Sioka as verleentheid beskou

Denver Kisting – Die minister van geslagsgelykheid en kinderwelsyn, me. Doreen Sioka, is in die pekel oor opmerkings wat sy Dinsdag in die openbaar gemaak het.Sioka het op Internasionale Menseregtedag en Vrouedag gesê Namibië het meer vroue as mans.Daarom, het sy gereken, moet mans eerder verhoudings met enkellopende vroue aanknoop of met hulle trou, pleks van vroue verkrag.Sy, byvoorbeeld, verteenwoordig enkellopende vroue, het sy aan die skare gesê. Visepresident Nangolo Mbumba en eerste minister Saara Kuugongelwa-Amadhila was in die gehoor.Sioka het by dié geleentheid buite die Ou Lokasie-begraafplaas ook haar lyf seremoniemeester gehou.’n Senior regeringsamptenaar het op voorwaarde van anonimiteit gesê: “Ek was uiters teleurgesteld met die seremoniemeester. Trouens, behalwe die visepresident, wat ek dink sy toespraak kortgeknip het weens die verleentheid, en behalwe vir die VN-verteenwoordiger, het die ander leiers hulle power van hul taak gekwyt. So baie verwarring en ongevraagde uitlatings.”Volgens Sioka is geslagsgegronde geweld “’n ernstige ding. Ons moet dit stopsit. Hoekom kan julle nie trou nie? Hoekom kan jy nie ’n meisie vat nie? Hoekom verkrag? Hoekom kan jy nie jou geluk probeer nie?”Mans, meen sy, is nie langer mans nie maar lafaards. “Dis regtig nie regverdig nie. Namibiese mans, verander. Moet ons nie doodmaak nie. Moet ons nie verkrag nie.”In teenstelling met me. Rachel Odede, die Verenigde Nasies (VN) se verteenwoordiger in Namibië, het Mbumba nie na seksuele oriëntasie verwys as ’n rede waarom diskriminasie verbied word nie.Die visepresident het wel gesê dit was ’n moeilike dag om ’n man te wees.Odede het op haar beurt ook gesê die gebrek aan data om ’n geheelbeeld van geslagsgegronde geweld in Namibië te bied, is ’n struikelblok.Hierop het Sioka geantwoord: “Ons hoor; ons luister. Ons sal ons sokkies optrek.”In reaksie op ’n reeksverkragter se skuldigbevinding verlede jaar het Sioka gesê selfs die Bybel is gekant teen verkragting.Wat sy nie verstaan nie, is hoekom mans nie eerder met vroue trou nie in plaas daarvan om hulle te verkrag, het sy toe ook by navraag aan Republikein gesê.Sy was egter gou om wal te gooi dat sy wel kennis daarvan dra dat mans ook hul vroue kan verkrag. “Ek weet van twee sulke gevalle.”Dít, sê sy, gebeur wanneer mans, sonder om met vroue te kommunikeer, “net op hulle spring”.Gister het sy beweer sy dra geen kennis van enige sulke voorvalle nie. “Ek het geen bewyse van mans wat hul vroue verkrag nie.”Sioka was verstom dat haar opmerkings Dinsdag nie in ’n goeie gees ontvang is nie. “Wil hulle (vroue) verkrag word?” wou sy weet.Niemand het by die geleentheid aangedui hulle is ongemaklik met haar uitlatings nie, sê sy. Die waarheid is talle het haar gelukgewens met wat sy alles kwytgeraak het, sê sy.Boonop, sê sy, is dit nie die eerste keer dat sy mans aanraai om eerder met vroue te trou pleks van te verkrag nie. “Daardie stelling is ’n ou stelling. Verkies hulle (mans) om te verkrag in plaas daarvan om te trou?”- denver@republikein.com.na

Sioka as verleentheid beskou

Kommentaar

Republikein 2025-04-07

Meld asseblief aan om kommentaar te lewer

Sioka as verleentheid beskou

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie