SA grense op skrefie oop vir skaapuitvoere

Elvira Hattingh - Suid-Afrikaanse grense vir Namibiese skaapuitvoere het nou op ’n skrefie oopgemaak. Na verwagting sal dieselfde voorts vir bees- en bokuitvoerders geld.Die ministerie van landbou, water en bosbou het laat Donderdag ’n mediaverklaring uitgereik waarin gesê is ’n ooreenkoms is met die Suid-Afrikaanse departement van landbou, water en visserye (DAFF) bereik, waarvolgens skape vanuit Namibië na vier goedgekeurde voerkrale of slagplase in die buurland uitgevoer sal kan word.Dit volg nadat hersiene regulasies vir die invoer van vee na Suid-Afrika onlangs in die land se staatskoerant gepubliseer is wat op 1 Julie in werking getree het en die plaaslike speenkalfmark bykans tot stilstand gedwing het.Die verwagting is dat nog 15 fasiliteite hoop om binnekort deur Suid-Afrika goedgekeur te kan word, wat beteken beeste en bokke sal ook onder standaard- operasionele prosedures (SOP) van Namibië na Suid-Afrika uitgevoer kan word.Aanvanklik is die boodskap egter oorgedra dat dié SOP-vereistes ook vir beeste en bokke sou geld, alhoewel die genoemde vier bestemmings slegs op skape van toepassings is. Die goedgekeurde fasiliteite is Cartol Abattoir in die Wes-Kaap, GWK Meat Abattoir, GWK Meat Feedlot en Rooidag Abattoir – almal in die Noord-Kaap. In geval van hierdie uitvoere, wat verligting vir skaapboere en moontlik later ook bees- en bokboere sal bring, geld ’n nuwe permit en hoef daar nie vir brucellose of dubbele toetse vir tuberkulose gedoen te word nie.“Uitvoerders sal voorts om die nuwe veterinêre invoerpermit by DAFF in Pretoria moet aansoek doen en alle bokke, skape en beeste moet behoorlik met NamLITS-oorplaatjies geïdentifiseer word,” lui die ministerie se verklaring.Die Namibië Landbou-unie (NLU) het Vrydag in sy nuusbrief gesê sodra die NAMLits-stelsel geprogrameer is vir die verkoop van dubbele oorplaatjies vir skape en bokke, sal hierdie vereistes ook vir kleinvee in werking tree. Die invoerpermit moet dan ook deur ’n Namibiese staatsveearts gesertifiseer word en die uitvoerder van die vee moet sy vrag aan veterinêre amptenare van beide lande verklaar. Veterinêre beamptes van Suid-Afrika sal dan ’n rooikruis-permit uitreik sodat die besending van die grens af na die betrokke voerkraal kan beweeg en daar sal gereël word dat die eienaar van die betrokke voerkraal of slagfasiliteit dit in ontvangs moet neem en die seel moet breek, het die ministerie gesê.Verder is gesê dat die beweging van Namibiese vee na enige ander bestemming in Suid-Afrika steeds onderhewig is aan die bestaande, streng invoermaatreëls – maatreëls wat strenger inentings, toetse en kwarantynvereistes van groot- en kleinvee vir siektevoorkoming vereis.Die ministerie het ’n beroep op uitvoerders van lewende hawe gedoen om by hierdie maatreëls te hou, om te verseker dat hierdie uiters sensitiewe handelsooreenkoms nie in gevaar gestel word nie. Die Lewendehaweprodusente-organisasie (LPO) het gesê dit ondersteun ook die beroep.Die NLU het Vrydag in sy nuusbrief geskryf dié akkreditasie van Suid-Afrikaanse fasiliteite bring mee dat minder streng vereistes vir die invoer van vee geld. “Die belangrikste faktore wat wegval, is die verpligte toetsing van brucellose en die dubbele toetsing van tuberkulose (TB). Dit beteken dat kleinvee nie meer getoets hoef te word nie en dat beeste net een keer binne 30 dae voor dit uitgevoer word teen TB getoets hoef te word.”

SA grense op skrefie oop vir skaapuitvoere

Kommentaar

Republikein 2025-04-07

Meld asseblief aan om kommentaar te lewer

SA grense op skrefie oop vir skaapuitvoere

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie