiel Nicolaas Nieuwoudt, (foto) oudverkeershoof van die Windhoek munisipaliteit, Sondag op Vadersdag tuis na ’n kort siekbed gesterf. Hy sou op 12 Augustus 82 jaar oud geword het. Hy is op 12 Augustus 1934 op Mariental gebore en het sy skoolloopbaan op Stampriet en in Windhoek voltooi. Hy het ’n loopbaan as verkeersbeampte gekies en was in ’n stadium die hoofverkeersbeampte van Cradock in die Oos-Kaap. Die koue van daardie wêreld het hom laat terugkeer na Windhoek waar hy na jare diens by die munisipaliteit in Februarie 1973 as adjunk- hoofverkeersbeampte aangestel is. Hy het hom vroeg in sy loopbaan reeds as ’n leier in verkeerskringe onderskei, deurdat hy op ’n tydstip as die jongste munisipale verkeershoof in Suid-Afrika en Namibië aangewys is. Hy het onder meer die kursus in verkeerswese wat deur die Suid-Afrikaanse Federasie vir Padveiligheid aangebied is, in 1964 met onderskeiding geslaag. Op ’n vraag of hy daarvan hou om verkeerskaartjies uit te reik, was sy antwoord dat hy dit nie geniet nie, maar dit eerder as ’n opvoedingstaak vir die publiek en alle padverbruikers beskou.Groot gebeurtenisse in sy loopbaan waar hy diens moes lewer, was ander meer die opstand in 1958 in die Ou Lokasie, asook die Suid-Afrikaanse Lugdiens se Boeing wat in 1968 buite die destydse JG Strijdom-lughawe, vandag die Internasionale Lughawe Hosea Kutako, neergestort het. In 1975 is hy tot hoofverkeersbeampte van Windhoek bevorder, ’n pos wat hy tot en met sy aftrede in 1992 beklee het.Ná sy aftrede het hy hom voltyds toegewy aan sy boerdery waar hy en sy vrou, Bets, aktiewe lede van die boeregemeenskap van Okahandja was. Uit sy tydverdrywe kom Giel se liefde vir die natuur duidelik na vore: Halfedelstene, inheemse voëls van Suider-Afrika, strandhengel en jag saam met sy seuns. Hy en Bets kon gereeld langs die kus in die omgewing van Hentiesbaai, gevolg word waar hy sy spesiale visgate graag met ander gedeel het. Hy het baie vir liefdadigheid gedoen en het nie gehuiwer om ander met raad en daad by te staan nie. In die woorde van Ellie, wat jare by hulle gewerk het, was hy ’n goeie mens wat geen mens of dier skade aangedoen het nie.Mense baie ná aan hom sal sy groot voorliefde vir ’n “koffietjie”, sy innemende glimlag en humorsin onthou.Hy word oorleef deur sy huweliksmaat van die afgelope 43 jaar, Bets Nieuwoudt, sy seun Reyno en dogter Bonita uit ’n eerste huwelik en Michael, sy seun uit sy tweede huwelik. Hy laat ook stiefseuns, skoondogters, skoonseuns en kleinkinders agter.Die begrafnisdiens vind Vrydag om 14:00 in die NG Kerk Pionierspark plaas van waar die stoet na die begraafplaas in Pionierspark sal beweeg waar die laaste eer aan een van Windhoek se bekendste inwoners bewys sal word.

Robot slaan rooi vir oudverkeershoof

Kommentaar

Republikein 2025-04-09

Meld asseblief aan om kommentaar te lewer

Robot slaan rooi vir oudverkeershoof

Kommentaar

Republikein 2025-04-09

Meld asseblief aan om kommentaar te lewer

MELD AAN

Advertensie