Santam-hoë getuig in McLean-saak

Jacqueline Louw Mnr. Franco Feris, uitvoerende hoof van Santam Namibia, het gister voor regter Thomas Masuku in die hoërhof in Windhoek getuig oor die transaksie waarin Santam die besigheid van 'n maatskappy genaamd Law Sure Beperk in Januarie 2009 vir N$2,6 miljoen gekoop het.In 'n getuieverklaring wat by die hof ingedien is, bevestig Feris dat mnr. Danie Botes, die voormalige direkteur van die MMCT wat die trustees van dié trust vir nagenoeg N$19 miljoen dagvaar ná sy afdanking in 2013, 'n aandeelhouer van Law Sure was.Feris noem in sy verklaring hy het Santam in samesprekinge vir die aankoop van Law Sure verteenwoordig. Botes het Law Sure verteenwoordig in die transaksie wat vir N$2,6 miljoen beklink is waarin Santam die besigheid van Law Sure bekom het. Feris het aan die hof verduidelik Santam het nooit in die verkryging van die maatskappy belang gestel nie, maar in die kliënte, hul premies en hul besigheid. Feris het getuig Santam se oorname van Law Sure se besigheid het dié maatskappy as 'n “leë dop” agtergelaat.Hy het verder getuig hoewel hy nie betrokke was in onderhandelinge tussen die MMCT en Law Sure waarin dié maatskappy in Oktober 2010 deur die trust vir N$1 miljoen aangekoop is nie, hy wel daarvan ingelig is. Onder kruisverhoor van Botes se regsverteenwoordiger, senior advokaat Michael Fitzgerald, het Feris getuig nadat Santam eienaarskap van Law Sure se besigheid bekom het, was daar nie enige waarde vir die MMCT oor nie.Me. Elise Husselman, wat van April 2001 af as boekhouer by die MMCT in diens was, het gister onder kruisverhoor getuig sy was, na aanleiding van Botes se mededelings aan haar, onder die indruk die verkryging van Law Sure sou 'n positiewe aanwins vir die trust wees. “Hy het gesê ons sal baie geld uit hierdie besigheid maak,” het sy getuig.Botes het ná die beëindiging van sy diens by die MMCT die trustees, mee. Michelle McLean, Connie Maritz en mnr. Nic Kruger gedagvaar vir sy verlies aan inkomste. Die partye, wat vantevore saamgewerk het om die bekende liefdadigheidsorganisasie op te bou, betwis nou die terme van Botes se vergoeding en kommissie.Die trustees eis op hul beurt 'n bedrag van N$6,7 miljoen van Botes vir geld wat aan hom betaal is en waarop hy volgens die trustees nie geregtig was nie, sowel as 'n bedrag van N$1 miljoen wat spruit uit die Law Sure-transaksie.Republikein het McLean gister genader in verband met nuus oor die MMCT. Hoewel sy die mening uitgespreek het dat die hofgeding kinders wat by die trust baat van geleenthede ontneem, daar groot internasionale belangstelling in die trust is. Sy is op die oomblik besig met samesprekinge met die Rotariërorganisasie in Amerika oor talle toekomstige projekte vir die MMCT in Namibië. Sy het ook gesê die feit dat sy in Amerika woon, gee haar toegang tot wonderlike geleenthede wat vir die trust aangewend kan word.Senior advokaat Michael Fitzgerald en adv. Deon Obbes tree in opdrag van mnr. Stephen Vlieghe namens Botes op. Die trustees word deur senior advokaat Jean Marais en adv. Esi Schimming-Chase in opdrag van mnr. Mark Kutzner verteenwoordig.Die verhoor duur vandag voort.

Santam-hoë getuig in McLean-saak

Kommentaar

Republikein 2025-04-23

Meld asseblief aan om kommentaar te lewer

Santam-hoë getuig in McLean-saak

Kommentaar

Republikein 2025-04-23

Meld asseblief aan om kommentaar te lewer

MELD AAN

Advertensie