Tiener in hof ná grumoord op meisie

Ronelle Rademeyer



'n Vyftienjarige seun het Vrydag vlugtig in die landdroshof op Otjiwarongo op 'n klag van moord verskyn nadat hy na bewering Woensdagnag sy meisie in die bosse agter die Junior Sekondêre Skool Karundu op dié dorp vermoor het.

Ao. Maureen Mbeha, polisiewoordvoerder vir die Otjozondjupastreek, het gister aan Republikein gesê die seun is in die sorg van sy ouers vrygelaat. Hy moet weer op 31 Oktober in die hof verskyn.

Hy het Woensdagnag omstreeks elfuur glo vir Natasha Somses, met wie hy in 'n verhouding was, wreed vermoor met klippe en 'n skerp voorwerp. Sy was in graad 9 en 'n leerling aan dié skool.

Mbeha sê Somses se liggaam is kort daarna deur 'n verbyganger ontdek en die polisie is ontbied.

Die seun, wat 'n ander skool op Otjiwarongo bywoon, se naam word nie bekend gemaak nie aangesien hy minderjarig is.

Volgens Mbeha is die twee jongmense se ouerhuise ver van waar die voorval plaasgevind het. Sy sê dit is nie bekend wat die twee tieners daardie tyd van die aand so ver van hul huise af gedoen het nie. “Ouers moet seker maak hul minderjarige kinders is nie saans laat op straat nie,” sê sy.

Die polisie se voorlopige ondersoek toon Somses is na bewering gestenig en ook verskeie kere met 'n skerp voorwerp gesteek, sê Mbeha.