VN-hoof soek nog US$900 miljoen vir Somalië

Meer as ses miljoen mense in Somalië benodig humanitêre bystand en meer as 275 000 wangevoede kinders staar ‘n hongerdood in die gesig, het die sekretaris-generaal van die VN, Antonio Guterres, gister (Donderdag) gesê.

Somalië is sedert 1991 in gewelddadige chaos gedompel en ly onder die gevolge van ’n ernstige droogte wat dele van die land op die rand van hongersnood gelaat het.

"Die droogte is die grootste prioriteit,” het Guterres in sy openingsrede by ’n internasionale konferensie oor Somalië in Londen gesê.

"Vanoggend het ons ’n hersiene humanitêre reaksieplan voorgelê waarin ’n bykomende US$900 miljoen tot die einde van die jaar gevra word,”het hy gesê.

Afrika-unie troepe, wat Somalië se eie swak en disfunksionele weermag ondersteun, het daarin geslaag om dorpe en stede wat onder beheer van die Al-Kaïda verwante Islamitiese groep, Al-Sjabaab was, te herower sedert die insurgente die hoofstad, Mogadishu, in 2010 verlaat het. Die militante gaan egter voort om dodelike aanvalle uit te voer.

Die konferensie in Londen word gesamentlik deur die Britse regering, die VN en Somaliese VN-ondersteunde regering onder leiding van pres. Mohamed Abdullahi Mohamed, aangebied. Hy het in Februarie ná ’n Westers-gesteunde verkiesingsproses aan bewind gekom.

Benewens die soeke na bystand van die internasionale gemeenskap vir die humanitêre krisis, het die konferensie ook ten doel om ‘n veiligheidsooreenkoms te beding om die verskillende militêre magte in die land in een funksionele Somaliese weermag saam te snoer. - Nampa/Reuters