Teko-trio se verhoor begin oor
Die bedrogverhoor van die sogenaamde Teko-trio, wat voortspruit uit die aankoop van X-straal-skandeerders ter waarde van US$55,3 miljoen vir lughawens en grensposte sowat 'n dekade gelede, het vandeesweek van voor af begin.
Die twee Namibiërs en hul Chinese sakevennoot, me. Teckla Lameck (57) en mnre. Kongo Mokaxwa (39) en Yang Fan (47), het Maandag opnuut skuld op die klagte teen hulle ontken toe die verhoor voor regter Christie Liebenberg in die hoërhof in Windhoek afgeskop het.
Die hooggeregshof het in Julie verlede jaar 'n appèl toegestaan in die guns van die beskuldigdes en gelas dat regter Maphios Cheda aan die verhoor onttrek word.
Dit het beteken dié omstrede verhoor, wat in 2013 voor hom begin het en waarin die staat reeds die getuienis van 20 getuies gelei het, moes van voor af voor 'n ander regter begin.
Die 18 klagte van onder meer bedrog teen die trio spruit uit 'n transaksie waarin die ministerie van finansies X-straal-skandeerders ter waarde van US$55,3 miljoen vir lughawens en grensposte van 'n Chinese maatskappy, Nuctech (verteenwoordig deur Yang), aangekoop het.
Die staat beweer die prys van die skandeerders is verhoog om 'n “kommissie” van nagenoeg US$12,8 aan Teko Trading BK te betaal, 'n beslote korporasie wat aan Lameck, 'n voormalige lid van die Staatsdienskommissie en haar vennoot, Mokaxwa, behoort. Dít het in 2009 plaasgevind.
Lameck en Mokaxwa word ook daarvan beskuldig dat hulle die maatskappy Namib Contract Haulage, waar beide Mokaxwa en Lameck in diens was, bedrieg het deur die prys van vragmotors en busse wat van China af ingevoer is, te verhoog. Dié transaksie is in 2007 beklink.
Die staat voer verder aan Lameck het nie die staatshoof (pres. Hifikepunye Pohamba) se toestemming gehad om ander besoldigde werk te doen terwyl sy 'n kommissaris van die Staatsdienskommissie was nie, en dat sy haarself aan die oortreding van die teenkorrupsiewet skuldig gemaak het.
Regter Cheda het 20 staatsgetuies aangehoor (na verwagting sal sowat 80 getuies namens die staat getuig) toe die beskuldigdes se regsverteenwoordigers beswaar gemaak het teen bankrekords wat as bewyse verkry is. Dit is bekom nadat dagvaardings deur die direkteur-generaal van die Teenkorrupsiekommissie, mnr. Paulus Noa, uitgereik is. Volgens die verdediging was die inhoud van die dagvaardings “onverstaanbaar, ongeldig en onwettig”.
MOONTLIK BEVOOROORDEELD
Regter Cheda het die beswaar van die hand gewys in 'n beslissing in Junie 2014.
Die verdediging se regsverteenwoordigers het toe aansoek gedoen daarvoor dat hy homself moet verskoon, weens kommer dat hy moontlik bevooroordeeld mag wees. Hy het dit ook afgewys.
Lameck staan op al 18 die klagte tereg, terwyl Mokaxwa op 12 van die klagte verhoor word. Yang staan op ses klagte tereg.
Adv. Gerson Hinda en mnr. Sisa Namandje verteenwoordig die beskuldigdes, terwyl mnr. Dominic Lisulo, adjunk-aanklaer-generaal, en me. Constance Moyo, namens die staat optree.
- Eie berig en Nampa
Die twee Namibiërs en hul Chinese sakevennoot, me. Teckla Lameck (57) en mnre. Kongo Mokaxwa (39) en Yang Fan (47), het Maandag opnuut skuld op die klagte teen hulle ontken toe die verhoor voor regter Christie Liebenberg in die hoërhof in Windhoek afgeskop het.
Die hooggeregshof het in Julie verlede jaar 'n appèl toegestaan in die guns van die beskuldigdes en gelas dat regter Maphios Cheda aan die verhoor onttrek word.
Dit het beteken dié omstrede verhoor, wat in 2013 voor hom begin het en waarin die staat reeds die getuienis van 20 getuies gelei het, moes van voor af voor 'n ander regter begin.
Die 18 klagte van onder meer bedrog teen die trio spruit uit 'n transaksie waarin die ministerie van finansies X-straal-skandeerders ter waarde van US$55,3 miljoen vir lughawens en grensposte van 'n Chinese maatskappy, Nuctech (verteenwoordig deur Yang), aangekoop het.
Die staat beweer die prys van die skandeerders is verhoog om 'n “kommissie” van nagenoeg US$12,8 aan Teko Trading BK te betaal, 'n beslote korporasie wat aan Lameck, 'n voormalige lid van die Staatsdienskommissie en haar vennoot, Mokaxwa, behoort. Dít het in 2009 plaasgevind.
Lameck en Mokaxwa word ook daarvan beskuldig dat hulle die maatskappy Namib Contract Haulage, waar beide Mokaxwa en Lameck in diens was, bedrieg het deur die prys van vragmotors en busse wat van China af ingevoer is, te verhoog. Dié transaksie is in 2007 beklink.
Die staat voer verder aan Lameck het nie die staatshoof (pres. Hifikepunye Pohamba) se toestemming gehad om ander besoldigde werk te doen terwyl sy 'n kommissaris van die Staatsdienskommissie was nie, en dat sy haarself aan die oortreding van die teenkorrupsiewet skuldig gemaak het.
Regter Cheda het 20 staatsgetuies aangehoor (na verwagting sal sowat 80 getuies namens die staat getuig) toe die beskuldigdes se regsverteenwoordigers beswaar gemaak het teen bankrekords wat as bewyse verkry is. Dit is bekom nadat dagvaardings deur die direkteur-generaal van die Teenkorrupsiekommissie, mnr. Paulus Noa, uitgereik is. Volgens die verdediging was die inhoud van die dagvaardings “onverstaanbaar, ongeldig en onwettig”.
MOONTLIK BEVOOROORDEELD
Regter Cheda het die beswaar van die hand gewys in 'n beslissing in Junie 2014.
Die verdediging se regsverteenwoordigers het toe aansoek gedoen daarvoor dat hy homself moet verskoon, weens kommer dat hy moontlik bevooroordeeld mag wees. Hy het dit ook afgewys.
Lameck staan op al 18 die klagte tereg, terwyl Mokaxwa op 12 van die klagte verhoor word. Yang staan op ses klagte tereg.
Adv. Gerson Hinda en mnr. Sisa Namandje verteenwoordig die beskuldigdes, terwyl mnr. Dominic Lisulo, adjunk-aanklaer-generaal, en me. Constance Moyo, namens die staat optree.
- Eie berig en Nampa
Kommentaar
Republikein
Geen kommentaar is op hierdie artikel gelaat nie