S&P gradeer Woolworths af, kap na klerereekse

Hanlie Stadler – As die resessie in Suid-Afrika lank voortduur, sal Woolworths se klante waarskynlik na goedkoper koskleinhandelaars oorskakel.

Daarby is die toekoms van afdelingswinkels soos Woolworths se Australiese filiaal David Jones in die weegskaal omdat klante van dié winkels in die meeste Westerse lande al hoe meer oorskakel na e-handel.

Dié probleme is van die redes waarom Standard & Poor’s Global Ratings (S&P) Woolworths se kredietgradering pas met twee vlakke verlaag het. Dit kom nadat die kleinhandelaar verlede maand bekend gemaak het hy het sy eerste verlies in 16 jaar gely.

S&P het Woolies se effekte van zzAA, die derde hoogste gradering op sy skaal, tot zaA+, vyfde hoogste, afgegradeer. Dit bly ’n hoë beleggingsgraad wat daarop dui dat die kredietgradeerder baie seker is Woolworths sal sy skuld kan delg.

In ’n verklaring sê S&P Woolworths moet uitdagende makro-ekonomiese toestande in Suid-Afrika trotseer, sowel as groot mededinging in Australië.

S&P kap Woolworths se swak besluite as dit kom by die keuse van klere, veral vroueklere.

S&P verwag dat die maatskappy gaan sukkel om bedryfswinsgrense te herstel in sy afdelings anders as kos. Die kosafdeling vaar steeds goed.

Nietemin verwag die gradeerder dat Woolworths sy “gevestigde markposisie sal behou . . . en geleidelik sy winsgewendheid sal stabiliseer”.

S&P verwag ondanks die probleme dat Woolworths se inkomste uit Suid-Afrika tot meer as 65% van sy totale inkomste sal groei en die wins uit Suid-Afrika stabiel sal bly op meer as 70%.

In syfers

· Woolworths het in die boekjaar tot einde Junie ’n verlies van R3,5 miljard gely in ’n moeilike jaar waarin hy ’n derde van die waarde van sy bates in Australië moes afskryf.

· Sy omset het met 2,1% tot R68,5 miljard gestyg, terwyl sy uitgawes met 5,1% tot R23,5 miljard gestyg het.

· Dit het veroorsaak dat sy bedryfswins met 15% tot R5,2 miljard gedaal het.

Suid-Afrika bly dus die grootste aandrywer van Woolworths se wins en kontantvloei.

Die groep se Australiese ondernemings, veral David Jones, het groot bedryfsveranderinge ervaar, wat ontwrigting en hoër koste meegebring het en daarom winsgrense laat val het. Die maatskappy het heelwat kapitaalbesteding aangegaan om sy vlagskipwinkel in Sydney op te knap.

“Woolworths hou steeds sy nis-, dog oorheersende posisie in Suid-Afrika se mark vir duurder kos, klere en algemene ware. David Jones en Country Road het ’n goed gevestigde markposisie, veral in die duurder kleinhandelsegment in Australië.

“Na ons mening sal ’n kombinasie van die verskeie strukturele veranderinge, swak makro-ekonomiese toestande, en onmeedoënde mededinging in albei sleutelmarkte ’n uitdaging wees vir Woolworths se pogings om die winsgewendheid van dié ondernemings te verbeter.

Aan die positiewe kant reken S&P: “Ons reken Woolworths se ambisie om ’n formidabele luukse kleinhandelaar in die Suidelike Halfrond te word, word ondersteun deur sy demografiese profiel in Suid-Afrika en die veerkragtige, hoë-inkomste-, hoewel hoogs mededingende, mark in Australië.

“Ondanks teenwinde hou Suid-Afrika se middelklas aan groei en is hulle geneig tot hoër besteding. Ons neem wel in ag dat Suid-Afrika se ekonomie struktureel swak is en dat die veerkragtigheid van verbruikers meer vatbaar is vir die voortslepende makro-ekonomiese swakheid.

“Ons merk ook op dat sowel Suid-Afrika as Australië deurloop onder sikliese teenwinde en swak verbruikersentiment wat diskresionêre kleinhandelbesteding aan bande lê.”

S&P verwag dat Woolworths oor die volgende twee jaar ’n ebitda-winsgrens van meer as 16% sal handhaaf. Ebitda is die verdienste voor rente, belasting, waardevermindering en afskrywings. – Netwerk24