SMS'e vir 16 Desember 2019

Wat ’n tragedie! Baba onthoof gedurende normale geboorte! Is dit veilig om in staatshospitale geboorte te skenk? Ek sal vir my toekomstige agterkleinkinders vroedvrouens aanstel. Geen getange, suigapparate en die gemoderniseerde goed nie. Die dokter word geskors, maar die moeder sit met sielkundige letsels. Wie herstel goed? Sekerlik nie die moeder nie. Die dokter word net oor die vingers getik. Ons as die gemeenskap wil sien dat hierdie dokter tronk toe gaan.

Wat ’n gevoellose houding van ’n kamtige dokter. Waar het hy graad gevang? ’n Baba die lewe ontneem deur onbevoegtheid.

Sal die nuut herverkose dorpsraad van Rehoboth tog asseblief vir ons die beloofde gratis erwe van die Rukoro verslag laat kry. Ons wil nie self vat nie. Maak dit ’n prioriteit, asseblief.

Ag asseblief, Bernardus Swartbooi. Jy weet jy praat snert as jy beweer die Indiërs het met die verkiesing gepeuter. Daar is geen manier op hierdie aarde dat dit menslik moontlik is nie. Vat jou kammakastige bewyse hof toe, sodat die wêreld vir jou kan lag soos hulle binnekort vir Itula gaan lag.

Kan ons die nommer van Charles Sawyers kry wat hawelose mense help.

Dinge kom nou van self na vore. Hoeveel van die dokter se soort is nog daar? Dit is hoe dit in Namibië gaan. Dit vrot van kansvatters en in onderwys gaan dit net so, sukkelende leraars, onbevoegd sonder kwalifikasies. Etseti en tai! Dies met ware grade op straat. President, hulle ly onder u naam as gevolg daarvan. Dit is regtig erg. Ai je!

Hoe kry die Swapo-gelowiges se Facebook Warriors dit reg om regeringslui wat die land binne 29 jaar die afgrond in bestuur het, menige se lewe en gemeenskappe se voortbestaan gekelder het (Fishrot) God se seën toe te wens? Volgens die skrif is die loon van sonde die dood. Steel ook, maar lyk my antie Swapolina se kinders is op ’n dwaalweg. ’n Kennis van my sê weer tong in die kies die duiwel sorg vir sy kinders. Ons almal is nie engeltjies nie, maar blinde lojaliteit, stompsinnigheid en om andersdenkendes met argwaan te bejeen is ongevraag. Aai! Die Swapo-blindes outere vir viskwotas. LOL.

Moet asseblief onder geen omstandighede enige inligting van jou verskaf as iemand bel en sê hulle is besig in die bank met opgraderings nie. Dit is ’n paar minute dan word daar geld uit jou rekening onttrek!

Ek sê maar net. Een mens werk by verskillende, twee tot drie plekkies. Is dit reg? Almal wat met skelmstreke besig is, bedank nou, want dinge word warm. Mense met ware kwalifikasies wat geswoeg het, kry swaar. Dit is net onregverdig.

Ons Namibiese boere, tog en met groot asseblief! Sit tog silwer oorplaatjies op bok en skaap. Brand die kalwers en sit ook plaatjies aan.

Kan julle joernaliste nie uitvind wat is die regte toedrag van sake rondom die uitreiking van paspoorte by binnelandse sake wat betref tyd en beskikbaarheid van paspoortboekies nie.

Ek kuier nou al twee weke in Windhoek. Dit was vir my opvallend dat die Namibiërs in ’n jaar, 2018 tot 2019, baie onvriendeliker geword het, maar vanoggend in Maerua Spar by die vleisdeli help Helena my met my bestelling. Haar vriendelikheid en kennis oor haar werk is uitstaande. Wel gedaan, Helena. Die res van Namibië kan by jou kom leer.

Ek wonder of ons nie hierdie week hernude borgaansoeke deur die sogenaamde Vrotvis-6 sal sien nie? Ek weet darem nie of hulle regtig oor Kersfees en Nuwejaar in die tjoekie gaan bly nie? Is ander bereid om te wed hierop? Of voel hulle dalk regtig veiliger agter die tralies as buite? Kroonwild . . .