Trap-trap tot op Tsumeb

Mariana Balt - Vyftien maande nadat Jean-Baptiste Dodane sy betrekking in Switserland opgegee, sy meubels tot niet gemaak en 'n paar besittings in vier sakke gepak het, is hy baie naby daaraan om sy droom te bereik.
Dié droom was om Suid-Afrika oor land met 'n gewone fiets te bereik. Sy doel met die avontuur was om die lande op sy roete te verken, met verskillende kulture te doen te kry en om sommer net deur die asemrowende natuurskoon te ry. Dit het natuurlik ook vasbyt op onbegaanbare paaie en die probleem om elke dag kos en water te vind, ingesluit, maar hy het reeds tot in Namibië gevorder waar hy onlangs op Tsumeb saam met Dayn en Hannelie Absil by Etosha-kafee 'n blaaskans geneem het.
Die reis het hom eers deur Frankryk, daarna op 'n pont vanaf Spanje tot in Marokko en toe oor die Atlas-gebergtes, deur die Sahara-woestyn en die reënwoude van Gaboen en die Kongo geneem totdat hy 22 750 kilometer en 23 lande later op Tsumeb aangekom het.
Jean-Baptiste reis met die minimum toerusting wat letterlik slegs 'n tent en slaapgoed, 'n paar kledingstukke en toiletware, 'n petrolstofie en spaar onderdele vir sy fiets en 'n paar elektroniese toestelle insluit. Sy selfoon en GPS word met 'n dinamo gelaai en hy slaap waar hy ook al in die veld 'n skuiling vind óf by gasvrye-inwoners van die dorpies waardeur hy reis. Sy reis het hom deur onherbergsame dele geneem wat nie eens deur 4x4s baasgeraak sou kon word nie.
Een van sy grootste uitdagings is om elke dag genoeg vars water op te spoor, want op 'n warm dag drink hy tot soveel as 10 liter, meer as wat hy op sy fiets kan saamdra.
“Die reis is 'n mengsel van vreugde en moeite,” sê hy. “Ek het in sneeu en modder vasgesit, is deur riviere voorgekeer en moes met pynlike bene, voete en boude sien kom klaar. Daarbenewens moes ek soms sukkel om gebreekte toerusting te vervang en ure beplan om iets anders as cassava of spaghetti te ete te kry.”
Hy voel egter dat die ervaring die moeite werd gemaak is deur vriendelike mense, interessante gesprekke, onverwagte gasvryheid en bowenal onvergeetlike natuurskoon. Heelwat foto's hiervan kan op sy webtuiste, http://freewheely.com gesien word.
Namibië bied tans vir hom heelwat “weeldes” in die vorm van goeie paaie en baie winkels, selfs internettoegang sodat hy sy webtuiste kan opdateer, sodat hy uitsien na die res van sy reis.
Hy beplan om Kaapstad binne die volgende twee maande te bereik.