Vier huurplase vir Rus

Ronelle RademeyerDie regering het sowat twee weke voor die grondkonferensie oordrag geneem van vier plase by Dordabis, wat nou vir 99 jaar aan die Russiese oligarg en grondbaron, mnr. Rashid Sardarov (63), verhuur word.Dit blyk uit die titelaktes die totale koopsom het sowat N$43,5 miljoen, of N$2 500 per hektaar, beloop. Dít is deur Sardarov betaal, saam met 'n onbekende bedrag aan die eienaars “vir die verlies van hul besigheid”.Met dié plase by sy bestaande wêreldklas wild- en jagplaas, Marula Game Ranch en die aangrensende plase Otjimukona en Hillside, beskik Sardarov nou oor sowat 50 000 ha grond.Vir die plase Rainhof (123), Kameelboom (119) en 'n gedeelte van die plaas Smaldeel (124), wat saam sowat 11 400 ha groot is, was die koopsom N$28 507 418,50. Dié plase is as 'n eenheid verkoop. Vir die plaas Wolfsgrund (122), van 5 982 ha, het die regering N$14 995 336,25 betaal.Al dié plase het aan Rhino Farming (Pty) Ltd van mnr. Claus Düvel en sy seun, mnr. Kurt Düvel, behoort.Dit word nou ingevolge 'n notariële huurooreenkoms vir 99 jaar aan Sardarov verhuur. Vir 2018-'19 sal hy N$160 168,40 se huur betaal en daarna sal hy jaarliks net die grondbelasting aan die regering verskuldig wees.Dit blyk uit die titelakte die oordrag het op 18 September vanjaar plaasgevind. Volgens die huurooreenkoms wat by die aktekantoor geliasseer is, het mnr. Utoni Nujoma, minister van grondhervorming, die ooreenkoms namens die regering met Comsar Properties SA gesluit. Sardarov besit Marula Game Ranch en sy ander plase deur dié maatskappy in Switserland.Daarin sê die regering hy het Comsar se aansoek om die vier plase te koop, afgekeur ingevolge 'n kabinetsbesluit dat buitelanders nie kommersiële landbougrond mag besit nie. “Die minister het in die lig van die ontwikkelings- en ekonomiese voordele wat uit die belegging sal voortspruit, aanbeveel dat die vier plase deur die regering gekoop word vir die volle koste en rekening van die huurder (wat die koopprys en die vergoeding wat deur die plaaseienaars geëis word, insluit). Die vier plase sal vir 99 jaar in ooreenstemming met die ooreenkoms aan die huurder verhuur word,” lui dié openbare dokument.Oor die huurbedrag van 'n skrale N$13 347,36 per maand in die eerste jaar sê die minister dít is weens “die skenking van die vier plase” aan die regering en die feit dat al die verbeteringe ter waarde van miljoene Namibiese dollar ná die huurperiode staatseiendom sal word.mag paaie aanlê Die ooreenkoms bepaal ook Sardarov kan die plase vir enige “besigheid van sy keuse” gebruik, insluitend private wildboerdery, jag, 'n leerlooiery, hotelle, geriewe vir sport en die uitvoerende kunste. Hy kan ook paaie aanlê, heinings en huise oprig en 'n vliegveld bou. Sardarov se regsverteenwoordiger, mnr. Sisa Namandje, het in November verlede jaar namens Comsar 'n advertensie in plaaslike koerante geplaas waarin hy in die “lig van deursigtigheid” bekend gemaak het Comsar wil hierdie plase koop.In ruil vir die nodige vrystellingsertifikate (waivers) deur die ministerie van grondhervorming sou Comsar N$24 miljoen vir opheffings- en ander projekte aan die regering skenk.Republikein het verlede week skriftelike vrae hieroor aan Namandje gerig, wat beloof het om sy kliënt “om instruksies” te nader en teen vandag terugvoering te gee.Sardarov het in 2014 in 'n verslag, wat deel van 'n omgewingsimpakstudie was, gesê hy beoog om Marula Game Ranch in 'n unieke wildsplaas te omskep. Een van die planne wat genoem is, was om die onontginde Oos-Europese en Russiese toerismemark vir Namibië te ontsluit.Republikein het in daardie stadium met 'n buurman van Sardarov 'n onderhoud gevoer, wat gesê het “Rashid het al digby N$1 miljard in die land bestee en die bedrag kan voorkant toe selfs verdubbel”.Die buurman, wat anoniem wou bly, het gesê Marula Game Ranch sal “in 'n heel ander liga as Erindi wees”.Verskeie oproepe gister aan Nujoma het onbeantwoord gebly. Hy het ook nie op 'n SMS en 'n WhatsApp waarin hy om kommentaar genader is, gereageer nie.Hy is gistermiddag tydens teetyd by die parlement ook hieroor genader, maar het gesê hy is besig en het met sy hand beduie Denver Kisting, Republikein se verslaggewer, moet loop.'n Oproep na mnr.(Claus) Düvel se selfoon is deur sy vrou, Heidi, beantwoord, wat gesê het hy sal terugskakel. Sy selfoon is egter kort daarna afgeskakel en hy kon nie bereik word nie.

Vier huurplase vir Rus

Kommentaar

Republikein 2024-11-22

Meld asseblief aan om kommentaar te lewer

Vier huurplase vir Rus

Kommentaar

Republikein 2024-11-22

Meld asseblief aan om kommentaar te lewer

MELD AAN

Advertensie