Toelaatbaarheid van bewyse onder die loep
Elf jaar ná die moord op die 25-jarige André Heckmair kan belangrike bewyse moontlik vir die voortslepende verhoor uitgegooi word.
Heckmair-moordverhoor
Kristien Kruger – Die verhoor waarin twee Amerikaners vir die moord op mnr. André Heckmair tereg staan, het gister in die hoërhof in Windhoek hervat en bevind hom nou midde-in ’n binneverhoor om te beslis oor die toelaatbaarheid van bewyse wat die polisie sonder ’n visenteringslasbrief bekom het.
Heckmair is op 7 Januarie 2011 in Eros met een koeël in sy kop doodgeskiet terwyl hy in sy motor gesit het.
Die staat het adj.komm. Barthlomeus de Klerk as getuie geroep. De Klerk het getuig dat die polisie op 9 Januarie ’n boodskap ontvang het van die gastehuis waar die beskuldigdes tydens die voorval gebly het. Die polisie is versoek om die beskuldigdes se goedere uit die kamer te verwyder omdat die gastehuis die kamer vir ander gaste beskikbaar wou stel.
Die kamer was reeds op 7 Januarie, toe die beskuldigdes in hegtenis geneem is, die eerste keer deursoek. Dieselfde beamptes was die volgende dag weer daar.
“In die kas was ’n bruin aktetas en binne-in was twee ysterpype. Ek het toe nader ondersoek ingestel en besef dis ’n vuurwapenloop,” het De Klerk getuig.
Volgens sy getuienis het hy besef die vorige soektogte is nie deeglik uitgevoer nie en opdrag is gegee dat die kamer opnuut deursoek moes word. Hy het nie ’n visenteringslasbrief by ’n landdros gekry nie.
“Ek was oortuig ’n landdros sou ’n visenteringslasbrief uitreik, maar dit was ’n Sondag en ek het geweet dit sou moeilik wees om ’n landdros in die hande te kry.
“Ek was bang as ons nie die bewyse vat nie, sou dit verdwyn of in die verkeerde hande beland,” het hy getuig.
Die beskuldigdes was in daardie stadium reeds in aanhouding op aanklag van die besit van dagga en was slegs verdagtes in dié ondersoek.
Een van die Amerikaanse beskuldigdes, mnr. Kevan Townsend, se verteenwoordiger, mnr. Mbanga Siyomuinji, beweer dat De Klerk nooit gegaan het met die bedoeling om die twee se besittings te gaan haal nie, maar eenvoudig om die kamer te deursoek.
“Jy het die aktetas gekry en jy het dit oopgemaak. Dit op sigself is ’n soektog. Jy het reeds inbreuk gemaak op iemand se privaatheid,” het Siyomuinji aan die getuie gestel.
Hy het ook daarin geslaag om De Klerk te laat bevestig dat hy nooit eens ’n landdros in die hande probeer kry het nie.
VISENTERINGSLASBRIEF
Vir die eerste soektog, op 7 Januarie, was ook geen visenteringslasbrief verkry nie en die rede daarvoor was volgens vorige getuies dat dit ’n dringende saak was omdat hulle lugtig was dat Townsend en sy medebeskuldigde Marcus Thomas sou vlug.
Buiten vir selfoonrekords wat die beskuldigdes en die oorledene verbind, was daar volgens die verdediging geen konkrete bewyse van die beskuldigdes se betrokkenheid by die moord nie.
“Daar was tonne omstandigheidsgetuienis,” het De Klerk die hof verseker.
Volgens De Klerk het selfoonrekords aangedui die laaste kommunikasie tussen die beskuldigdes en Heckmair was om 11:54. Die nadoodse ondersoek dui daarop dat hy tussen 13:00 en 14:00 dood is.
Volgens die rekords het die beskuldigdes nie weer ná Heckmair se dood ’n boodskap gestuur nie. Alle kommunikasie tussen hulle is gestaak.
Die saak hervat vandag met die kruisondervraging van De Klerk.
– [email protected]
FOTO’s Kristien Kruger
Die moordbeskuldigde mnr. Kevan Townsend en sy regsverteenwoordiger, mnr. Mbanga Siyomuinji.
