Vyf vermeende beesslagters vasgetrek
Vyf mans is in hegtenis geneem nadat hulle 'n bul en twee koeie op 'n plaas in die Kalkfeld-omgewing geslag het.
Kristien Kruger
Vyf mans het verlede Dinsdag skelm hul intrek op die plaas Erundu van mnr. André Pretorius geneem. Die plaas is tussen Otjiwarongo en Kalkfeld geleë.
Die mans was met pangas gewapen. Hulle het 'n Simmentaler-bul en twee koeie geslag. Pretorius en sy kleinseun mnr. André Rademeyer, wat saam met hom boer, het die bul enkele weke gelede by die bekende Grootfontein-teler mnr. Kaspar Günzel gekoop.
Selfoonrekords toon hulle het aan die taxidrywer wat hulle afgelaai het en weer Donderdagnag gaan oplaai het, gesê hulle sal dié nag 'n paar ritte moet onderneem om die vleis na Otjiwarongo te vervoer, aangesien hulle “baie beeste” gaan slag.
Mnr. Josef Fabiam, die plaasvoorman, het Donderdagoggend een van die drie slagplekke in die veld ontdek. Dit was nadat hulle verdagte spore opgemerk en ondersoek ingestel het. Fabiam sê hy het besef die onwettige bosslagters skuil steeds op die plaas.
Rademeyer sê hy het vermoed hulle sou die vleis Donderdagnag Otjiwarongo toe vervoer sodat dit voor die Nuwejaarsnaweek aan die plaaslike kapanamark gelewer kon word. Hy het in samewerking met mnr. Danie van der Westhuizen, eienaar van die teenstroping- en sekuriteitsgroep Kyani, en die polisie op Otjiwarongo 'n hinderlaag gestel en die vyf vermeende beesslagters en hul taxibestuurder omstreeks tweeuur Vrydagoggend 'n ent buite Otjiwarongo op die C33 in hegtenis geneem.
HOFVERSKYNING UITGESTEL
Die ses mans moes gister in die landdroshof op Otjiwarongo verskyn, maar die landdros het nie opgedaag nie en die saak is tot 16 Februarie uitgestel.
Die mans is glo in kennis gestel dat hulle 'n formele aansoek om borgtog by die landdroshof kan indien en bly daarom in aanhouding tot hul volgende verskyning.
Die vermeende beesslagters en die taxidrywer is Sindamo Efraim Petrus (34), Hadula Nghipundjwa (39), Petrus Shilimwafi (36), Penehafo Nghuukwefe (46), Naftali Paulus (26) en Petrus Haufiku (31).
Die kwotasie vir die koop van die bul, wat sowat N$48 000 beloop het, is intussen by die polisie ingedien.
AANLYN PETISIE TEEN VRYLATING OP BORG
Sowat 200 boere het op 13 Desember 'n vreedsame protesoptog by die Otjiwarongo-landdroshof gehou om borgtog van vier vermeende veediewe teen te staan. Die boere het 'n petisie aan dié hof se beheeraanklaer, mnr. Obert Masendeke, oorhandig.
In die petisie sê die boere hulle ly daagliks reuseverliese weens veediefstal en wildstropery. Net in die Kalkfeld-omgewing het boere sedert Januarie verlede jaar N$1,3 miljoen se beeste verloor.
'n Soortgelyke aanlyn petisie is die naweek onder mense in die landbougemeenskap versprei waarin opnuut versoek is dat die ses mans nie borgtog kry nie. Die petisie het gister op sowat 600 handtekeninge gestaan.
Volgens lt.genl. Sebastian Ndeitunga, inspekteur-generaal van die Namibiese polisie, is altesaam 3 160 veediefstalsake in die 2020-'21-boekjaar landswyd aanhangig gemaak. Dis nog nie bekend hoeveel sake gedurende 2021 ingedien is nie.
– [email protected]
Vyf mans het verlede Dinsdag skelm hul intrek op die plaas Erundu van mnr. André Pretorius geneem. Die plaas is tussen Otjiwarongo en Kalkfeld geleë.
Die mans was met pangas gewapen. Hulle het 'n Simmentaler-bul en twee koeie geslag. Pretorius en sy kleinseun mnr. André Rademeyer, wat saam met hom boer, het die bul enkele weke gelede by die bekende Grootfontein-teler mnr. Kaspar Günzel gekoop.
Selfoonrekords toon hulle het aan die taxidrywer wat hulle afgelaai het en weer Donderdagnag gaan oplaai het, gesê hulle sal dié nag 'n paar ritte moet onderneem om die vleis na Otjiwarongo te vervoer, aangesien hulle “baie beeste” gaan slag.
Mnr. Josef Fabiam, die plaasvoorman, het Donderdagoggend een van die drie slagplekke in die veld ontdek. Dit was nadat hulle verdagte spore opgemerk en ondersoek ingestel het. Fabiam sê hy het besef die onwettige bosslagters skuil steeds op die plaas.
Rademeyer sê hy het vermoed hulle sou die vleis Donderdagnag Otjiwarongo toe vervoer sodat dit voor die Nuwejaarsnaweek aan die plaaslike kapanamark gelewer kon word. Hy het in samewerking met mnr. Danie van der Westhuizen, eienaar van die teenstroping- en sekuriteitsgroep Kyani, en die polisie op Otjiwarongo 'n hinderlaag gestel en die vyf vermeende beesslagters en hul taxibestuurder omstreeks tweeuur Vrydagoggend 'n ent buite Otjiwarongo op die C33 in hegtenis geneem.
HOFVERSKYNING UITGESTEL
Die ses mans moes gister in die landdroshof op Otjiwarongo verskyn, maar die landdros het nie opgedaag nie en die saak is tot 16 Februarie uitgestel.
Die mans is glo in kennis gestel dat hulle 'n formele aansoek om borgtog by die landdroshof kan indien en bly daarom in aanhouding tot hul volgende verskyning.
Die vermeende beesslagters en die taxidrywer is Sindamo Efraim Petrus (34), Hadula Nghipundjwa (39), Petrus Shilimwafi (36), Penehafo Nghuukwefe (46), Naftali Paulus (26) en Petrus Haufiku (31).
Die kwotasie vir die koop van die bul, wat sowat N$48 000 beloop het, is intussen by die polisie ingedien.
AANLYN PETISIE TEEN VRYLATING OP BORG
Sowat 200 boere het op 13 Desember 'n vreedsame protesoptog by die Otjiwarongo-landdroshof gehou om borgtog van vier vermeende veediewe teen te staan. Die boere het 'n petisie aan dié hof se beheeraanklaer, mnr. Obert Masendeke, oorhandig.
In die petisie sê die boere hulle ly daagliks reuseverliese weens veediefstal en wildstropery. Net in die Kalkfeld-omgewing het boere sedert Januarie verlede jaar N$1,3 miljoen se beeste verloor.
'n Soortgelyke aanlyn petisie is die naweek onder mense in die landbougemeenskap versprei waarin opnuut versoek is dat die ses mans nie borgtog kry nie. Die petisie het gister op sowat 600 handtekeninge gestaan.
Volgens lt.genl. Sebastian Ndeitunga, inspekteur-generaal van die Namibiese polisie, is altesaam 3 160 veediefstalsake in die 2020-'21-boekjaar landswyd aanhangig gemaak. Dis nog nie bekend hoeveel sake gedurende 2021 ingedien is nie.
– [email protected]
Kommentaar
Republikein
Geen kommentaar is op hierdie artikel gelaat nie