Superrugby sê ja vir Suidsee-eilande se spanne

Nieu-Seeland Rugby (NZR) het Woensdag lisensies uitgereik vir twee Suidsee-eilande se spanne om volgende jaar in die Superrugbyreeks mee te ding.
Stuff berig die twee spanne – Fidji Drua en Moana Pasifika – se geldsake moet nog goedgekeur word voordat hulle mag deelneem, maar Wêreldrugby het in Maart gesê hy sal hulle finansieel bystaan.
Na raming is daar oor die wêreld heen 20% elite-rugbyspelers met Suidsee-eilande-erfenis, maar die topspelers word byna altyd weggelok omdat die streek ’n kompetisie vir beroepspanne skort.
Die doel is dat Fidji Drua en Moana Pasifika daardie gaping vul en dat Fidji, Tonga en Samoa voordeel sal trek uit hul ryk rugbytradisie.
Hul insluiting in Superrugby volgende jaar beteken die 2022-seisoen sal uit 12 spanne bestaan – vyf van Nieu-Seeland, vyf van Australië en twee van die Suidsee-eilande.
Die Nieu-Seelanders het dit egter duidelik gemaak dat enige span van die Suidsee-eilande bemarkbaar moet wees en behoorlik bestuur word.
“Ons is vol vertroue dat Fidji Drua en Moana Pasifika aan die voorwaardes van die lisensie sal voldoen, wat die goedkeuring van ’n volhoubare sakeplan teen 30 Junie insluit,” sê Mark Robinson, die NZR se uitvoerende hoof.
Wêreldrugby ondersteun Fidji, Tonga en Samoa se rugbyunies met ’n gesamentlike £3,2 miljoen oor drie jaar. Die beheerliggaam sal ook kundiges verskaf wat administratiewe sake en hoëprestasie betref.
Die Fidji Drua sal in Suva gesetel wees en Moana Pasifika in Nieu-Seeland, waarskynlik Auckland, met die fokus om spelers van Samoa en Tonga te lok.
– Netwerk24


FOTO
Daar word gehoop om meer Suidsee-eiland-spelers van wêreldgehalte, soos die Bristol Bears se Fidjiaanse superster Semi Radradra, vir plaaslike Superrugbyspanne te lok. Foto Getty Images