Stormloop vir veemiddel
Namibiërs probeer naarstiglik die nuwe “wondermiddel” teen Covid-19 in die hande kry, al is dit net vir dieregebruik goedgekeur.
Ronelle Rademeyer – Aanduidings dat ivermektien, ’n aktiewe bestanddeel in anti-parasitiese veemedisyne, suksesvol in die voorkoming en behandeling van Covid-19 gebruik word, lei tans tot ’n stormloop by Swavet, die groothandelaar vir veterinêre middels in Windhoek.
Mnr. Goi Geurtse, bestuurder van Swavet, sê hulle word sedert Maandag oorval deur mense wat middels soek waarin dié aktiewe bestanddeel voorkom. “Mense sê reguit dit is dié wondermiddel en hulle wil dit drink,” vertel Geurtse.
Hy sê ’n styging in navrae en aankope is al kort ná Kersfees opgemerk, maar het Maandag skerp begin toeneem.
“Dit is ’n moeilike situasie. Ons verduidelik vir mense ons verkoop dieremedisyne en hierdie middel is nie vir menslike gebruik goedgekeur nie.
“Nou kom mense en sê hulle soek dit vir hul beeste, maar ons kan sommer sien hulle is nie plaasboere nie."
Geurtse sê hulle ontvang ook vele oproepe van dokters en aptekers wat oor die beskikbaarheid van die middel navraag doen. Verder het bestellings deur kleinhandelaars ook toegeneem. “Ons het byna nie meer voorraad oor nie.”
Swavet lewer veterinêre medikasie aan dierehospitale, veeartse en agrihandelaars.
Ivermektien, wat in sommige lande vir menslike gebruik geregistreer is, is in Namibië en Suid-Afrika net as dieremedikasie beskikbaar.
In dié lande waar dit wel vir menslike gebruik geregistreer is, word dit deur dokters gebruik om Covid-19-pasiënte te behandel.
Dr. Willie Bruwer, longspesialis in Windhoek wat die afgelope maande talle Covid-19-pasiënte behandel het, sê ’n paar studies is al oor die doeltreffendheid van ivermektien gedoen, “maar dit was nie goeie studies nie”.
“Dit werk in ’n laboratorium teen die virus, maar in die mens moet ’n baie hoë dosering gebruik word en die veiligheid daarvan is nie duidelik nie.
“Ons weet nie of laer dosisse, wat veiliger is vir mense, doeltreffend is nie,” sê Bruwer.
Hy sê hy raai mense aan om dit nie te gebruik nie. “Daar is baie mense wat dit by veeartse gekry het en navraag doen daaroor, maar my raad is om weg te bly daarvan. Ons weet nie wat die newe-effekte gaan wees nie.”
Die Wêreldgesondheidsorganisasie (WGO) beveel nie die gebruik van ivermektien vir die voorkoming of behandeling van Covid-19 aan nie.
Die Suid-Afrikaanse Beheerraad vir Gesondheidsprodukte (Sahpra), het egter Woensdag aangekondig hy sal aansoeke vir die goedkeuring van ivermektien vir menslike gebruik toelaat.
Sahpra sê in ’n verklaring aansoeke om die middel vir die voorkoming en behandeling van Covid-19 te registreer, of aansoeke om kliniese proewe te laat doen, sal geprioritiseer word.
Dié raad sê heelwat laboratoriumtoetse dui daarop ivermektien onderdruk die vermeerdering van die coronavirus.
– [email protected]
Mnr. Goi Geurtse, bestuurder van Swavet, sê hulle word sedert Maandag oorval deur mense wat middels soek waarin dié aktiewe bestanddeel voorkom. “Mense sê reguit dit is dié wondermiddel en hulle wil dit drink,” vertel Geurtse.
Hy sê ’n styging in navrae en aankope is al kort ná Kersfees opgemerk, maar het Maandag skerp begin toeneem.
“Dit is ’n moeilike situasie. Ons verduidelik vir mense ons verkoop dieremedisyne en hierdie middel is nie vir menslike gebruik goedgekeur nie.
“Nou kom mense en sê hulle soek dit vir hul beeste, maar ons kan sommer sien hulle is nie plaasboere nie."
Geurtse sê hulle ontvang ook vele oproepe van dokters en aptekers wat oor die beskikbaarheid van die middel navraag doen. Verder het bestellings deur kleinhandelaars ook toegeneem. “Ons het byna nie meer voorraad oor nie.”
Swavet lewer veterinêre medikasie aan dierehospitale, veeartse en agrihandelaars.
Ivermektien, wat in sommige lande vir menslike gebruik geregistreer is, is in Namibië en Suid-Afrika net as dieremedikasie beskikbaar.
In dié lande waar dit wel vir menslike gebruik geregistreer is, word dit deur dokters gebruik om Covid-19-pasiënte te behandel.
Dr. Willie Bruwer, longspesialis in Windhoek wat die afgelope maande talle Covid-19-pasiënte behandel het, sê ’n paar studies is al oor die doeltreffendheid van ivermektien gedoen, “maar dit was nie goeie studies nie”.
“Dit werk in ’n laboratorium teen die virus, maar in die mens moet ’n baie hoë dosering gebruik word en die veiligheid daarvan is nie duidelik nie.
“Ons weet nie of laer dosisse, wat veiliger is vir mense, doeltreffend is nie,” sê Bruwer.
Hy sê hy raai mense aan om dit nie te gebruik nie. “Daar is baie mense wat dit by veeartse gekry het en navraag doen daaroor, maar my raad is om weg te bly daarvan. Ons weet nie wat die newe-effekte gaan wees nie.”
Die Wêreldgesondheidsorganisasie (WGO) beveel nie die gebruik van ivermektien vir die voorkoming of behandeling van Covid-19 aan nie.
Die Suid-Afrikaanse Beheerraad vir Gesondheidsprodukte (Sahpra), het egter Woensdag aangekondig hy sal aansoeke vir die goedkeuring van ivermektien vir menslike gebruik toelaat.
Sahpra sê in ’n verklaring aansoeke om die middel vir die voorkoming en behandeling van Covid-19 te registreer, of aansoeke om kliniese proewe te laat doen, sal geprioritiseer word.
Dié raad sê heelwat laboratoriumtoetse dui daarop ivermektien onderdruk die vermeerdering van die coronavirus.
– [email protected]
Kommentaar
Republikein
Geen kommentaar is op hierdie artikel gelaat nie