Sharks of Stormers, en kan die Bulls oorsee wen?

Inskrywings wat reeds vir die sewende rondte in MultiChoice Namibia (MCN) en Republikein se Superrugby-kompetisie ontvang is, sonder vier wedstryde as die naweek se taaistes uit.

Die meerderheid voorspellings verwag die Sharks sal hul wenrekord teen die Stormers voortsit.

Die Reds word ook 'n beter kans gegun teen die Bulls, wat hul oorsese toer in Brisbane afskop ná 'n goeie eerste oorwinning in Pretoria laas naweek teen die Highlanders.

Volgens deelnemers kan enigiets gebeur tussen die Chiefs en Hurricanes, asook tussen die Jaguares en ­Highlanders.

In ander aksie is die Crusaders, Blues en Brumbies eensydige gunstelinge.

Republikein se prys van N$500 vir verlede week is aan mnr. Quinton Bruce van Lüderitz toegeken. Hy was 100% in die kol met 24 vir die Blues en 15 vir die Hurricanes.

Die naaswenner was me. Michelle van Wyk van Rehoboth met 'n raaiskoot van 33-21 in die Sharks se guns (twee punte uit). Omdat sy nie 'n DStv-intekenaar is nie, staan MCN se pryse opnuut oor na die superpot met ekstra pryse in week 9.

Sewe persone was al vanjaar aan die wenkant. Vir getroue DStv-intekenare tel elke SMS as inskrywing om N$10 000 te wen ná die Superrugby-eindstryd op 20 Junie.

Kyk in die kassie hiernaas hoe om deel te neem.