Vyf minderjariges sterf die naweek

Twee jong seuns het die naweek in die Oupalemeer in die Oupale- informele nedersetting verdrink nadat hulle in 'n meer gaan swem het. Volgens die polisie se misdaadverslag het die gemeenskap die twaalfjarige Julius Tuhupifa Mateus en sesjarige Paulus Vatekuleni Paulus se liggame Saterdag gevind.

• 'n Driejarige seun het Vrydag saam met sy ouma in hul huis op Okombahe doodgebrand. Die sinkplaathuis het volgens die verslag aan die brand geslaan. Hoewel die bure die kleuter en sy 88-jarige ouma probeer red het, was die vlamme te sterk en hul pogings was onsuksesvol.

• Annastacia Nandjila Kambuta (11) het na bewering haarself Vrydagaand in 'n vrieskas toegemaak en versmoor. Die voorval het in die Omakuku- informele nedersetting gebeur.

• 'n Veertienjarige meisie het Vrydagmiddag haarself by haar tannie se huis in die Luhonono-omgewing gehang ná 'n voorval by haar skool waar sy na bewering 'n onderwyser se selfoon gesteel het. Volgens die verslag is sy gevra om die selfoon terug te bring. Sy het dit na bewering gedoen, maar die selfoon se simkaart was nie by nie. Sy het gesê sy het die simkaart gebreek. Sy is glo huis toe en het nie weer na die skool teruggekeer nie.

• 'n Negentienjarige vrou het Vrydag in die bosse agter die Sun Square Mall op Ondangwa gekraam en haar pasgebore baba agtergelaat. Volgens die verslag is die baba gered en herstel tans by die Onandjokwe Intermediêre Hospitaal. Die ma is opgespoor en ontvang behandeling by dieselfde hospitaal.

– [email protected]