Show teen droogte

Yolanda Nel – “Ons probeer die mense help wat elke dag kos op ons tafels sit. Party boere het nege jaar laas genoeg reën gekry,” sê Marcha Reed van MR Entertainment.

Marcha is lid van die Namibië Boere Hartklop/Droogtehulp-groep op Facebook.

“Ek sien al jare hoe hulle boere help met voer deur skenkings en aanlynveilings,” vertel sy.

Sy het aan Henriëtte le Grange en Wildred Weise voorgestel dat sy 'n show reël om nog meer geld in te samel.

Daarmee saam daag Marcha almal op haar MR Entertainment-blad uit om elk N$50 te skenk.

“Hierdie geld bring 'n klein bietjie verligting vir 'n boer in nood. Op die ou einde maak talle klein bydraes 'n groot verskil,” sê sy.

“Vir iemand wat daagliks sy diere se karkasse moet optel omdat daar nie kos is nie, gaan 'n paar bale voer die wêreld beteken.”

Die show sal op 6 April in Winhoek Hoërskool (WHS) se saal plaasvind. Hier sal gaste met Adam Tas en Brendan Peyper se klanke vermaak word.

“Dit gaan 'n kuiergeleentheid vir die hele gesin wees,” sê Marcha, en voeg by daar sal ook 'n verskeidenheid kosstalletjies wees.

Kaartjies kos N$150 vir volwassenes en N$80 vir voorskoolse kinders en is via Webtickets of enige Pick n Pay te koop.

Alle geld gaan vir die aankoop van voer, wat aan boere geskenk gaan word wat aansoek om hulp gedoen het.

Gaan koop vandag dus nog jou kaartjie, of maak 'n klein skenking.

Elke bietjie help!