Die moordbeskuldigde mnr. Marcus Thomas.
Kristien Kruger – Die verhoor waarin twee Amerikaners vir die moord op mnr. André Heckmair tereg staan, het gister in die hoërhof in Windhoek hervat en bevind hom nou midde-in ’n binneverhoor om te beslis oor die toelaatbaarheid van bewyse wat die polisie sonder ’n visenteringslasbrief bekom het.
Heckmair is op 7 Januarie 2011 in Eros met een koeël in sy kop doodgeskiet terwyl hy in sy motor gesit het.
Die staat het adj.komm. Barthlomeus de Klerk as getuie geroep. De Klerk het getuig dat die polisie op 9 Januarie ’n boodskap ontvang het van die gastehuis waar die beskuldigdes tydens die voorval gebly het. Die polisie is versoek om die beskuldigdes se goedere uit die kamer te verwyder omdat die gastehuis die kamer vir ander gaste beskikbaar wou stel.
Die kamer was reeds op 7 Januarie, toe die beskuldigdes in hegtenis geneem is, die eerste keer deursoek. Dieselfde beamptes was die volgende dag weer daar.
“In die kas was ’n bruin aktetas en binne-in was twee ysterpype. Ek het toe nader ondersoek ingestel en besef dis ’n vuurwapenloop,” het De Klerk getuig.
Volgens sy getuienis het hy besef die vorige soektogte is nie deeglik uitgevoer nie en opdrag is gegee dat die kamer opnuut deursoek moes word. Hy het nie ’n visenteringslasbrief by ’n landdros gekry nie.
“Ek was oortuig ’n landdros sou ’n visenteringslasbrief uitreik, maar dit was ’n Sondag en ek het geweet dit sou moeilik wees om ’n landdros in die hande te kry.
“Ek was bang as ons nie die bewyse vat nie, sou dit verdwyn of in die verkeerde hande beland,” het hy getuig.
Die beskuldigdes was in daardie stadium reeds in aanhouding op aanklag van die besit van dagga en was slegs verdagtes in dié ondersoek.
Een van die Amerikaanse beskuldigdes, mnr. Kevan Townsend, se verteenwoordiger, mnr. Mbanga Siyomuinji, beweer dat De Klerk nooit gegaan het met die bedoeling om die twee se besittings te gaan haal nie, maar eenvoudig om die kamer te deursoek.
“Jy het die aktetas gekry en jy het dit oopgemaak. Dit op sigself is ’n soektog. Jy het reeds inbreuk gemaak op iemand se privaatheid,” het Siyomuinji aan die getuie gestel.
Hy het ook daarin geslaag om De Klerk te laat bevestig dat hy nooit eens ’n landdros in die hande probeer kry het nie.
VISENTERINGSLASBRIEF
Vir die eerste soektog, op 7 Januarie, was ook geen visenteringslasbrief verkry nie en die rede daarvoor was volgens vorige getuies dat dit ’n dringende saak was omdat hulle lugtig was dat Townsend en sy medebeskuldigde Marcus Thomas sou vlug.
Buiten vir selfoonrekords wat die beskuldigdes en die oorledene verbind, was daar volgens die verdediging geen konkrete bewyse van die beskuldigdes se betrokkenheid by die moord nie.
“Daar was tonne omstandigheidsgetuienis,” het De Klerk die hof verseker.
Volgens De Klerk het selfoonrekords aangedui die laaste kommunikasie tussen die beskuldigdes en Heckmair was om 11:54. Die nadoodse ondersoek dui daarop dat hy tussen 13:00 en 14:00 dood is.
Volgens die rekords het die beskuldigdes nie weer ná Heckmair se dood ’n boodskap gestuur nie. Alle kommunikasie tussen hulle is gestaak.
Die saak hervat vandag met die kruisondervraging van De Klerk.
– [email protected]
FOTO’s Kristien Kruger
Die moordbeskuldigde mnr. Kevan Townsend en sy regsverteenwoordiger, mnr. Mbanga Siyomuinji.
Die moordbeskuldigde mnr. Marcus Thomas.
Kommentaar
Republikein
Geen kommentaar is op hierdie artikel gelaat nie