SA hoop rentekoers daal dalk weer in 2019

William Horne en Bloomberg – Mense in die buurland met huislenings en motorskuld kan dalk begin uitsien na ’n tweede rentekoersverlaging in 2019.

Johann Els, hoofekonoom van Old Mutual Investment Group, verwag ’n rentekoersverlaging teen November.

Dis egter onderhewig aan drie voorwaardes, sê hy.

Volgens Els sal die Reserwebank die repokoers in November slegs kan verlaag:

· As daar teen September ’n werklik “deursigtige en geloofwaardige” plan vir die regruk van Eskom ter tafel gelê word.

· As die mediumtermyn-begrotingsraamwerk in Oktober duidelik wys dat die regering ’n laer begrotingstekort teiken om ’n fiskale afgrond te vermy.

· As Moody’s Investors Service Suid-Afrika se kredietgradering einde November onveranderd hou op die laagste vlak van beleggingsgraad en die vooruitsig ook stabiel bly.

· Beleggers in termynkontrakte het Woensdag begin om ’n 32%-kans vir ’n verlaging in die repokoers, reeds in September, in te prys. Maandag was die waarskynlikheid hiervan nog op 0% gewees.

· Opbrengste op randgedenomineerde staatseffekte wat in Desember 2026 uitbetaal, het met tien basispunte gedaal tot 8,29%, die laagste in ’n maand.

· Els sê hy twyfel of die Reserwebank die aptyt sou hê – selfs al word aan al drie sy voorwaardes voldoen – om die rentekoers drie keer te verlaag. Dis nou buiten die verlaging van 0,25 van ’n persentasiepunt in Julie en die een wat hy in November voorspel.

· ’n Verdere verlaging aan die repokoers sal regstreeks lei tot ’n daling in die koste om staatskuld te finansier, maar ook die koste van die verskeie beloofde reddingsboeie aan staatsondernemings afbring, sê Cristian Maggio, hoof van ontluikende markte van TD Securities in Londen, aan Bloomberg.

· Dit is veral goeie nuus aangesien die regering aan die begin van Augustus aangekondig het dat hy die waarde van sy weeklikse veilings vir nuwe staatseffekte (dus die koers waarteen hy nuwe skuld aangaan) met 37% verhoog.

·

· Die meeste van die ekstra krediet sal gebruik word om vir Eskom geldelik te ondersteun.

· Die inflasiekoers het in Julie met 0,5 persentasiepunt tot 4% gedaal vanaf Junie se 4,5%.

· Die konsensusraming van ekonome wat in Netwerk24 se Ekonoom van die Jaar-kompetisie deelneem, het geskat dat die inflasiekoers in Julie 4,71% sou beloop.

· Bloomberg se eie peiling van ekonome het ’n skatting van 4,3% gehad.

· Lesetja Kganyago, president van die Reserwebank, het al herhaaldelik gesê as mense ’n laer rentekoers wil hê, moet inflasie vir ’n geruime tyd in die middel van sy teikenband (dus naby 4,5%) geanker bly. Vir die afgelope vier maande het die koers redelik stabiel om die 4,5%-punt gewentel, maar nou selfs gedaal.

· Die inflasiekoers is nou al vir agt maande onder 5%. – Netwerk24