Visvangpermitte verwar steeds vele

Jessica Botes - Die tweede ronde openbare konsultasies rakende die voorgestelde heffings op visvangpermitte het Vrydag op Swakopmund plaasgevind.

Hoewel net 'n handjievol vistermanne en belanghebbendes van Swakopmund en Walvisbaai aan die konsultasies deelgeneem het, was daar duidelik steeds baie onsekerheid oor die heffings.

Dié wat tydens die konsultasies hul mening oor die kwessie wou lig, is deur verteenwoordigers van die ministerie van visserye en mariene hulpbronne versoek om skriftelike voorleggings te maak. Daar is vooraf geen aankondiging gemaak dat dit 'n vereiste is nie, en later is ingestem dat lede van die publiek ná die vergadering hul skriftelike voorleggings kon indien.

Lede van die media is ook gedurende die vergadering deur die adjunk- permanente sekretaris van visserye en mariene hulpbronne, mnr. Ueritjiua Kauaria, versoek om geen inligting oor die voorleggings te publiseer nie.

Die vergadering is geopen met 'n toespraak van die minister van visserye en mariene hulpbronne, mnr. Bernard Esau, wat deur Kauaria voorgelees is.

Hierin sê Esau hy het besluit om die heffings wat op 26 Junie vanjaar in die Staatskoerant gepubliseer is, terug te trek omdat hy deur verskeie belanghebbendes versoek is om die heffing verder te bespreek.

"Ek het ook in ag geneem dat verskeie aspekte en definisies oor ontspanning- en sportvisvang nie in hierdie kennisgewing verduidelik is nie. Gevolglik het ek die ministerie van justisie versoek om die implementering van die visvangheffings op te skort. Ek het ook werknemers van die ministerie van visserye opdrag gegee om nie die heffings te implimenteer nie en om met openbare konsultasies rakende die heffings al langs die Namibiese kus te begin.

"Ek het die implementering van hierdie heffings opgeskort om hierdie konsultasies uit te voer omdat ek die insette waardeer van belanghebbendes oor alle sake waaraan hulle moet voldoen. Ons almal werk daaraan om dieselfde doelwit te bereik en dit is om ons visserye te ontwikkel tot die voordeel van huidige en toekomstige geslagte."

Esau het met die oog op die onsekerheid wat steeds onder vistermanne heers, sommige aspekte rakende die heffing verduidelik.

"Die Wet op Mariene Hulpbronne van 2000 maak voorsiening vir heffings op spesifieke items soos ontspanningsvisvang as 'n kosteherwinningsmaatreël om dienslewering te fasiliteer. Heffings moet nie verwar word met die betaling van belasting of enige ander heffings soos kwotageld wat hulpbronhuurbetalings is wat deur die regering gebruik word om visseryevoordele na ander sektore van die ekonomie oor te dra nie.

"Ontspanningsvisvang-heffings word dus toegelaat in die wet ten einde te verseker dat kostes herwin word vir die uitreiking van permitte, verifiëring van permitte op die strande, die insameling van data en padblokkades om daaglike vangste te kontroleer."

Volgens Esau is die heffings in goeder trou geïmplementeer nadat 'n omvattende en konsultatiewe studie in 2009 op die instruksies van die kabinet deur die ministerie uitgevoer is. Hierdie studie het alle geld en heffings in die mariene visvang-sektor gedek.

"Nietemin wil ek julle verseker dat ek vandag hierdie konsultasie met 'n oop gemoed byeengeroep het. Ek is reg om te luister na wat almal van julle te sê het oor die kwessie van ontspanningsvisvang-heffings voordat ek my volgende besluit hieroor neem. Ek doen 'n beroep op julle om voorstelle te maak oor hoe ons ontspanningsvisvang kan fasiliteer terwyl die koste verbonde aan die beheer van ontspanningsvisvang behou word."

Soortgelyke openbare konsultasies sal binne die volgende vier weke ook op Lüderitz en in Windhoek plaasvind.