‘Toerisme moet herleef, herstel en versterk’
Francoise Steynberg
Die ongekende uitdagings wat Covid-19 gebring het, het die wêreldwye toerismesektor verwoes en Namibië is nie gespaar nie, het die minister van die omgewing, bosbou en toerisme, mnr. Pohamba Shifeta, gesê.
“Dit wat ons in toerismesektor in die afgelope 30 jaar opgebou het, het in net meer as vier maande verlore gegaan,” het Shifeta gister tydens die bekendstelling van die 2019-verslag van toerismestatistieke gesê.
Ondanks ’n styging van 2,5% toeriste en 1,3% meer buitelandse besoekers wat Namibië in 2019 in vergelyking met die vorige jaar besoek het, huiwer die toerismesektor vandag op die afgrond weens die Covid-19-pandemie.
Shifeta sê sy ministerie doen alles in sy vermoë om tydens die skok van die viruspandemie die toerismesektor te laat herleef, herstel en versterk.
“Dit is duidelik dat Covid-19 vir die afsienbare toekoms hier is om te bly. In die konteks van die ‘nuwe normaal’ moet ons die toerismesektor hervestig sonder om openbare gesondheid in die wiele te ry. As toerismeministerie is ons daartoe verbind om alles in ons vermoë te doen om die sektor weer op die been te kry en 120 000 werksgeleenthede te red,” het hy beklemtoon.
Me. Seimy Christoph-Shidute, die adjunk- uitvoerende direkteur van toerisme, beplanning en administrasie, het gesê voor buitelandse toeriste op vliegtuie na Namibië klim, moet alle protokol en regulasies vir die toerisme-herlewingsplan in plek wees.
Volgens haar sou die taakspan gister die protokol en regulasies aan die Namibië Toerismeraad (NTB) stuur.
TOERISMEVERSLAG 2019
Volgens die verslag het 1 681 336 buitelanders Namibië vanaf die toptien-lande besoek, naamlik Angola (35,3%), Suid-Afrika (17,3%), Zambië (14,9%), Duitsland (6,1%), Zimbabwe (4,5%), Botswana (4,2%), Frankryk (1,8%), Brittanje (1,7%), Amerika (1,6%) en China (1,2%).
China het Nederland wat in 2018 in die tiende posisie was, uit die toptien gedruk.
“Markte uit Afrika het met 7,5% gegroei, maar Europese markte het met 16,9% afgeneem,” lui die verslag.
“Die piekseisoen is vanaf September tot Desember wanneer 34,4% van alle toeriste in Namibië kom kuier en die meeste kom om familie en vriende te besoek. Sowat 1,1% minder toeriste het in 2019 kom vakansie hou, van wie Duitsers die meeste vakansiegangers is en Chinese die meeste saketoeriste.”
Toeriste uit Afrika bestee ook net gemiddeld vier tot sewe dae hier, omdat hulle meestal by vriende en familie kom kuier, terwyl Europese en Amerikaanse toeriste tussen agt dae en twee weke lank kom vakansie hou.
Meer mans (60%) as vroue (40%) kom reis in Namibië en die meeste toeriste is tussen 30 en 39 jaar oud.
Die meeste toeriste kom die land per pad binne (54,1%), gevolg deur lugreise (42,8%) wat teenoor 2018 met 24% gestyg het.
Wat grensposte betref, het die meeste toeriste deur die noordelike en noordoostelike grensposte die land binnegekom en 19,9% via die Internasionale Lughawe Hosea Kutako. Die meeste internasionale reisigers van Europa en Noord-Amerika het by Hosea Kutako- en Eros-lughawens geland, hoewel daar ’n afname van toeriste-aankomste in 2019 by dié lughawens was.
- [email protected]
Die ongekende uitdagings wat Covid-19 gebring het, het die wêreldwye toerismesektor verwoes en Namibië is nie gespaar nie, het die minister van die omgewing, bosbou en toerisme, mnr. Pohamba Shifeta, gesê.
“Dit wat ons in toerismesektor in die afgelope 30 jaar opgebou het, het in net meer as vier maande verlore gegaan,” het Shifeta gister tydens die bekendstelling van die 2019-verslag van toerismestatistieke gesê.
Ondanks ’n styging van 2,5% toeriste en 1,3% meer buitelandse besoekers wat Namibië in 2019 in vergelyking met die vorige jaar besoek het, huiwer die toerismesektor vandag op die afgrond weens die Covid-19-pandemie.
Shifeta sê sy ministerie doen alles in sy vermoë om tydens die skok van die viruspandemie die toerismesektor te laat herleef, herstel en versterk.
“Dit is duidelik dat Covid-19 vir die afsienbare toekoms hier is om te bly. In die konteks van die ‘nuwe normaal’ moet ons die toerismesektor hervestig sonder om openbare gesondheid in die wiele te ry. As toerismeministerie is ons daartoe verbind om alles in ons vermoë te doen om die sektor weer op die been te kry en 120 000 werksgeleenthede te red,” het hy beklemtoon.
Me. Seimy Christoph-Shidute, die adjunk- uitvoerende direkteur van toerisme, beplanning en administrasie, het gesê voor buitelandse toeriste op vliegtuie na Namibië klim, moet alle protokol en regulasies vir die toerisme-herlewingsplan in plek wees.
Volgens haar sou die taakspan gister die protokol en regulasies aan die Namibië Toerismeraad (NTB) stuur.
TOERISMEVERSLAG 2019
Volgens die verslag het 1 681 336 buitelanders Namibië vanaf die toptien-lande besoek, naamlik Angola (35,3%), Suid-Afrika (17,3%), Zambië (14,9%), Duitsland (6,1%), Zimbabwe (4,5%), Botswana (4,2%), Frankryk (1,8%), Brittanje (1,7%), Amerika (1,6%) en China (1,2%).
China het Nederland wat in 2018 in die tiende posisie was, uit die toptien gedruk.
“Markte uit Afrika het met 7,5% gegroei, maar Europese markte het met 16,9% afgeneem,” lui die verslag.
“Die piekseisoen is vanaf September tot Desember wanneer 34,4% van alle toeriste in Namibië kom kuier en die meeste kom om familie en vriende te besoek. Sowat 1,1% minder toeriste het in 2019 kom vakansie hou, van wie Duitsers die meeste vakansiegangers is en Chinese die meeste saketoeriste.”
Toeriste uit Afrika bestee ook net gemiddeld vier tot sewe dae hier, omdat hulle meestal by vriende en familie kom kuier, terwyl Europese en Amerikaanse toeriste tussen agt dae en twee weke lank kom vakansie hou.
Meer mans (60%) as vroue (40%) kom reis in Namibië en die meeste toeriste is tussen 30 en 39 jaar oud.
Die meeste toeriste kom die land per pad binne (54,1%), gevolg deur lugreise (42,8%) wat teenoor 2018 met 24% gestyg het.
Wat grensposte betref, het die meeste toeriste deur die noordelike en noordoostelike grensposte die land binnegekom en 19,9% via die Internasionale Lughawe Hosea Kutako. Die meeste internasionale reisigers van Europa en Noord-Amerika het by Hosea Kutako- en Eros-lughawens geland, hoewel daar ’n afname van toeriste-aankomste in 2019 by dié lughawens was.
- [email protected]
Kommentaar
Republikein
Geen kommentaar is op hierdie artikel gelaat nie