Vakbondleier: Kawana, Seaflower moet vergader

Ronelle Rademeyer – ’n Vakbondleier pleit in ’n e-pos aan die ministerie van visserye en mariene hulpbronne dat kwotas aan Seaflower Pelagic Processing (SPP) op Walvisbaai vir die vang en verwerking van 9 000 ton maasbanker, nie teruggetrek word nie.Die president van die Namibië Visbedryf- en Viswerkersvakbond (NFI & FWU), mnr. Daniel Imbili, versoek die uitvoerende direkteur van dié ministerie, me. Annely Haiphene, om “nie toe te laat dat die werkers boet vir die foute van diegene hoog op” nie.Hy sê die vakbond gee die direksie en die ministerie “’n paar dae tyd om hul huis in orde te kry” en vra die minister, dr. Albert Kawana, moet môre met die belanghebbende partye vergader.“Moenie dat die werkers langer ly nie, want hulle het niks verkeerd gedoen nie. Laat die produksie voortgaan terwyl probleme op ’n hoër vlak opgelos word,” lui sy e-pos.Sy versoek Dinsdag volg nadat die hoofbestuurder van SPP, mnr. Adolf Burger, Maandag in ’n brief aan Haiphene ontken het dié verwerkingsaanleg het twee maasbankerkwotas van onderskeidelik 5 000 en 4 000 ton verkoop. Die kwotas is vroeër vanjaar toegeken met die doel om werkers in diens te hou.Mnr. Mihe Gaomab II, voorsitter van die tussentydse raad van die National Fishing Corporation of Namibia (Fishcor), het Kawana vroeër vandeesmaand skriftelik in kennis gestel dat in oorleg met die minister van staatsondernemings (SOE’s), mnr. Leon Jooste, besluit is om te vra dat die kwotas aan SPP teruggetrek en aan ander vismaatskappye toegeken word.Gaomab II het aangevoer dit moet gedoen word sodat ander maatskappye die 655 werkers wat deur SPP afgelê is, in diens kan neem.Burger sê in sy brief aan die ministerie SPP “is in geen wetlike posisie om kwotas te verkoop indien Fishcor nie instem nie”.SPP het in 2017 tot stand gekom nadat Fishcor met African Selection Trust (AST) ’n ooreenkoms gesluit het om as bedryfsvennoot ’n visverwerkingsaanleg vir maasbanker op te rig, vissersbote aan te skaf en die vangste te bemark. Fishcor besit 40% van die aandele in SPP en AST 60%. Die ooreenkoms het verder ’n jaarlikse maasbankerkwota van 50 000 ton aan SPP gewaarborg. SPP se voorsitter, mnr. AJ Louw, het vroeër aan Republikein gesê Fishcor het nie by die ooreenkoms gehou nie en skuld SPP sowat 95 000 ton se kwotas waarvan die waarde sowat N$250 miljoen beloop.Burger sê verder in sy brief SPP bevind hom in onstuimige vaarwaters en verseker Haiphene die maatskappy het te midde van moeilike omstandighede nie een van die werkers in die steek gelaat nie.Hy sê hulle het tydens die wintermaande toe die maatskappy nie vis gevang het nie, ’n minimum ex gratia-betaling gekry.Volgens hom hoop die bestuur dat SPP se aandeelhouers hulle geskille sal besleg sodat dié 655 werkers voltyds in diens geneem kan word.“Indien ons daarin kan slaag om dwarsdeur die jaar kwota te kry, kan ons van 2021 af meer as 1 100 voltydse werkers in diens neem. Dit is 45% van die Namibiërs wat in die maasbankerbedryf werk,” sê Burger.Imbili sê Namibiërs wil nie hê SPP se fabriek moet soos Ramatex “’n wit olifant” word nie en voeg by dit is tyd dat die partye vergader en hul geskille besleg.Intussen het Haiphene gister by navraag gesê Imbili se versoek vir 'n vergadering is te laat ontvang om môre al te kan geskied. "Ons het dit eers vandag (gister) gekry, en minister Kawana het reeds ander verpligtinge Vrydag."Sy het ook bevestig 'n uitnodiging is deur die bestuur van SPP aan die ministerie gerig om die aanleg te besoek en 'n toer deur die fabriek te onderneem. - ronelle@republikein.com.na

Vakbondleier: Kawana, Seaflower moet vergader

Kommentaar

Republikein 2025-04-07

Meld asseblief aan om kommentaar te lewer

Vakbondleier: Kawana, Seaflower moet vergader

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie