Uitvoerende direkteurs geskuif

Die eerste minister, me. Saara Kuugongelwa-Amadhila, het vanmiddag aangekondig ’n aantal uitvoerende direkteurs word geskuif, terwyl ’n aantal nuwes aangestel word.

Mnr. Hannu Shipena, tans die uitvoerende direkteur van die Teenkorrupsiekommissie (ACC), word oorgeplaas na die Nasionale Raad van Hoër Onderwys (NCHE).

Me. Annelly Haiphene, die huidige uitvoerende direkteur van die Nasionale Beplanningskommissie (NPC), word na die ministerie van visserye en mariene hulpbronne geskuif.

Die huidige uitvoerende direkteur van werke en vervoer, me. Wilhencia Uiras, skuif na die NPC.

Dr. Moses Maurihungirire skuif van visserye en mariene hulpbronne na die kantoor van die eerste minister.

Die huidige adjunk- uitvoerende direkteur van landbou, water en grondhervorming, me. Esther Kaapanda, word werke en vervoer se uitvoerende direkteur, terwyl mnr. Tylvas Shilongo, wat tans by die Namibië Sentrale Intelligensiediens (NCIS) werk, as die ACC se uitvoerende direkteur aangestel word.

Dié aanstellings word 1 Augustus van krag.