Verwoes ná histerektomie
Die ministerie het geskik oor die meriete van 'n eis vir beweerde ernstige mediese nalatigheid.
Henriette Lamprecht
'n Vrou wat vir maande in 'n koma was en gedeeltelik verlam gelaat is ná 'n histerektomie in 'n staatshospitaal, dagvaar die staat vir miljoene.
Die 36-jarige Frieda Martin het “mobiliteit en beweging in haar hele liggaam verloor, verminderde sig, spraakprobleme en geheueverlies” ná die operasie wat die ministerie van gesondheid en maatskaplike dienste sê uit noodweer was.
Martin is op 21 September 2015 in die Windhoek Sentrale Hospitaal opgeneem waar sy die middag met die hulp van 'n keisersnee aan 'n gesonde babadogtertjie geboorte geskenk het. Later dieselfde dag sou sy nog 'n chirurgiese prosedure ondergaan om haar baarmoeder te verwyder. Martin voer aan dit is onregmatig verwyder, terwyl die staat se verweer is dit is uitgevoer om haar lewe ná postpartum-bloeding te red.
Die histerektomie is deur dr. Berhe Hailemariam uitgevoer en het volgens 'n teaterverslag van 18:30 tot 20:55 geduur. Volgens die verslag is Martin na afloop van die operasie “in 'n siek toestand” na die intensiewesorgeenheid van die hospitaal oorgeplaas. Volgens hofstukke het sy tydens die operasie 'n hipoksiese breinbesering opgedoen en in 'n koma verval waaruit sy eers twee maande later ontwaak het.
In September en November die volgende jaar het Martin tydens besoeke aan die Katutura-staatshospitaal probeer vasstel wat met haar liggaam fout was. Tydens beide besoeke, sê hofstukke, was die dokter wat haar te woord gestaan het “baie ongeskik en onbehulpsaam” en was daar niks wat hy “nou vir haar kan doen nie”.
Martin voer aan tydens beide haar keisersnee en histerektomie is sy van voldoende mediese hulp weerhou, is sy nooit voor die tweede operasie genoegsaam gekonsulteer nie, is sy nooit ingelig hoekom sy verlam uit 'n koma ontwaak het en waarom sy haar spraak verloor het nie.
'toegang tot Lêer geweier'
Selfs toe sy op inligting oor haar mediese toestand aangedring het, is sy glo toegang tot haar mediese lêer geweier wat in die besit van mediese personeel by die hospitaal is.
Martin is aan die hele linkerkant verlam en moet met die hulp van krukke oor die weg kom. Haar sig is swak en haar spraak is aangetas. Sy was voor die operasie werksaam by 'n restaurant, maar kan weens haar beserings nie meer enige werk verrig nie. Volgens hofstukke moes sy noodgedwonge by die Maatskaplike Voorsorgfonds (SSC) registreer vir 'n ongeskiktheidstoelaag omdat sy sukkel om haar babadogter te versorg.
Martin het skadevergoeding van N$7,4 miljoen van die ministerie geëis, wat oor die meriete van die eis geskik het.
Die finale uitbetalingsbedrag moet egter nog bepaal word.
Volgens hofstukke betrek die saak “mediese nalatigheid van 'n ernstige aard” wat die insette van spesialisdokters vereis om die vergoedingsbedrag te bepaal.
Met slegs drie spesialis-neurochirurge in Namibië word nog op die nodige verslae gewag om die saak af te handel.
In die lig hiervan is die saak vir vier weke uitgestel.
'n Vrou wat vir maande in 'n koma was en gedeeltelik verlam gelaat is ná 'n histerektomie in 'n staatshospitaal, dagvaar die staat vir miljoene.
Die 36-jarige Frieda Martin het “mobiliteit en beweging in haar hele liggaam verloor, verminderde sig, spraakprobleme en geheueverlies” ná die operasie wat die ministerie van gesondheid en maatskaplike dienste sê uit noodweer was.
Martin is op 21 September 2015 in die Windhoek Sentrale Hospitaal opgeneem waar sy die middag met die hulp van 'n keisersnee aan 'n gesonde babadogtertjie geboorte geskenk het. Later dieselfde dag sou sy nog 'n chirurgiese prosedure ondergaan om haar baarmoeder te verwyder. Martin voer aan dit is onregmatig verwyder, terwyl die staat se verweer is dit is uitgevoer om haar lewe ná postpartum-bloeding te red.
Die histerektomie is deur dr. Berhe Hailemariam uitgevoer en het volgens 'n teaterverslag van 18:30 tot 20:55 geduur. Volgens die verslag is Martin na afloop van die operasie “in 'n siek toestand” na die intensiewesorgeenheid van die hospitaal oorgeplaas. Volgens hofstukke het sy tydens die operasie 'n hipoksiese breinbesering opgedoen en in 'n koma verval waaruit sy eers twee maande later ontwaak het.
In September en November die volgende jaar het Martin tydens besoeke aan die Katutura-staatshospitaal probeer vasstel wat met haar liggaam fout was. Tydens beide besoeke, sê hofstukke, was die dokter wat haar te woord gestaan het “baie ongeskik en onbehulpsaam” en was daar niks wat hy “nou vir haar kan doen nie”.
Martin voer aan tydens beide haar keisersnee en histerektomie is sy van voldoende mediese hulp weerhou, is sy nooit voor die tweede operasie genoegsaam gekonsulteer nie, is sy nooit ingelig hoekom sy verlam uit 'n koma ontwaak het en waarom sy haar spraak verloor het nie.
'toegang tot Lêer geweier'
Selfs toe sy op inligting oor haar mediese toestand aangedring het, is sy glo toegang tot haar mediese lêer geweier wat in die besit van mediese personeel by die hospitaal is.
Martin is aan die hele linkerkant verlam en moet met die hulp van krukke oor die weg kom. Haar sig is swak en haar spraak is aangetas. Sy was voor die operasie werksaam by 'n restaurant, maar kan weens haar beserings nie meer enige werk verrig nie. Volgens hofstukke moes sy noodgedwonge by die Maatskaplike Voorsorgfonds (SSC) registreer vir 'n ongeskiktheidstoelaag omdat sy sukkel om haar babadogter te versorg.
Martin het skadevergoeding van N$7,4 miljoen van die ministerie geëis, wat oor die meriete van die eis geskik het.
Die finale uitbetalingsbedrag moet egter nog bepaal word.
Volgens hofstukke betrek die saak “mediese nalatigheid van 'n ernstige aard” wat die insette van spesialisdokters vereis om die vergoedingsbedrag te bepaal.
Met slegs drie spesialis-neurochirurge in Namibië word nog op die nodige verslae gewag om die saak af te handel.
In die lig hiervan is die saak vir vier weke uitgestel.
Kommentaar
Republikein
Geen kommentaar is op hierdie artikel gelaat nie