Shoprite: Redes vir hofbevel nou bekend
Nafau wen in hof nadat regter beslis dat Shoprite die reëls en bepalings van die staking ondermyn.
Kristien Kruger
Die redes vir regter Shafimana Ueitele se hofbevel dat geen van Shoprite se niestakende werknemers die werk 'n stakende werknemer mag doen nie, is gister bekend gemaak.
Die Namibiese Unie vir Voedsel- en Verwante Werkers (Nafau) het 'n dringende aansoek by die hoërhof in Windhoek ingedien wat die Shoprite-groep daarvan beskuldig dat hy die reëls en bepalings van die staking ondermyn.
Die saak is Vrydagnamiddag afgehandel toe die hofbevel deur Ueitele uitgelees is. 'n Interdik is teen die Shoprite-groep toegestaan wat verbied dat enige van hul werknemers, insluitend bestuurders, seisoenwerkers of vaste termyn werkers, die werk van 'n wettige stakende werkernemer mag doen. 'n Werkgewer mag ook nie werknemers in die plek van 'n stakende werknemer aanstel nie.
Die geskil spruit uit salarisonderhandelinge aan die begin van 2020. Nadat onderhandelinge misluk het, het Nafau op 6 Junie 'n geskil van belange by die arbeidskommissaris aangemeld.
Shoprite en Nafau het op 7 Desember 2020 'n ooreenkoms onderteken met reëls wat die betoging sal reguleer.
Volgens die hofstukke weerspieël hierdie ooreenkoms die bepalings van artikel 76 (3) (a) en (b) van die arbeidswet wat stel dat geen werkgewer 'n niestakende werknemer sal aanstel om die werk van 'n wettige stakende werknemer te doen nie, tensy die werk noodsaaklik is om enige gevaar vir die lewe, veiligheid of gesondheid van 'n individu te voorkom.
Altesame 270 seisoenwerkers is deur Shoprite aangestel voordat die staking begin het.
Hoewel Shoprite ontken dat werknemers aangestel is om die werk van stakende werknemers te doen, het hulle nie ontken dat die nuut aangestelde werknemers en bestuurslede die werk van stakers doen nie.
“Shoprite stel elke jaar werknemers aan voor die spitstye. Shoprite het hulle, nes elke jaar, aangestel vir die feestyd wat voorgelê het,” het die Shoprite-groep se regsverteenwoordiger, adv. Tuhafeni Muhongo, beweer.
Shoprite se standpunt dat seisoenwerkers reeds jare gedurende spitstye aangestel word, maak volgens Ueitele geen verskil nie. “Die karakterisering van die werknemer is onbelangrik,” het die regter gesê.
Ueitele het in sy uitspraak beslis dat die aanstelling van seisoen- en vaste termyn werkers 'n lae hou was en dat dit nie strook met die ooreengekome stakingsreëls nie.
In die hofstukke het Ueitele vasgestel dat Nafau aan alle vereistes voldoen het en dat die betoging dus deur wetgewing beskerm word.
Verder is vasgestel dat Shoprite 'n plig het om nie die betoging te ondermyn nie.
JURISDIKSIEKWESSIE
Muhongo het tydens die verhoor beweer dat die hoërhof nie jurisdiksie oor die saak het nie omdat howe slegs kan fasiliteer as die geskil by die arbeidskommissaris aangemeld is.
Volgens Nafau se verteenwoordiger, mnr. Nixon Marcus, is die geskil van belange reeds op 26 Junie by
die arbeidskommissaris hangig gemaak.
Ueitele het Muhongo se bewering afgeskiet dat die nuut aangestelde Shoprite seisoen- en vaste termyn werkers deur Nafau se aansoek benadeel sal word.
“Nafau se aansoek is aan die Shoprite-groep gerig en nie die werkers nie. Shoprite se verteenwoordiging het nie daarin geslaag om dié bewering te bewys nie,” het Ueitele gesê.
Muhongo het saam met die prokureur mnr. Kennedy Haraseb Shoprite se saak hanteer, terwyl Marcus saam met die prokureur me. Uno Katjipuka-Sibolile Nafau verteenwoordig het.
