'Trump is 'n amateur – en Poetin Mohammed Ali'
Volgens 'n Amerikaanse koerant het Trump twyfel gesaai oor jarelange aannames oor die Weste se politieke, militêre en handelsvennootskappe.
Llewellyn Prince
Die ontmoeting Maandag tussen pres. Donald Trump van Amerika en pres. Wladimir Poetin van Rusland was die vreemdste en mees ongekende in die geskiedenis van dié twee lande.
Só het twee Suid-Afrikaanse kenners van internasionale politiek Maandag dié geslote vergadering tussen dié twee leiers van die wêreld se twee grootste kernwapenmoondhede in die presidensiële paleis in Helsinki, Finland, beskryf.
Van die invloedrykste Amerikaanse en Britse media-instellings het ná 'n nuuskonferensie wat Trump en Poetin ná hul vergadering met joernaliste gehou het in hul berigte hoofsaaklik gefokus op Trump wat sy eie land se intelligensiedienste “onder die bus” gegooi het om Poetin te verdedig.
Die Amerikaanse intelligensiedienste meen Rusland het ingemeng by die verkiesings in 2016 wat Trump deur 'n kuberkraak- en fopnuus-veldtog teen sy vernaamste teenstaander, Hillary Clinton, gewen het.
Verlede week het die Amerikaanse owerhede 12 Russiese amptenare amptelik daaroor aangekla.
Die BBC het berig dat Trump na Poetin se “baie sterk” ontkenning oor die kwessie geen rede sien waarom Rusland sou ingemeng het nie.
ONTKEN INMENGING
Die Washington Post het berig dat Poetin ook Russiese inmenging ontken het.
Trump het sy land se ondersoek na die beweerde inmenging “as 'n ramp vir ons land” beskryf.
USA Today berig dat Trump se bereidwilligheid om Poetin te glo nie net teenstrydig met Amerikaanse intelligensieagentskappe en wetmakers is nie, maar ook met sy eie nasionale sekuriteitsraadgewer, John Bolton, wat Sondag, nadat hy die klagstaat teen die 12 Russiese amptenare deurgegaan het, gesê het dat dit moeilik is om te glo dat Poetin onbewus was van die verkiesingsinmenging.
Volgens die New York Times het Trump twyfel gesaai oor jarelange aannames oor die Weste se politieke, militêre en handelsvennootskappe.
“Hy het die dag begin deur Amerika, en nie vir Rusland nie, te blameer vir die spanning tussen die twee lande”, het die koerant verder berig.
Prof. Theo Neethling, hoof van die departement van politieke studies en regeerkunde by die Universiteit van die Vrystaat, sê die vergadering volg op Trump se vervreemding van Amerika se tradisionele Westerse bondgenote.
Neethling het gesê wat Poetin betref, is hy tans in 'n baie sterk diplomatieke posisie.
“Oor Poetin moet ook gesê word dat hy, anders as Trump, baie duidelike buitelandse beleidsdoelwitte nastreef en baie berekend is in sy optredes.
POETIN MEER ERVARE
“Daarby is hy baie meer ervare op die diplomatieke terrein as Trump en dit is daarom begryplik dat talle waarnemers in die Westerse wêreld baie skepties kyk na die moontlike positiewe uitkomste wat vir die VSA en die Westerse moondhede uit die gesprekke kan spruit.”
Prof. John Stremlau, kenner van internasionale politiek by die Universiteit van die Witwatersrand se departement van internasionale studies, het die vergadering beskryf as “'n amateurbokser (Trump) teen Mohammed Ali (Poetin)”.
“Poetin het goed voorberei, terwyl Trump dinge opmaak soos hy aangaan – soos ons met die verandering met Amerika se Navo-bondgenote gesien het”.
Volgens Stremlau volg die vergadering te midde van erge bekommernisse in die Weste oor Russiese optrede in die Oekraïne, die Swartsee-skiereiland Krim en die Midde-Ooste.
