Vakbond eis beter beroepsopleiding

Augetto Graig – Die leiers van die Studente-unie van Namibië (Sun) sê hulle wy 2020 toe aan die stryd om Namibië se beroepsopleidingstelsel te verbeter.

Volgens die vakbond se sekretaris-generaal, mnr. Benhard Kavau, is tegniese en beroepsopleidingsentrums landswyd, beter bekend as TVET-instansies, verkeerd geplaas en nie doeltreffend wat programme en leerplanne betref nie.

“Ons leerplan leer jongmense slegs oor installering en vervanging, messel- en pleisterwerk, die vervanging van enjinonderdele, loodgietery, houtwerk, elektriese installering en kantoorbestuur. Ons ambagsmanne kan nie eens ’n karenjin bou nie. Hulle kan dit net uitmekaar haal en onderdele vervang,” sê hy.

Volgens hom moet selfs studente van die Namibië Instituut van Mynbou en Tegnologie (Nimt), een van die mees gevestigde beroepsopleidingsentrums in die land, Suid-Afrika toe reis vir verdere opleiding.

“Ons TVET-stelsel moet ’n leerplan ontwikkel wat mense opleiding bied wat ons ekonomiese behoeftes aanspreek. Ons het ’n TVET-opleidingstelsel nodig wat mense leer hoe om te vervaardig, monteer, verwerk en hoe om self met materiaal, toerusting en produkte vorendag te kom. Daarsonder sal Namibië voortdurend meer invoer as wat hy kan uitvoer. Só sal Visie 2030 in die gedrang kom,” sê hy.

Kavau sê studente is teleurgesteld in die Namibiese opleidingsowerheid (NTA), wat TVET-instansies reguleer.

“Die NTA moes tot die vestiging van ’n effektiewe en volhoubare stelsel van vaardigheidskepping bydra wat met die arbeidsmark se behoeftes strook, en vaardighede vir versnelde ontwikkeling sou voorsien. Die NTA slaag egter nie daarin om die land van gehalte beroepsopleiding en opvoeding te voorsien nie,” sê hy.

“Weens hul onbevoegdheid fokus ons TVET-instansies meer op swart behoeftiges se kinders. Dit is hoekom politici, ministers, hoëlui of witmense nie hul kinders daarheen stuur nie. Dit is omdat hulle geen vertroue in ons TVET-sektor het nie en verkies om hul kinders buiteland toe te stuur, of om valse instansies op te rig om hulself te verryk,” sê hy.

Sun se nasionale woordvoerder, mnr. Tyson Hihanguapo, sê skole se leerplanne het al verskeie kere sedert onafhanklikheid verander, maar die verouderde TVET-leerplan bly dieselfde. Hy sê besighede weier om Namibiese TVET-studente aan te stel weens hul gebrek aan kundigheid.

Volgens Hihanguapo voorsien die regering geen geleenthede vir studente wat hul beroepsopleiding plaaslik voltooi nie, en selfs die Finansiële Hulpfonds vir Namibiese Studente (NSFAF) befonds nie hul toerusting nie.

“Studente stap met leë hande uit. Selfs by hul klasse stap hulle skoon uit – asof hulle aan ’n universiteit sonder praktiese inhoud studeer,” sê hy.

Sun is nie met enige politieke party geaffilieer nie en het sedert sy stigting op 19 September verlede jaar met rasse skrede gegroei.

Volgens Kavau het die vakbond sowat 15 000 lede by Namibië se verskeie universiteite, en nog 15 000 by beroepsopleidingsentrums.

“Ons het die grootste studenteteenwoordigheid by al 12 Unam-kampusse, Nust en IUM,” sê hy.

– [email protected]