Skool wil hof toe oor vereniging

Henriette Lamprecht ’n Privaatskool in Windhoek beoog regstappe nadat dit as beweerde lid van die Vereniging van Private Skole in Namibië (APSN) betrek is by ’n dokument wat aan die ministerie van onderwys, kuns en kultuur gestuur sou word met onder meer voorstelle dat graad 11- en 12-leerlinge vroeër terugkeer skool toe.Me. Colette Rieckert het namens die vereniging gesê die skole sal hulle “tot die hoogste hof wend om dit te laat gebeur”.Die hoof van die Windhoek Internasionale Skool (WIS), mnr. Peter MacKenzie, sê egter niemand het nog van die vereniging gehoor nie en dit wil voorkom asof Rieckert dit ‘”opgemaak” het.“Ons is woedend om hierby ingesluit te word. Ek is in gesprek met die skool se prokureur om regstappe te neem,” het MacKenzie gesê.Volgens MacKenzie het Rieckert Woensdag ’n konsepdokument aan WIS deurgestuur met voorstelle wat aan die ministerie van onderwys gerig sou word. Dit sluit onder meer in dat graad 11’s en 12’s as eerste prioriteit na skole terugkeer. Die konsepdokument is vergesel van ’n lys van 23 privaatskole oraloor in die land (WIS ingesluit) wat lede van APSN is en dit ondersteun.MacKenzie het dit duidelik gestel WIS werk nie volgens die Namibiese kalender en volg ook nie die Namibiese leerplan nie en het daarom geen belang by die dokument nie. In ’n e-pos aan Rieckert het hy aangedring alle verwysing na WIS moet “in alle en enige kommunikasie” namens APSN aan die ministerie of enige ander entiteit verwyder word.Hy het ook die grondwet van APSN aangevra.Volgens hom het Rieckert nooit op sy e-pos gereageer of die skool se naam verwyder nie.Die Namibiese Privaatskole-organisasie (Napso) het by monde van sy uitvoerende direkteur, mnr. Wouter Niehaus, gesê hoewel dit “verblydend” is dat daar skielik nog ’n liggaam op die toneel verskyn het wat tot die debat wil toetree, verskil hul benaderings totaal.“Dit is jammer dat Napso nie genader is nie, want dan kon ons dalk ’n middeweg gevind het om die regering tot ander insigte te bring,” het Niehaus gesê.Napso was volgens Niehaus tot en met 6 Mei die “enigste regmatige” organisasie vir privaatskole in die land en verteenwoordig 24 skole wat die Namibiese leerplan volg, by Cambridge International aangesluit is, IEB-skole sowel as ACE Home Schooling-skole. Van die skole deel van Napso is ook deel van Rieckert se lys van skole wat aan APSN behoort.Niehaus het verwys na ’n vergadering met die ministerie wat vir vandag geskeduleer sou word wat nou “summier” tot 20 Mei uitgestel is met die uitdruklike bevel dat “geen verdere bespreking oor enige privaatskole-aangeleentheid meer tot dan sal plaasvind nie”.Volgens hom is Napso reeds sedert 4 April in “ernstige konsultasie’ met die uitvoerende direkteur van onderwys, me. Sanet Steenkamp, en is deeglike en goed nagevorste voorstelle ten opsigte van uitdagings met betrekking tot Covid-19 aan haar deurgestuur. Die organisasie het ook ’n gedetailleerde dokument saamgestel uit deeglike navorsing (internasionaal sowel as van lede) om as voorstel te dien vir die vroeër infasering van graadgroepe in skole wat voldoen aan die vereiste regulasies soos intern aanvaar.“Ons het besluit om die dokument steeds vandag aan me. Steenkamp te stuur en te vra dat enige leemtes of tekortkominge (hoewel dit aan die Wêreldgesondheidsorganisasie se regulasies voldoen) in die dokument uitgewys word. “Sodoende kan ons ook aandag gee aan ander regulasies wat Namibië spesiaal van toepassing wil maak,” het hy gesê.Niehaus het beklemtoon dit bly Napso se standpunt om “sover as moontlik eerder die pad saam te stap en ’n werkbare oplossing daar te stel” en dat elke ander wetlike opsie “die heel laaste” is om te gebruik. – henriette@republikein.com.na

Skool wil hof toe oor vereniging

Kommentaar

Republikein 2025-04-08

Meld asseblief aan om kommentaar te lewer

Skool wil hof toe oor vereniging

Kommentaar

Republikein 2025-04-08

Meld asseblief aan om kommentaar te lewer

MELD AAN

Advertensie