Sê jou sê: Munisipale tariewe styg skerp

Die hoofstad se raad (CoW) het Donderdagaand tydens sy maandelikse vergadering verskeie kwaai prysstygings aangekondig. Sedert Sondag dok inwoners van die hoofstad heelwat meer op vir ­waterverbruik, brandweerdienste, vullisverwydering, riooldienste, begrafnisse, verassings, parkering en die huur van openbare sale en stadions. Dié tariefverhogings volg nadat die amptelike opposisie, die Popular Democratic Movement (PDM), 'n verklaring uitgereik het waarin die party hom uitspreek oor die lot van arm Namibiërs. Republikein het Windhoekers gevra hoe hulle oor die stygings voel.



Ruben Schuster

“Ek is ontevrede oor die verhogings van ­munisipale dienste. Terwyl ons reeds deur munisipale rekeninge geknyp word, kom dít ook nog by. Soos die verhogings styg moet die salarisse ook styg. Ons het ongelukkig nie 'n keuse nie en moet maar net gehoorsaam."



Amalia Kisting

“Hoekom word ons nie vooraf gewaarsku oor die verhoging van munisipale dienste nie? Dit is onmoontlik terwyl ons reeds staan en sukkel met karige salarisse. Bejaardes ly en weerloses sal mos net hul huise verloor as hulle nie hul skuld kan betaal nie. As ­salarisse ook soos dienste en kospryse gestyg het, was dit veel beter.”



Basadi Oathlotse

“Ons het klaar 'n ekonomiese krisis en sala­risse word ook nie meer verhoog nie. Destyds het die munisipaliteit belowe om die koste om te huur na te gaan, maar miskien was dit net leë beloftes. As die koste van dien­ste styg, moet meterlesers nie lesings skat nie, hulle moet die regte lesing deurgee sodat ons nie verkeerde lesing staan en betaal nie. Die geld word ook nie terugbetaal nie.”



Adelheid Louw

“Hoekom moet almal geraak word as daar verhogings is, maar dit is net party wat ­Harambee-kospakkies ontvang. Party mense is ook reeds nie in staat om hul rekeninge ten volle te betaal nie. Die meterlesers gee ook nie die korrekte lesing nie – as dit woonstelle is, dan raai hulle net en gee enige lesing wat hulle wil, en waterrekeninge is altyd hoog. Ons kan nie in stilte swaarkry nie.”



Maria Engelbrecht

“Met verhogings wat deesdae links en regs gemaak word, moet ons maar net werk om die pot aan die kook te hou, maak nie saak hoe oud jy is nie. Die ongerief van sommige woonbuurte is te veel, maar ons moet maar net aanhou betaal om dienste te kry.”





Erenstine ||Garoës

“Munisipale tariewe styg, maar die ­situasie in sekere woonbuurte is net te erg. Hulle het nie geriewe soos water- en elektrisiteits­toevoer en sanitasie nie. Hulle besluit net om die dienste te laat styg. Ons kan ook nie by huurpryse byhou nie en meterlesings moet reg hanteer word. Resultate moet regverdig wees en nie geraai word nie. Die rekening is gewoonlik baie hoog en dit is onregverdig.”



Sylvia Afrikaner

“Vir my is dit nie 'n kwessie as daar 'n verhoging in dienste is nie, maar as salarisse ook styg, sal dit goed wees. Salarisse stagneer, maar dienste en die prys van kos styg. As die prys van kos styg, moet ons dit ten minste kan bekostig, maar dit is nie die geval nie. Kan die president nie iets oor salarisse sê nie. Dit is net die regering wat verhogings gee, maar die private sektor doen dit nie.”



Kleophas ‡Nauseb

“Ons lewe al onder die broodlyn en salarisse bly op dieselfde skaal waar dit was – daar is geen verandering nie. Ons kan reeds nie byhou met die betaling van munisipale rekeninge nie. Daar is net te veel druk met die prys van kos wat ook daagliks styg.”