Sjebeens, kroeë mag weer drank verkoop

Henriette Lamprecht – Gelisensieerde sjebeens en kroeë mag weer Maandae tot Saterdae van 09:00 tot 21:00 alkohol op hul perseel verkoop.

Volgens wysigings van die Covid-regulasies wat in die Staatskoerant gepubliseer is, word casino's en dobbelhuise toegelaat om onder streng vereistes te open. Dit sluit in dat die eienaar moet verseker slegs een persoon word op 'n slag by 'n dobbelmasjien toegelaat, terwyl dobbelmasjiene, snoekertafels en alle bykomstighede gereeld en ná elke keer se gebruik ontsmet en skoongemaak word.

In sjebeens moet die eienaar geriewe vir handewas verskaf, sosiale afstand ten alle tye verseker en ook seker maak alle persone dra heeltyd 'n masker.

Sjebeens mag weer Maandae tot Saterdae van 09:00 tot 21:00 drank verkoop. Sjebeen-eienaars het die afgelope weke vergaderings met regeringslui oor die impak van die Covid-regulasies op hul sakebedrywighede gehad.

Volgens die nuwe regulasies word drankverkope nou op weeksdae van 09:00 tot 18:00 en Saterdae van 09:00 tot 13:00 toegelaat.

Waar drank op 'n perseel verkoop en gebruik word, is dit toelaatbaar van 09:00 tot 22:00 Maandae tot Saterdae. Geen drankverkope word op Sondae toegelaat nie, behalwe waar dit verkoop word aan 'n persoon in onder meer 'n restaurant of gastehuis waar dit op die perseel gebruik word. Dit word egter ook net tot 22:00 toegelaat.

• Volgens die nuwe regulasies moet persone wat Namibië binnekom, 'n bewys kan toon van 'n PCR-uitslag wat nie ouer is as sewe dae vanaf die datum wat die weefselmonster geneem is nie. Die uitslag van die PCR-toets moet van 'n laboratorium wees wat gesertifiseer is in die land wat dit uitgereik het.

– [email protected]