– [email protected]
Die redes vir regter Shafimana Ueitele se hofbevel dat geen van Shoprite se niestakende werknemers die werk 'n stakende werknemer mag doen nie, is gister bekend gemaak.
Die Namibiese Unie vir Voedsel- en Verwante Werkers (Nafau) het 'n dringende aansoek by die hoërhof in Windhoek ingedien wat die Shoprite-groep daarvan beskuldig dat hy die reëls en bepalings van die staking ondermyn.
Die saak is Vrydagnamiddag afgehandel toe die hofbevel deur Ueitele uitgelees is. 'n Interdik is teen die Shoprite-groep toegestaan wat verbied dat enige van hul werknemers, insluitend bestuurders, seisoenwerkers of vaste termyn werkers, die werk van 'n wettige stakende werkernemer mag doen. 'n Werkgewer mag ook nie werknemers in die plek van 'n stakende werknemer aanstel nie.
Die geskil spruit uit salarisonderhandelinge aan die begin van 2020. Nadat onderhandelinge misluk het, het Nafau op 6 Junie 'n geskil van belange by die arbeidskommissaris aangemeld.
Shoprite en Nafau het op 7 Desember 2020 'n ooreenkoms onderteken met reëls wat die betoging sal reguleer.
Volgens die hofstukke weerspieël hierdie ooreenkoms die bepalings van artikel 76 (3) (a) en (b) van die arbeidswet wat stel dat geen werkgewer 'n niestakende werknemer sal aanstel om die werk van 'n wettige stakende werknemer te doen nie, tensy die werk noodsaaklik is om enige gevaar vir die lewe, veiligheid of gesondheid van 'n individu te voorkom.
Altesame 270 seisoenwerkers is deur Shoprite aangestel voordat die staking begin het.
Hoewel Shoprite ontken dat werknemers aangestel is om die werk van stakende werknemers te doen, het hulle nie ontken dat die nuut aangestelde werknemers en bestuurslede die werk van stakers doen nie.
“Shoprite stel elke jaar werknemers aan voor die spitstye. Shoprite het hulle, nes elke jaar, aangestel vir die feestyd wat voorgelê het,” het die Shoprite-groep se regsverteenwoordiger, adv. Tuhafeni Muhongo, beweer.
Shoprite se standpunt dat seisoenwerkers reeds jare gedurende spitstye aangestel word, maak volgens Ueitele geen verskil nie. “Die karakterisering van die werknemer is onbelangrik,” het die regter gesê.
Ueitele het in sy uitspraak beslis dat die aanstelling van seisoen- en vaste termyn werkers 'n lae hou was en dat dit nie strook met die ooreengekome stakingsreëls nie.
In die hofstukke het Ueitele vasgestel dat Nafau aan alle vereistes voldoen het en dat die betoging dus deur wetgewing beskerm word.
Verder is vasgestel dat Shoprite 'n plig het om nie die betoging te ondermyn nie.
JURISDIKSIEKWESSIE
Muhongo het tydens die verhoor beweer dat die hoërhof nie jurisdiksie oor die saak het nie omdat howe slegs kan fasiliteer as die geskil by die arbeidskommissaris aangemeld is.
Volgens Nafau se verteenwoordiger, mnr. Nixon Marcus, is die geskil van belange reeds op 26 Junie by
die arbeidskommissaris hangig gemaak.
Ueitele het Muhongo se bewering afgeskiet dat die nuut aangestelde Shoprite seisoen- en vaste termyn werkers deur Nafau se aansoek benadeel sal word.
“Nafau se aansoek is aan die Shoprite-groep gerig en nie die werkers nie. Shoprite se verteenwoordiging het nie daarin geslaag om dié bewering te bewys nie,” het Ueitele gesê.
Muhongo het saam met die prokureur mnr. Kennedy Haraseb Shoprite se saak hanteer, terwyl Marcus saam met die prokureur me. Uno Katjipuka-Sibolile Nafau verteenwoordig het.
– [email protected]
Kommentaar
Republikein
Geen kommentaar is op hierdie artikel gelaat nie