Vader van vermoorde seun getuig

Jacqueline Louw – Die vader van wyle Mandela Ramakhutla (17), mnr. Thomas Shetekela, het gister getuienis gelewer oor die gebeure wat gelei het dat sy seun ná sy inhegtenisneming glo so erg aangerand is dat hy sy bewussyn verloor en later beswyk het.Drie voormalige stadspolisiebeamptes, mnre. Werner Johannes Shetekela (30), Kleopas Shikalepo Kapalanga (28) en Elias Nakale (33), word daarvan beskuldig dat hulle op 16 April 2013 vir Ramakhutla, ’n vermeende inbreker, by ’n kroeg in hegtenis geneem het en in ’n polisievoertuig weggeneem het. Gedurende die tyd wat Ramakhutla in hul bewaring was, was hy na bewering só erg aangerand dat hy agt dae later beswyk het.Die beskuldigdes het Ramakhutla by die Windhoekse polisiekantoor afgelaai en die polisiebeamptes aan diens opdrag gegee om Ramakhutla op ’n klag van diefstal aan te hou. Polisiebeamptes het hom dieselfde aand na die Katutura-staatshospitaal geneem waar hy op 24 April 2013 in die intensiewesorgeenheid gesterf het weens die beserings wat hy tydens die aanranding sou opgedoen het.Shetekela het gister getuig hoe hy op 16 April 2013 ’n oproep van sy moeder, me. Alina Shetekela, ontvang het terwyl hy by die Windhoek Buitekluboord en Casino was. “Mandela is by die stadspolisie, hy is erg beseer. Dit is beter dat jy kom,” het sy hom meegedeel. Op pad het sy weer gebel en gesê dat die stadspolisie reeds met die jeugdige weg is en hulle hom na die Wanaheda-polisiekantoor sou neem. Die pa het hom daarheen gehaas, maar sy seun was nie daar nie. Hy het getuig hoe hy van die een polisiekantoor na die ander is om sy seun te vind. By die Khomasdalse stadspolisiekantoor het hy sy kind op ’n kringtelevisie-videogreep uitgeken. Hy is toe na die Windhoekse polisiekantoor verwys.Die pa het getuig dat hy by die Windhoekse polisiekantoor deur drie polisiebeamptes meegedeel is dat die stadspolisie iemand afgelaai het en “jy kan hom nie op die oomblik sien nie”. Die pa het aanvaar dat sy seun nog nie aangekla was nie en dat hy hom die volgende oggend sou kon besoek. Hy was verlig om te weet waar sy kind was. Voordat hy nog by sy motor kon kom, het Ramakhutla se ouma weer gebel en gesê dat haar kleinseun sleg beseer is en dit sou beter wees as Shetekela probeer om hom te sien. Die pa is terug na die polisiekantoor. ’n Polisieman het hom na sy seun geneem wat op die vloer gelê het. "My seun se gesig was geswel, daar was bloed aan sy neus en hy het nie gereageer toe ek sy naam geroep het nie," het Shetekela getuig. “Ek kon sien hy is nie in ’n goeie toestand nie. Ek het die polisiemanne gevra waarom hulle hom nie na 'n hospitaal neem nie." Hulle het glo gereageer: "Toe die stadspolisie hom gebring het, het hulle gesê hy is dronk – hy gee voor.”Die polisiemanne het na bewering gesê daar is geen vervoer nie. Shetekela het glo aangebied om self sy seun met polisiebegeleiding hospitaal toe te neem. Hy is meegedeel “die man in beheer moet die besluit neem”. HEMP VOL BLOEDOp die vraag van staatsadvokaat Cliff Lutibezi hoe laat dit was, het hy gereageer: “Ek het nie opgelet nie. Dit is my seun, ek het die gevaar gesien, ek het probeer om sy lewe te red. Sy hemp was vol bloed.” Shetekela het die bebloede hemp as bewysstuk in die hof getoon. Mnr. Kadhila Amoomo het beswaar aangeteken en aangevoer dat dit aan enigiemand kon behoort en die vlekke nie noodwendig bloed is nie.Weersprekende getuienis is deurentyd tydens die verhoor deur die regsverteenwoordigers van die beskuldigdes uitgewys. Volgens vyf polisieverslae was die vader van die kind nooit by die polisiekantoor nie en die polisie was verantwoordelik om Ramakhutla by die hospitaal te kry.Adv. Cliff Lutibezi verskyn vir die staat. Mnr. Braam Cupido tree namens mnr. Werner Shetekela op, mnr. Willem Visser verteenwoordig Kapalanga en Nakale se regsverteenwoordiger is mnr. Kadhila Amoomo. Die verhoor is tot 18 Julie uitgestel.

Vader van vermoorde seun getuig

Kommentaar

Republikein 2024-11-25

Meld asseblief aan om kommentaar te lewer

Vader van vermoorde seun getuig

Kommentaar

Republikein 2024-11-25

Meld asseblief aan om kommentaar te lewer

MELD AAN

Advertensie