'Slim' Proteas se triomf maak Boucher trots
Die reekssege teen die wêreldtitelhouer in sy eie agterplaas is 'n belowende teken in die opbou na die T20 Wêreldbeker.
Tinus van Staden – As jy 'n sterk span soos die Wes-Indiese Eilande kan klop, selfs al het jy 'n paar spelers wat met hul spelpeil sukkel, dan moet jy iets reg doen.
Só sê Mark Boucher, die Protea-afrigter, nadat sy span die Windies Saterdag in die vyfde en laaste T20-wedstryd met 25 lopies geklop het om die reeks met 3-2 te beklink.
“Baie mense het ons afgeskryf nog voordat ons begin speel het,” sê Boucher.
“Soveel as wat jy met die spelers praat, hulle moet nog steeds uitgaan en goeie vertonings gaan lewer. In die eerste wedstryd het ons nie goed gespeel nie, maar ons het 'n paar goeie lesse geleer, wat ons gehelp het om die volgende twee wedstryde te wen. Ons het toe weer 'n swak vertoning gelewer in die vierde wedstryd, voordat ons vandag weer goed was.
“Daar is baie selfvertroue wat ons hieruit sal put, want die Wes-Indiese Eilande is 'n baie goeie span met 'n klomp kanonkolwers. Dit wys net dat ons enigiemand kan klop.”
Boucher sê die kennis wat die span opgedoen het ná elke wedstryd en dan in die volgende kragmeting toegepas het, was vir hom 'n hoogtepunt. Veral omdat die toestande soortgelyk is as wat hulle in die T20-Wêreldbeker-toernooi in Oktober in die Verenigde Arabiese Emirate en Oman verwag.
“Dit is ander tipe blaaie as dít waaraan ons in Suid-Afrika gewoond is. Jy kan nie net instap en 180, 200 slaan nie. Jy het vaardighede nodig en ons het baie lesse geleer om slimmer te wees.
“Ek het van die begin af gesê ons moet ons ouens kry om slimmer te speel. Ons het dit vandag met die boulwerk gesien. Dit kom uit 'n klomp gesprekke agter geslote deure.”
Die Proteas het tog 'n paar gebreke, soos die onvermoë om groot lopies in die doodsnikke aan te teken, maar Boucher is bly dat hulle juis ten spyte daarvan maniere kon vind om te wen.
'ONS TIPE KRIEKET'
“Ons het slim gespeel. Ons het ons tipe krieket gespeel en die Windies het hul tipe krieket gespeel. Mense vra dalk hoekom teken ons nie meer lopies in die doodsnikke aan nie, maar hierdie Windie-boulers is vaardig.
“Ek dink ons was nou weer vaardig in die middelbeurte met ons draaiers. Almal het ingekoop by die krieket wat ons wou speel.
“Is daar plekke om te verbeter? Absoluut. Dalk kan ons ons spelers terug in vorm kry, sodat ons wedstryde beter kan afsluit.
“Daar is nog 'n paar plekke op die spel. As ons al ons spelers op alle silinders kan laat vuur, het ons 'n idee van hoe ons ideale elftal lyk. Dan sal ons daardie ekstra 15, 20 lopies kry.”
Hy is ook tevrede met Temba Bavuma se kapteinskap.
“Temba was baie goed as kaptein. Dit is moeilik om 'n kaptein te beoordeel as die span kolf, maar in die veld kon jy sien hoe hy te werk gaan. Hy het sy boulers baie goed ingespan.”
Die span sou gister via St. Martin en Parys na Dublin vlieg, waar hulle in kwarantyn sal wees totdat hulle die uitslae van hul Covid-19-toetse terugkry. Hierna sal die span kan begin oefen voordat die eerste van drie eendagwedstryde teen Ierland volgende Sondag in Malahide beslis word.
– Netwerk24
Só sê Mark Boucher, die Protea-afrigter, nadat sy span die Windies Saterdag in die vyfde en laaste T20-wedstryd met 25 lopies geklop het om die reeks met 3-2 te beklink.
“Baie mense het ons afgeskryf nog voordat ons begin speel het,” sê Boucher.
“Soveel as wat jy met die spelers praat, hulle moet nog steeds uitgaan en goeie vertonings gaan lewer. In die eerste wedstryd het ons nie goed gespeel nie, maar ons het 'n paar goeie lesse geleer, wat ons gehelp het om die volgende twee wedstryde te wen. Ons het toe weer 'n swak vertoning gelewer in die vierde wedstryd, voordat ons vandag weer goed was.
“Daar is baie selfvertroue wat ons hieruit sal put, want die Wes-Indiese Eilande is 'n baie goeie span met 'n klomp kanonkolwers. Dit wys net dat ons enigiemand kan klop.”
Boucher sê die kennis wat die span opgedoen het ná elke wedstryd en dan in die volgende kragmeting toegepas het, was vir hom 'n hoogtepunt. Veral omdat die toestande soortgelyk is as wat hulle in die T20-Wêreldbeker-toernooi in Oktober in die Verenigde Arabiese Emirate en Oman verwag.
“Dit is ander tipe blaaie as dít waaraan ons in Suid-Afrika gewoond is. Jy kan nie net instap en 180, 200 slaan nie. Jy het vaardighede nodig en ons het baie lesse geleer om slimmer te wees.
“Ek het van die begin af gesê ons moet ons ouens kry om slimmer te speel. Ons het dit vandag met die boulwerk gesien. Dit kom uit 'n klomp gesprekke agter geslote deure.”
Die Proteas het tog 'n paar gebreke, soos die onvermoë om groot lopies in die doodsnikke aan te teken, maar Boucher is bly dat hulle juis ten spyte daarvan maniere kon vind om te wen.
'ONS TIPE KRIEKET'
“Ons het slim gespeel. Ons het ons tipe krieket gespeel en die Windies het hul tipe krieket gespeel. Mense vra dalk hoekom teken ons nie meer lopies in die doodsnikke aan nie, maar hierdie Windie-boulers is vaardig.
“Ek dink ons was nou weer vaardig in die middelbeurte met ons draaiers. Almal het ingekoop by die krieket wat ons wou speel.
“Is daar plekke om te verbeter? Absoluut. Dalk kan ons ons spelers terug in vorm kry, sodat ons wedstryde beter kan afsluit.
“Daar is nog 'n paar plekke op die spel. As ons al ons spelers op alle silinders kan laat vuur, het ons 'n idee van hoe ons ideale elftal lyk. Dan sal ons daardie ekstra 15, 20 lopies kry.”
Hy is ook tevrede met Temba Bavuma se kapteinskap.
“Temba was baie goed as kaptein. Dit is moeilik om 'n kaptein te beoordeel as die span kolf, maar in die veld kon jy sien hoe hy te werk gaan. Hy het sy boulers baie goed ingespan.”
Die span sou gister via St. Martin en Parys na Dublin vlieg, waar hulle in kwarantyn sal wees totdat hulle die uitslae van hul Covid-19-toetse terugkry. Hierna sal die span kan begin oefen voordat die eerste van drie eendagwedstryde teen Ierland volgende Sondag in Malahide beslis word.
– Netwerk24
Kommentaar
Republikein
Geen kommentaar is op hierdie artikel gelaat nie