Veldbrande verwoes 13 000 ha by Hochfeld
Die Hochfeld-omgewing moes die afgelope drie weke talle veldbrande trotseer, terwyl dit ook by Grootfontein en in die Otavi-omgewing gebrand het.
Elvira Hattingh
Altesaam sowat 13 000 hektaar het oor die afgelope drie weke in die Hochfeld-omgewing afgebrand, met die laaste 3 000 hektaar wat Sondagmiddag verswelg is.
Me. Saartjie Müller sê Sondag se brand het omstreeks 12:00 begin, maar anders as die vorige kere kon kolebrandery dit nie dié keer veroorsaak het nie. Die oorsaak is nog onbekend, het sy gesê.
Dit volg nadat 'n brand in die omgewing ook verlede Woensdag op die plaas Maitland ontstaan en tot Donderdag voortgeduur het, waarna dit na nog vier ander plase in die omgewing versprei het.
“In dié tyd het die wind skielik gedraai en 'n klomp vuurslaners het in die moeilikheid beland. Vyf mense is na dese in die hospitale op Okahandja en in Windhoek,” het Müller gesê.
Sy sê sowat drie weke gelede het 'n brand ook op die plaas Spuitfontein begin en na die plaas Sterkfontein versprei.
Dit het glo verlede Vrydag ook op drie plase in die Grootfontein-omgewing gebrand, waartydens lede uit die gemeenskap asook die weermag gehelp het om die vuur te blus.
Twee dae tevore (laas Donderdag) was daar ook 'n veldbrand op plase 45 km tot 50 km buite Outjo op die Otavi-pad.
Dit volg nadat 31 352 ha of altesaam 14 plase sowat twee weke gelede in die Otjiwarongo-omgewing afgebrand het.
GEHOORSAAM MAATREËLS
Die Namibiese Houtskoolvereniging (NCA) het onlangs opnuut sy lede vermaan om aan die streng maatreëls vir die verbranding van houtskool te voldoen.
“Die belangrikste reëls sluit in dat die verbranding van houtskool, veral tydens die brandseisoen, in groeperings moet plaasvind en daar 24 uur per dag en sewe dae 'n week toesig oor die kilns gehou word,” het die NCA op sy Facebook-blad gesê.
“Geen kiln moet alleen in die veld gelaat word nie en kilns moenie brand terwyl sterk winde waai nie.
“Ons doen 'n beroep op boere om te verseker die reëls word gevolg en dat die verontagsaming hiervan by die NCA aangemeld word. Dit sal dan aan die bosboudepartement deurgegee word wat oespermitte kan terugtrek.”
Die vermaning volg nadat nuwe maatreëls deur die direktoraat van bosbou vandeesmaand aangekondig is om die risiko van veldbrande te verlaag wat deur houtskoolproduksie veroorsaak word.
Hierdie maatreëls, wat onmiddellik in werking getree het, sal jaarliks van 1 Augustus tot 31 Desember geld. Hiervolgens is dit verpligtend om houtskooloonde in groepe saam te brand. Enkeloonde wat verspreid deur die veld brand, word gedurende hierdie periode verbied.
Verder sal 'n plaas waarop houtskool geproduseer word, 'n brandstrook van 15 m breed op die grense aan die einde van elke reënseisoen moet aanbring. 'n Area binne ten minste 'n 5 meter-radius moet ook skoongemaak word rondom die oonde wat saam gegroepeer is voordat hulle aan die brand gesteek word.
Die ministerie van die omgewing, bosbou en toerisme het houtskoolprodusente dringend versoek om hierdie nuwe maatreëls ten volle toe te pas ten einde die risiko van onbeheerde veldbrande, wat jaarliks groot skade aanrig, tot die minimum te beperk.
Bosbou-amptenare mag plase inspekteer waar houtskool geproduseer word om seker te maak hierdie nuwe maatreëls word toegepas. Plase wat nie hieraan voldoen nie, se oes- en bemarkingspermitte kan summier opgeskort word.
