Volksmoord gaan nie oor geld nie, maar vergifnis

Maria Eiseb “Dit is hartseer om te sien hoe die bene van ons voorvaders as besienswaardighede op Swakopmund en Lüderitz aanskou word. Die mense wat met vakansies na die kusdorpe gaan, moet bewus wees dat hulle op dié bene gaan vakansie hou, want dit is plekke waar gruweldade gepleeg is.” Só het die leiers van die Nama tradisionele owerheid tydens die onlangse samesprekinge oor volksmoorde gesê. Volgens hulle is dit tyd dat Nama- en Herero-mense moet opstaan en vir die Duitse regering vra hoe lank hulle nog vir ’n verskoning moet soebat. “Die Duitse regering weier skaamteloos om verantwoordelikheid te neem en hulle wil dit met ander dinge toesmeer,” het Ida Hoffmann, ’n parlementslid en voorsitter van die tegniese komitee oor die Nama-volksmoord gesê.“Ons kan as mense beskou word wat swak is, maar eendag sal alles in ons guns wees,” het sy bygevoeg. Die Nama’s sal nie rus voor die Duitse regering vergifnis vra nie. Volgens die leiers is die menswaardigheid van die mense ontneem en tot vandag word die Suide van Namibië deur armoede en hongersnood gekenmerk.Hoffmann het gesê die groot stryd wat hulle deurgemaak het, is nooit erken nie. Die opvatting bestaan dat die mense van die Noorde alleen vir die vryheid van die land geveg het, het sy gesê.Tydens die samesprekinge het die opperhoof van die !Aman tradisionele owerheid, hoofman David Fredericks, gesê hy kan nie sien hoekom die leiers nie saam sal staan nie. Volgens Fredericks is die Nama’s verwilder en van ontwikkeling uitgesluit. Hy wou ook weet waarom die regering nie die oorskot van die voorvaders wat op Shark Island is, kan begrawe nie. Volgens hoofman Seth Kooitjie van die Topnaars is die plig van elke tradisionele leier om sy mense te mobiliseer om deel te wees van die stryd.Hoffmann het gesê alles gaan nie oor geld nie, maar is die Duitse regering ’n verskoning aan die Nama- en Herero-volk verskuldig. Sonder vergifnis sal die wonde nie heel nie, het sy gesê.

Volksmoord gaan nie oor geld nie, maar vergifnis

Kommentaar

Republikein 2025-04-30

Meld asseblief aan om kommentaar te lewer

Volksmoord gaan nie oor geld nie, maar vergifnis

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie