SME Bank: ‘Geldversender’ in kollig

Catherine Sasman – Me. Kalandra Viljoen, ‘n voormalige eienaar van Asset Movement Financial Services CC (AMFS), ‘n maatskappy wat ‘n yslike N$78.9 miljoen glo uit die SME Bank laat verdwyn het, het voor ‘n ondersoek na staatskaping in Suid-Afrika getuig oor ander geld wat daar gewas is.Die voormalige model het voor die kommissie van ondersoek onder voorsitterskap van regter Raymond Zondo Maandag getuig oor die N$9 miljoen wat sy in 2015 aan die Johannesburgse sakeman mnr. George Markides laat aflewer het. Die Zondo-kommissie het vasgestel die N$9 miljoen was afkomstig van ‘n maatskappy, Koreneka Trading and Investments, en nie van een van Markides se besighede soos Viljoen gesê het sy gedink het nie. Koreneka is na bewering gestig om die staatsbeheerde lugredery South African Express en die Noordwes-regering in Suid-Afrika te plunder. Tydens die Zondo-ondersoek het Viljoen haar maatskappy beskryf as ‘n transitobesigheid of ‘n “geldversender” soos beskryf in Suid-Afrika se Finansiële Intelligensiewet (FICA).SME BankIn Namibië het die likwidateurs van die SME Bank, mnre. David Bruni en Ian McLaren, vasgestel Viljoen se AMFS het N$64 miljoen in harde kontant by Markides afgelewer wat dit weer op sy beurt die kontant aan verskeie ontvangers oorhandig het. Die likwidateurs het ook vasgestel twee maatskappye, Crown Finance Corporation en Heritage Investments wat besit word deur mnr. Enock Kamushinda, ‘n voormalige nie-uitvoerende direkteur van die SME Bank, het deur direkte elektroniese oordragte N$2,8 miljoen en N$2,27 miljoen elk van AMFS ontvang. Nog ‘n transito-maatskappy, Rustic Stone 10 CC, ‘n maatskappy waarvoor Viljoen vir sowat twee jaar gewerk het voordat sy AMFS begin het, het ook N$492 285 vir “professionele dienste” as ‘n “belegging” aan Mamepe Capital Asset Managers ontvang, ‘n maatskappy wat N$30 miljoen van die SME Bank se gesteelde geld ontvang het. Dit is aanvanklik beweer Mamepe Nominees (‘n entiteit wat nie wetlik bestaan nie) het N$150 miljoen van die SME Bank ontvang wat dit na bewering in die berugte VBS Mutual Bank in Suid-Afrika belê het.ZONDOIn die Zondo-ondersoek het Viljoen die sluier gelig oor hoe haar transitomaatskappy bedryf is. Op ‘n vraag om ‘n beskrywing van AMFS se werksaamhede te gee, het sy gesê “sou ‘n besigheid geld nodig hê, het ons die geld vir hulle afgelewer”.Viljoen het AMFS vir twee jaar en tien maande bedryf voordat dit in Maart 2018 gelikwideer is. Sy het in die tyd fluks sake gedoen en gesê meer as N$500 miljoen het ten minste in ‘n jaar van die maatskappy se bestaan deur die besigheid beweeg.Viljoen het gesê haar kliënte sou gewoonlik geld elektronies versoek omdat sy “hul eie geld in kontant teruggegee het”.Die kliënt sou die geld wat aangevra is, in AMFS se bankrekening betaal. Sodra die geld aan AMFS oorbetaal is, is dit in die bankrekening van nog ‘n maatskappy, SBV Service (Pty) Ltd, inbetaal. SBV Services sou dan die geld onttrek, dikwels miljoene op ‘n slag, dit in deursigtige sakke verpak en AMFS sou dit in dié sakke aan kliënte oorhandig. “Teen die einde van 2017 sou ek tot ‘n honderd oproepe per dag ontvang; my telefoon het nooit ophou lui nie. Sake was goed, dit was besig,” het Viljoen getuig. Volgens haar sou sy 3%-kommissie per transaksie kry. Wat volgens haar AMFS ‘n mededingende voordeel oor ander transitomaatskappye gegee het, was dat dit ongemerkte motors gebruik het om die kontant af te lewer, dit goedkoper was en dit aflewering op dieselfde dag gebied het. Viljoen sê navrae deur die SME Bank-likwidateurs het verband gehou met transaksies wat deur Markides uitgevoer is en wie die alleeneienaar was wat handel gedryf het onder twee van sy besighede, Dedrego of ITH. Volgens haar was sy onder die indruk dat Markides se besigheid ‘n handelshuis was wat goedere in Suid-Afrika koop en na die res van Afrika uitvoer. Op ‘n vraag of sy ooit navraag gedoen het oor die bron van die miljoen wat Markides haar gevra het om in kontant af te lewer, het Viljoen gesê “ek het gedink die geld kom van hulle, van Markides en sy entiteite”.Viljoen sê omdat die kliënt se geld in haar bankrekening betaal is, het sy aanvaar die betrokke banke het die verantwoordelikheid om uit te vind waar die geld vandaan kom.“Dit is duidelik wat gebeur het met mnr. Markides se gevalle. As ek net na die SME Bank-geval kyk, kan ek die afleiding maak dat die geld eintlik nooit vir sy besigheid gegaan het nie en na iemand anders,” het Viljoen gesê. Markides het dan die geld aan ‘n derde party beskikbaar gestel.

SME Bank: ‘Geldversender’ in kollig

Kommentaar

Republikein 2025-04-16

Meld asseblief aan om kommentaar te lewer

SME Bank: ‘Geldversender’ in kollig

Kommentaar

Republikein 2025-04-16

Meld asseblief aan om kommentaar te lewer

MELD AAN

Advertensie