Sirleaf: Mans moet vroue se waarde besef

Maria Eiseb - ’n Voormalige en eerste vroulike president van Liberië, wat ook 2011 se wenner van die Nobelprys vir vrede was, me. Ellen Johnson Sirleaf, is tans met besoek aan Namibië.

Sirleaf het parlementslede gister in die hoofstad toegespreek.

Tydens die verrigtinge het die speaker van die Nasionale Vergadering (NV), dr. Peter Katjavivi, gesê patriargale opvattings het veroorsaak dat vrouens in Afrika se vermoëns vir lank onderskat is.

Die hedendaagse samelewing het dié opvattings egter verkeerd bewys.

Hy het gesê die vryheid- en onafhanklikheidstryd het tot meer liberale denke en die emansipasie van die samelewing gelei.

Sirleaf is ’n vrou wat eenvoudig weier om in ’n boksie gedruk te word, het Katjavivi gesê.

Hy het bygevoeg onlangse studies bevestig die betekenisvolle rol wat vroue in die parlement speel.

Katjavivi sê parlementsvroue het ’n passie vir kwessies soos onder meer geslagsgebaseerde geweld, geweld teen kinders en opvoedingsaangeleenthede.

“Ek weet nie of mans agterkom hoe gesteld vroue op sekere kwessies is nie,” het hy gesê.

“Ons moet dit waardeer en sommige wetsaspekte verander.”

Hy het gesê Liberië het Namibië teen die einde van die vryheidstryd gesteun.

“Politieke partye in die parlement word ewe veel deur mans en vroue verteenwoordig, en daar is deesdae nie meer ’n debat waar vroue nie verteenwoordig word nie,” het hy gesê.

Me. Christin ||Hoëbes, adjunkminister van internasionale betrekkinge en samewerking, het by die geleentheid gesê vroue moet mekaar aanmoedig en bemagtig.

“Moenie vergeet waar julle vandaan kom nie. Onthou die vroue wat jul hulp nodig het,” het sy gesê.

Sirleaf het vroue lof toegeswaai vir die rol wat hulle in die parlement speel.

Volgens haar het vroue tot die aanvaarding van die VN se volhoubare doelwitte op die gebiede van natuurlike hulpbronne, ekonomie, gesondheid, onderwys, menslike hulpbronne en die jeug bygedra.

Sy het voorts gesê geslagsgelykheid is ’n groot bron van kommer en die stelsel wat in die verlede van toepassing was, moet verander.

Mans moet die waarde van vroue besef, het sy gesê.

Sirleaf wou weet wat gedoen kan word om jongmense geleenthede op opvoedkundige gebied te gee.

“Jongmense is ongeduldig en leiers oraloor Afrika moet ’n manier vind om die jeug te hanteer,” het sy gesê.

Tydens die gesprek het me. Juliet Kavetuna, adjunkminister in die ministerie van gesondheid en maatskaplike dienste, gesê die manier waarop vrouekwessies aangespreek word, moet verander.

Dr. Becky Ndjoze-Ojo, adjunkminister van hoër onderwys, opleiding en vernuwing, het gesê: “Vroue moet op grondvlak bemagtig word, alle vroue moet opgelei word.”

Mnr. Reinholdt Nauyoma, ’n parlementslid, het gesê die bemagtiging van vroue en meisies moet seuns nie uitsluit nie.

Sirleaf het gesê seuns is bevoorreg en het in die verlede geleenthede gehad op gebiede waar meisies ’n agterstand gehad het.

Volgens Sirleaf moet mense wegdoen met die opvatting dat vroue nie die regte kandidaat vir ’n posisie of aanstelling kan wees nie.

“Vroue is net so sterk soos mans en beskik oor selfs meer leierseienskappe,” het sy gesê.

“Hou aan, veg vir jul regte en moenie ophou om jul stemme te laat hoor nie. Moenie van die vroue vergeet wat julle moet bemagtig nie.”