- [email protected]
Altesaam sowat 13 000 hektaar het oor die afgelope drie weke in die Hochfeld-omgewing afgebrand, met die laaste 3 000 hektaar wat Sondagmiddag verswelg is.
Me. Saartjie Müller sê Sondag se brand het omstreeks 12:00 begin, maar anders as die vorige kere kon kolebrandery dit nie dié keer veroorsaak het nie. Die oorsaak is nog onbekend, het sy gesê.
Dit volg nadat 'n brand in die omgewing ook verlede Woensdag op die plaas Maitland ontstaan en tot Donderdag voortgeduur het, waarna dit na nog vier ander plase in die omgewing versprei het.
“In dié tyd het die wind skielik gedraai en 'n klomp vuurslaners het in die moeilikheid beland. Vyf mense is na dese in die hospitale op Okahandja en in Windhoek,” het Müller gesê.
Sy sê sowat drie weke gelede het 'n brand ook op die plaas Spuitfontein begin en na die plaas Sterkfontein versprei.
Dit het glo verlede Vrydag ook op drie plase in die Grootfontein-omgewing gebrand, waartydens lede uit die gemeenskap asook die weermag gehelp het om die vuur te blus.
Twee dae tevore (laas Donderdag) was daar ook 'n veldbrand op plase 45 km tot 50 km buite Outjo op die Otavi-pad.
Dit volg nadat 31 352 ha of altesaam 14 plase sowat twee weke gelede in die Otjiwarongo-omgewing afgebrand het.
GEHOORSAAM MAATREËLS
Die Namibiese Houtskoolvereniging (NCA) het onlangs opnuut sy lede vermaan om aan die streng maatreëls vir die verbranding van houtskool te voldoen.
“Die belangrikste reëls sluit in dat die verbranding van houtskool, veral tydens die brandseisoen, in groeperings moet plaasvind en daar 24 uur per dag en sewe dae 'n week toesig oor die kilns gehou word,” het die NCA op sy Facebook-blad gesê.
“Geen kiln moet alleen in die veld gelaat word nie en kilns moenie brand terwyl sterk winde waai nie.
“Ons doen 'n beroep op boere om te verseker die reëls word gevolg en dat die verontagsaming hiervan by die NCA aangemeld word. Dit sal dan aan die bosboudepartement deurgegee word wat oespermitte kan terugtrek.”
Die vermaning volg nadat nuwe maatreëls deur die direktoraat van bosbou vandeesmaand aangekondig is om die risiko van veldbrande te verlaag wat deur houtskoolproduksie veroorsaak word.
Hierdie maatreëls, wat onmiddellik in werking getree het, sal jaarliks van 1 Augustus tot 31 Desember geld. Hiervolgens is dit verpligtend om houtskooloonde in groepe saam te brand. Enkeloonde wat verspreid deur die veld brand, word gedurende hierdie periode verbied.
Verder sal 'n plaas waarop houtskool geproduseer word, 'n brandstrook van 15 m breed op die grense aan die einde van elke reënseisoen moet aanbring. 'n Area binne ten minste 'n 5 meter-radius moet ook skoongemaak word rondom die oonde wat saam gegroepeer is voordat hulle aan die brand gesteek word.
Die ministerie van die omgewing, bosbou en toerisme het houtskoolprodusente dringend versoek om hierdie nuwe maatreëls ten volle toe te pas ten einde die risiko van onbeheerde veldbrande, wat jaarliks groot skade aanrig, tot die minimum te beperk.
Bosbou-amptenare mag plase inspekteer waar houtskool geproduseer word om seker te maak hierdie nuwe maatreëls word toegepas. Plase wat nie hieraan voldoen nie, se oes- en bemarkingspermitte kan summier opgeskort word.
- [email protected]
Kommentaar
Republikein
Geen kommentaar is op hierdie artikel gelaat nie