Uitsaaier soek sy geld

Yochanaan Coetzee Die nasionale uitsaaier (NBC) het amptelik sy veldtog teen die wanbetalers van televisielisensies afgeskop. Sou wanbetalers nie hul samewerking aan die NBC se lisensie-inspekteurs gee nie of hul toegang weier, word die hulp van die polisie ingeroep. “Die proses van vervolging het reeds begin. Vroeër vanjaar het die NBC by die kantoor van die aanklaer-generaal om hulp in die verband aangeklop, en die gevolg was die formalisering van riglyne vir vervolging van wanbetalers,” het mnr. Steven Yarukeekuro Ndorokaze, hoof van regsdienste in die direkteur-generaal se kantoor, gesê.“Samelopend hiermee het die NBC kennisgewings uitgestuur aan eienaars van televisiestelle wat nie hul lisensies betaal het nie. Sodra die regspanne van die uitsaaier en Nampol die proses afgehandel het wat gevolg moet word, sal die NBC 'n versoek aan die polisie rig om die wet in spesifieke gevalle af te dwing,” het hy gesê.Die betaling van televisielisensies is ingevolge die Namibiese uitsaaiwet verpligtend en beloop N$204 per jaar vir Jan Publiek, N$60 vir bejaardes en gestremdes, en tussen N$220 en N$440 vir sekere besighede. Die insameling van lisensiegelde is noodsaaklik om die NBC se voortgesette uitsendings en werksaamhede te verseker. “Die betaling van 'n TV-lisensie is van toepassing op enige persoon of entiteit wat in sy of haar besit 'n televisie het. Dié lisensie bly betaalbaar, ongeag of 'n televisiestel gebruik word of nie, en ongeag of 'n mens na die NBC se uitsendings kyk of nie,” het me. Michaela Jaeger, hoof van televisielisensies by die nasionale uitsaaier, gesê.“Tot dusver het die NBC vir die huidige boekjaar meer as N$3,7 miljoen in lisensiegeld ingesamel. Verlede jaar is 'n totaal van 21 miljoen hiermee ingesamel,” het Jaeger gesê.“Op grond van beskikbare markinligting moet die uitsaaier egter 'n potensiële lisensie-inkomste van meer as 40 miljoen Namibiese dollar insamel.”“Dit beteken 'n aansienlike aantal kliënte kom nie hul verpligting tot betaling na nie,” het sy beklemtoon.Mnr. Borris Erasmus, 'n prokureur van PD Theron en Vennote, het Vrydag aan Republikein bevestig hulle is tans besig met voorbereidings om namens 'n kliënt die wettigheid van die kwessie te ondersoek.“Ons mening is dat die polisie nie betrokke kan raak indien daar nie 'n bevel van die hof is nie,” het hy gesê.“Daar is sekere stappe wat gevolg moet word. Indien 'n persoon nie samewerking aan 'n geïdentifiseerde TV-inspekteur gee nie, kan die NBC dit opvolg met 'n saak, wat dan weer deur die polisie opgevolg kan word. ”Alle TV-lisensies het op 30 September 2017 verstryk. Wanneer 'n betaling gemaak word, moet eienaars se identiteitsdokument, gedetailleerde inligting oor die betrokke televisiestel(le) asook die rekeningnommer van die betrokke lisensie die betaling vergesel.Die lisensies kan by enige kantoor van die NBC, Nampost of Nictus betaal word. Kliënte kan ook 'n internetbetaling of direkte deposito doen. Vir meer inligting kan (061) 291 3111 of 291 2100 geskakel word of stuur 'n e-pos na tvlicence@nbc.na.

Uitsaaier soek sy geld

Kommentaar

Republikein 2025-04-09

Meld asseblief aan om kommentaar te lewer

Uitsaaier soek sy geld

Kommentaar

Republikein 2025-04-09

Meld asseblief aan om kommentaar te lewer

MELD AAN

Advertensie