Van Wyk spreek UPM se uitvoerende komitee toe
Van Wyk spreek UPM se uitvoerende komitee toe

Van Wyk spreek UPM se uitvoerende komitee toe

Ronelle Rademeyer
Ronelle Rademeyer

Die waarnemende president van die United People’s Movement (UPM) sê dié party verwerp die bedrag waarop Namibië en Duitsland ooreengekom het as vergoeding vir die volksmoord van 1904-’08.

Hy sê dit is ‘n belediging vir die geraakte partye.

Van Wyk het dié opmerkings Saterdag gemaak toe hy ‘n vergadering van die party se nasionale uitvoerende komitee in Windhoek toegespreek het.

Hy het ook gesê die UPM sal voortgaan om die insluiting van die leiers van alle geraakte gemeenskappe by die onderhandelinge te eis. Dit sluit die San, Damaras en die Rehoboth Basters in.

Hy het verder gesê dit wil lyk of daar verwarring bestaan oor die UPM se betrekkinge met die Popular Democratic Movement (PDM).

Van Wyk sê hoewel die twee partye ooreengekom het om tydens die 2019 presidensiële en nasionale verkiesings saam te werk, bly dit twee afsonderlike partye.

“Ek wil dit duidelik maak die UPM het nooit by die PDM geaffilieer nie en het ook nie as ‘n party sy registrasie by die Verkiesingskommissie van Namibië (ECN) opgegee nie."

Hy sê die feit dat die UPM die minderheidsparty in dié alliansie is, beïnvloed nie sy gesag as ‘n politieke party nie.

“Ons verwerp die behandeling wat die UPM in die parlement kry, ten sterkste,” was sy woorde.

Van Wyk, wat die waarnemende president is sedert die afsterwe van die party se president, mnr. Piet Junius, aan Covid-19 vroeër vanjaar, het ook aan lede van die uitvoerende komitee gesê die UPM sal aanhou om hom vir die regte van onderdrukte mense in die land te beywer.

Hy sê die party sal gefokus bly op ‘n beter môre vir toekomstige geslagte deur kwessies soos geslagsgelykheid, geslagsgeweld en alkohol- en dwelmmisbruik in gemeenskappe te takel. Die party sal ook voortgaan om hom te beywer vir ‘n basiese inkomstetoelaag (BIG).

Wat pleidooie vir die wettiging van aborsie betref, het Van Wyk gesê die UPM steun dit nie. - [email protected]

Kommentaar

Republikein 2025-03-31

Geen kommentaar is op hierdie artikel gelaat nie

Meld asseblief aan om kommentaar te lewer