– Netwerk24
Die ontmoeting Maandag tussen pres. Donald Trump van Amerika en pres. Wladimir Poetin van Rusland was die vreemdste en mees ongekende in die geskiedenis van dié twee lande.
Só het twee Suid-Afrikaanse kenners van internasionale politiek Maandag dié geslote vergadering tussen dié twee leiers van die wêreld se twee grootste kernwapenmoondhede in die presidensiële paleis in Helsinki, Finland, beskryf.
Van die invloedrykste Amerikaanse en Britse media-instellings het ná 'n nuuskonferensie wat Trump en Poetin ná hul vergadering met joernaliste gehou het in hul berigte hoofsaaklik gefokus op Trump wat sy eie land se intelligensiedienste “onder die bus” gegooi het om Poetin te verdedig.
Die Amerikaanse intelligensiedienste meen Rusland het ingemeng by die verkiesings in 2016 wat Trump deur 'n kuberkraak- en fopnuus-veldtog teen sy vernaamste teenstaander, Hillary Clinton, gewen het.
Verlede week het die Amerikaanse owerhede 12 Russiese amptenare amptelik daaroor aangekla.
Die BBC het berig dat Trump na Poetin se “baie sterk” ontkenning oor die kwessie geen rede sien waarom Rusland sou ingemeng het nie.
ONTKEN INMENGING
Die Washington Post het berig dat Poetin ook Russiese inmenging ontken het.
Trump het sy land se ondersoek na die beweerde inmenging “as 'n ramp vir ons land” beskryf.
USA Today berig dat Trump se bereidwilligheid om Poetin te glo nie net teenstrydig met Amerikaanse intelligensieagentskappe en wetmakers is nie, maar ook met sy eie nasionale sekuriteitsraadgewer, John Bolton, wat Sondag, nadat hy die klagstaat teen die 12 Russiese amptenare deurgegaan het, gesê het dat dit moeilik is om te glo dat Poetin onbewus was van die verkiesingsinmenging.
Volgens die New York Times het Trump twyfel gesaai oor jarelange aannames oor die Weste se politieke, militêre en handelsvennootskappe.
“Hy het die dag begin deur Amerika, en nie vir Rusland nie, te blameer vir die spanning tussen die twee lande”, het die koerant verder berig.
Prof. Theo Neethling, hoof van die departement van politieke studies en regeerkunde by die Universiteit van die Vrystaat, sê die vergadering volg op Trump se vervreemding van Amerika se tradisionele Westerse bondgenote.
Neethling het gesê wat Poetin betref, is hy tans in 'n baie sterk diplomatieke posisie.
“Oor Poetin moet ook gesê word dat hy, anders as Trump, baie duidelike buitelandse beleidsdoelwitte nastreef en baie berekend is in sy optredes.
POETIN MEER ERVARE
“Daarby is hy baie meer ervare op die diplomatieke terrein as Trump en dit is daarom begryplik dat talle waarnemers in die Westerse wêreld baie skepties kyk na die moontlike positiewe uitkomste wat vir die VSA en die Westerse moondhede uit die gesprekke kan spruit.”
Prof. John Stremlau, kenner van internasionale politiek by die Universiteit van die Witwatersrand se departement van internasionale studies, het die vergadering beskryf as “'n amateurbokser (Trump) teen Mohammed Ali (Poetin)”.
“Poetin het goed voorberei, terwyl Trump dinge opmaak soos hy aangaan – soos ons met die verandering met Amerika se Navo-bondgenote gesien het”.
Volgens Stremlau volg die vergadering te midde van erge bekommernisse in die Weste oor Russiese optrede in die Oekraïne, die Swartsee-skiereiland Krim en die Midde-Ooste.
– Netwerk24
Kommentaar
Republikein
Geen kommentaar is op hierdie artikel gelaat nie