Vlakvarke op Dorslandtrek see toe

Des Erasmus - Die Dorslandtrek herleef, maar dié keer is dit die diereryk wat die Namib uit die binneland oorsteek om daar aan die droogte te ontkom.
Verlede week was dit ’n af­gedwaalde donkievul uit die binne­land wat op die suidstrande van Hentiesbaai uitgeslaan het. Saterdag was dit weer twee vlakvarke wat tussen Jakkalsputz en Die Walle suid van Hentiesbaai gewei het waar die laaste brandertjies speel.
Die betrokke gebied is ’n gewilde hengelstrook van Gert en Johanna van der Merwe van Hentiesbaai. Op die gebied van vis was die oes Saterdagoggend vir die Van der Merwes maar ’n skrale een galjoen. Die dag is wel gemaak deur twee vlakvarke wat daar teen die water­kant witmossels gevreet het. Sommer hondmak, sê Gert. “Ek meen ons was in een stadium sowat vyf meter van hulle. Die varke se kondisie is ook taamlik goed.”
Witmossels kom normaalweg suid van Walvisbaai, oorkant die bank van Langstrand en op enkele plekke verder noord langs die kus voor. Gert sê hy kon sy eie oë nie glo nie. “Die twee het eers met hul neuse op die nat sand rondgesnuffel en blykbaar dan besluit waar om te grawe. Elke keer het hulle raakgeboor en die mossels gevreet dat die doppe waai.”
Net om die egtheid van hul storie te bevestig, het Gert en Johanna ’n entjie langs die see opgery om ander hengelaars te vertel, sodat hulle ook kon kom kyk. Toe hulle terugkom, was die varke weg met net die diep gate as getuienis van waar hulle hul brekfis geniet het.
Daar word maar vermoed die twee varke het al met die bedding van die Omaruru-rivier afgedwaal see toe. Toe het hulle waarskynlik verder suidwaarts afgedwaal met die bossieveld van Solitude, net suid van Hentiesbaai, wat hulle ’n beskutte tuiste in die vreemde kan bied.
Intussen gaan dit al hoe beter met Feline, die verwaarloosde donkievul wat verlede week deur konstruksiewerkers aan die nuwe pad Hentiesbaai toe langs die see opgemerk is. Hentiesbaai is nie donkiewêreld nie. Eers was daar ’n soektog na Feline en ’n dag of wat later was die vangspan op haar spoor oos van die robverwerkingsaanleg op Hentiesbaai. In haar gehawende en uitgeteerde toestand is sy gevang en gehalter na die Erum-stalle op Hentiesbaai gebring waar sy aanvanklik ’n stal­maat van ’n paar dwergperde was.
Penny Jones van die Lukzetperdesentrum het gister aan Republikein gesê Feline, die naam wat die nuwe versorgers aan haar gegee het, sterk mooi aan. Sy raak gewoond aan die mense van die perdesentrum, vreet hompe hooi en drink baie water. Geleidelik word van die kragvoer van die perde van die sentrum deel van die voerprogram waarop sy aansterk.