SA brandbestryders skrik nie vir Kanadese inferno

Vergeleke met brande soos die een in die Simonsberge tussen Franschhoek en Stellenbosch wat vroeër vanjaar ’n week lank gewoed het, is dié in Alberta, Kanada, ’n monster.
Dié brande strek oor 900 km en woed al ’n maand lank.
Maar die 301 Suid-Afrikaanse brandbestryders wat verlede week daar aangekom het om die brande te help blus, sê hulle is reg daarvoor.
Die uitdagings bly dieselfde, sê Trevor Wilson, wat in beheer is van Working on Fire se operasies in Kanada.
Die brandbestryders van ­Working on Fire, van wie 20% vroue is, was ’n Facebook-sensasie toe hulle verlede week singend by die Edmonton-lughawe in Alberta geland het.
Hulle het aangesluit by brandbestryders van vyf ander lande wat deur die Canadian Interagency Forest Fire Centre (CIFFC) ingevlieg is.
Die veldbrand in Fort McMurray, ’n buurt in die Noordooste van Alberta, het op 1 Mei begin en het tot dusver 2 400 huise en geboue verswelg.
Dit strek volgens ’n verklaring van die Alberta-regering oor meer as 580 000 ha en het tot in Saskatchewan, ’n buurprovinsie van Alberta, versprei. Bykans 2 500 brandweermanne van Kanada, Australië, Nieu-Seeland, Mexiko en die VSA veg teen die brand.
Wilson sê hul positiewe houding beïnvloed die mense met wie hulle in aanraking kom.
“Die hele Fort McMurray-omgewing is platgeslaan oor die brand en enigiets wat ons kan doen om dit beter te maak, al is dit net per ongeluk, is ’n goeie ding.”
Hulle ken hul werk en die feit dat dié brand so groot is, verander niks.
“Behalwe dat die logistiek meer kompleks is, is dit dieselfde werk met dieselfde uitdagings. Dit is net in ’n ander land.”
Working on Fire is ’n werkskeppingsprojek wat deur die regering gefinansier word.
Hulle verskaf werk aan meer as 5 000 jong mans en vroue in meer as 200 basisse oor die hele Suid-Afrika.
- Netwerk24