Unesco ondersteun meesterplan vir water

Augetto Graig - Kapasiteitbou en die finalisering van Namibië se meesterplan teen waterkrisisse soos droogtes en vloede, is die volgende mikpunt in die ministerie van landbou, water en bosbou se watersektor-bystandsprojek.
Mnr. John Mutorwa, minister van landbou, water en bosbou, het dit verlede week bespreek tydens die vergadering met die Verenigde Nasies se agent­skap vir Onderwys, Wetenskap en Kultuur (Unesco) se inwonende hoof, mnr. ­Sean-Pierre Ilboudo, en dr. Abou Amani, ’n kundige van Frankryk, wat die onlangse droogtekonferensie in Windhoek bygewoon het. Namibië het Unesco in 2011 ná die vloede om hulp genader.
Amani het die belangrikheid van bewys-gebaseerde besluitneming genoem, en gesê baie Afrikalande is verkeerd om by wyse van krisisbestuur op rampe te reageer.
“Unesco is ’n organisasie van intellektuele mense, ’n netwerk van kenners. Wat julle in die land nodig het, is ’n vroegtydige waarskuwingstelsel wat deur die projek geskep sal word om tydige inligting oor vloede of droogte te verskaf.
“Ons moet die kwes­bare plekke en gemeenskappe identifiseer en ’n meesterplan asook die koste daarvan uitwerk.
“Die projek is maar die eerste fase en kom ná die amptelike versoek aan die VN. Dit was proaktief deur Namibië. Liewer laat as nooit,” sê hy.
Unesco ­ondersteun die proses, maar volgens Ilboudo sal die organisasie voortgaan om tegniese en wetenskaplike raad tydens die implementering van die projek te verskaf.
Hy sê die wyse waarop die projek gestruktureer is, laat Unesco nie toe om ’n lid te wees van die bestuurskomitee van die projek wat besluite oor die implementering neem nie.
“Ons word slegs toe­gelaat om lid van ’n weten­skaplike adviesraadkomitee wees. Nog ’n implikasie van nie in beheer van die implementering van die projek te wees nie, is dat geen behoefte aan ’n formele verstandhoudingsooreenkoms bestaan nie.
“Slegs ’n brief waarin die verantwoordelikhede van elke party duidelik genoem is, sou voldoende kon wees,” het hy gesê.
Die gesamentlike ­bestuurskomitee sal teen Maart 2017 aan die werk spring om die plaas­like vermoë te versterk deur jong kenners op te lei, langtermynvloed- en droogteplanne toe te pas, en ’n ondersteunende beleid op te stel. Mnr. Abraham Nehemia, adjunk permanente sekretaris van landbou, water en bosbou, is die voorsitter van die komitee wat lede sal insluit uit die eerste ­minister se kantoor, die ministerie van finansies, die Nasionale Beplanningskommissie, die ministerie van myne, die universiteite, NamWater en die Cuvelai-bestuurs­komitee.
Terselfdertyd is die land se twee nasionale universiteite hard besig met die ontwikkeling van ­meestersgrade in ingenieurs­wese. Daarvoor is N$10 miljoen deur die ministerie bewillig.
Die vergadering met die VN sou in Augustus 2015 reeds plaasgevind het, maar die samewerking was vertraag weens ­misverstande oor Unesco se betrokkenheid, het Mutorwa gesê.
Volgens Nehemia beplan die ministerie om ’n demonstrasiesentrum in die noorde van die land te bou waar ondersoek gedoen sal word na ingenieurswerke om vloede en oorstromings af te weer.
Hy verwag dat meer as N$76 miljoen oor die volgende vyf jaar hiervoor nodig sal wees.
Unesco sal help om geld vir die daaropvolgende groot projekte van ­honderde miljoen dollar in te samel.
Nehemia sê nou is die regte tyd om vordering te maak met die projek, ­aangesien “die hele nasie aan water dink”.
“Nou is water die prio­riteit en dit is die regte tyd om konkrete planne te beraam wat toegepas moet word,” het hy gesê.