Vier mense het die naweek op paaie in die land gesterf

Die bestuurder wat glo Saterdag omstreeks 18:30 'n noodlottige ongeluk op die Daan Viljoen-pad sowat 42 km van Windhoek af veroorsaak het, het van die toneel af gevlug.

Me. Faikie Oguru (in haar 30's) is op die toneel oorlede nadat die bestuurder van die voertuig glo beheer daaroor verloor en dit omgeslaan het. Die oorledene se naasbestaandes is van haar dood ingelig en die polisieondersoek duur voort.

In 'n ander voorval het 'n bestuurder ook verdwyn van die toneel nadat 'n 43-jarige man Sondagoggend doodgery is. Die ongeluk het omstreeks 01:37 by Okamwandi op die Oshikuku-­hoofpad op pad na Osha­kati plaas­gevind. Die oorledene se familie is nog nie van sy dood ingelig nie en die ondersoek duur voort.

'n Vrou en man is Saterdag omstreeks 15:35 op die C15-pad tussen Stampriet en Gochas sowat 20 km van Stampriet in 'n ongeluk dood. Me. Sonett Beukes (25) het glo beheer oor die voertuig verloor en dit het omgeslaan. Sy en die passasier, mnr. Bride Tjitaura (35), is op slag dood. Hul naasbestaandes is van hul dood ingelig.