SA vandag na stembus

Ronelle Rademeyer 'n Kwarteeu ná die eerste demokratiese verkiesing in 1994 in Suid-Afrika gehou is, keer die buurland vandag weer stembus toe vir 'n algemene verkiesing wat ontleders as 'n perd van 'n ander kleur beskou – grootliks vanweë die ontnugtering en teleurstelling by kiesers.Die jongste peilings wys die regerende African National Congress (ANC) sowel as die Demokratiese Alliansie (DA) gaan steun verloor, met die Economic Freedom Fighters (EFF) wat meer stemme kan verwag.Die ANC het in die vorige verkiesing vyf jaar gelede 62,2% van die stemme op hom verenig.Volgens die verkiesingspeiling wat die marknavorsingshuis Ipsos gisteroggend bekend gemaak het, sal die ANC vandag die party wees wat deur 'n lae sowel as 'n hoë stemopkoms-scenario bevoordeel gaan word.Ipsos se peilings die afgelope maande toon die ANC kan meer as 60% van die stemme op hom verenig.Daarteenoor toon die Suid-Afrikaanse Instituut vir Rasseverhoudinge (SAIR) se finale meningspeiling die ANC gaan minder as 55% van die kiesers se kruisies kry.Die ANC gaan nie onttroon word nie, sê die oud-Namibiër en politieke wetenskaplike verbonde aan die Noordwes Universiteit op Potchefstroom, dr. Piet Croucamp. “Die vraag is hoeveel skade die ANC in hierdie verkiesing gaan ly. En wat in die verkiesings ná hierdie verkiesing gaan gebeur,” meen hy.Hy sê die wegbly-stem kan in hierdie verkiesing die ANC groter skade as die opposisiepartye berokken.“Die stempersentasie was 73% in die 2014-verkiesing. Ek sal nie verbaas wees as dit in hierdie verkiesing minder as 70% is nie,” sê hy en voeg by 'n swakker opkoms kan die kleiner partye bevoordeel.Croucamp glo hoewel die DA se mnr. Mmusi Maimane gaan kleitrap in die Wes-Kaap waar hy regeer, sal dié party wel die mas kan opkom.“In Gauteng is dit heeltemal moontlik dat die ANC in 'n koalisieregering gedwing gaan word,” sê hy.Mnr. Gareth van Onselen, die SAIR se hoof van politiek en regering, het Maandagoggend op 'n mediakonferensie in Johannesburg gesê vandag se verkiesing sal die vloeibaarste nasionale verkiesing tot nog toe wees, berig Netwerk24.Aanduidings is volgens hom dat geen party 'n volstrekte meerderheid in Gauteng sal behaal nie, maar die DA behoort die Wes-Kaap ondanks sy interne probleme te behou. 'BAIE OP DIE SPEL'Dr. Collette Schulz-Herzenberg, van die departement politieke wetenskap aan die Universiteit Stellenbosch, sê baie is in hierdie verkiesing vir die ANC op die spel.“Ná die ontnugtering oor pres. Jacob Zuma en die gebeure rakende staatskaping en korrupsie het (pres. Cyril) Ramaphosa 'n nuwe daeraad vir Suid-Afrikaners beloof.“Dit mag wees dat kiesers so ontnugter is en tot so 'n mate belangstelling verloor het, dat die opkoms by die stembusse baie swak gaan wees. Daar heers onsekerheid daaroor.“Verkiesingspeilings wys die ANC sowel as die DA het steun verloor, met die EFF wat beter vaar,” sê Schulz-Herzenberg.Sy verwag die ANC gaan nie in Gauteng die meerderheidstem behou nie en sal met mnr. Julius Malema se EFF 'n koalisieregering moet vorm. 'n Koalisieregering kan dalk ook die DA se lot in die Wes-Kaap wees, sê sy.Ipsos se peiling toon ook 33% van geregistreerde kiesers voel die land beweeg in die regte rigting, terwyl 52% meen dit is nié die geval nie.

SA vandag na stembus

Kommentaar

Republikein 2025-04-16

Meld asseblief aan om kommentaar te lewer

SA vandag na stembus

Kommentaar

Republikein 2025-04-16

Meld asseblief aan om kommentaar te lewer

MELD AAN

Advertensie