Von Bach kry 10% water by

Twee van die drie damme wat sentraal-Namibië van water voorsien, het water bygekry nadat goeie reënbuie kort voor Nuwejaar in hul opvangsgebiede voorgekom het. Die Von Bachdam se vlakke het sedertdien met bykans 10% gelig.Dié dam het sedert 31 Desember altesaam 4,709 miljoen kubieke meter (Mm³) water ingekry en van 41,5% tot 51,4% gelig. Teen 11:00 op Nuwejaarsdag het water die Von Bachdam teen 50,3 kubieke meter per sekonde (m³/s) binnegestroom. Volgens NamWater se jongste damverslag het dié dam teen 15:00 op Woensdag steeds ‘n inloop van 3,9 m³/s gehad. Die Omatakodam, wat op Oujaarsdag bykans leeg was met net sowat 0,5% water oor, staan sedert 2 Januarie nou op 1,3%. ‘WEERPROFEET’ VOORSPEL REËNIntussen het die befaamde weerkenner prof. Peet Pienaar aan Republikein gesê hy verwag dat Januarie en Februarie goeie reëns vir Namibië kan bring – selfs effe beter as verlede jaar.Sy voorspelling verskil radikaal van ander weerkenners, wat teen droogtes vir die huidige reënseisoen gewaarsku het. “Ek vermoed vanjaar gaan nié so droog vir Namibië wees nie. As ek na my kaarte kyk, lyk dit of dit bietjie beter as verlede jaar gaan reën – alhoewel nie 100% beter nie,” het Pienaar gesê.“Die winde in die Kaap het baie sterk gewaai; ek glo dit sal bydra tot julle reën,” het hy aan Republikein verduidelik.Hy sê hy laat hom nooit uit oor El Niño-voorspellings nie en kan ook nie verduidelik waarom Namibië se reënseisoen so laat is en of dit meer gereeld gaan gebeur dat die reën eers later tydens die reënseisoene sy verskyning maak nie.“Namibië is baie afhanklik van die tropiese lug wat vanaf die Noorde uit Angola se rigting kom. Dit is die eintlike belangrike faktor – julle goeie reëns kom uit die trope uit,” het Pienaar verduidelik. “Namibië se ‘normale reën’ kom uit die Ooste. Julle sal nie maklik reën van die see of die Suide kry nie.”Hy het ook verduidelik dat ‘n afsnylaag goeie reën vir die land kan bring. “In Namibië se geval kan dit tipies gebeur wanneer ‘n laag koue lug onder ‘n tropiese luglaag vanuit die Noorde inbeweeg. “Daar waar dit bymekaar kom en die koue lugstroomonderin beweeg, kom daar dikwels goeie reën voor. “As die minimum en maksimum temperatuur met 10 °C verskil, is daar reën in die lug. As dit met 15 °C of 20 °C verskil, is dit droog,” het hy gesê. DROOGTE OP PAD? ‘n Klimatoloog by Santam Suid-Afrika het egter gemaan dat landbouers die 2018-’19-reënseisoen as ‘n “potensiële rampjaar” moet hanteer en eerder positief verras moet word indien goeie reëns wel voorkom, as om te hoë verwagtinge te koester.“Uit ‘n landbou-oogpunt hou die res van hierdie somerseisoen ’n hoë risiko vir droogte in. Daar is baie onsekerheid wat betref reënvoorspellings vir die res van die somer,” het mnr. Johan van den Berg aan Republikein gesê. Hy het gesê die 2018-’19-somerseisoen sal waarskynlik onthou word as een van die moeilikstes in jare om voorspellings te maak. “Min of geen voorspellings het voorsien dat die eerste deel van dié somer só droog sou wees nie. “Een van die redes vir die swak voorspelbaarheid is die stand van die see-oppervlaktemperature in die Stille Oseaan, asook toestande in die Indiese Oseaan,” het Van den Berg verduidelik.

Von Bach kry 10% water by

Kommentaar

Republikein 2025-04-09

Meld asseblief aan om kommentaar te lewer

Von Bach kry 10% water by

Kommentaar

Republikein 2025-04-09

Meld asseblief aan om kommentaar te lewer

MELD AAN

Advertensie