Wanderers, Suburbs reis vir eerste aksie in RSA

Andrew Poolman - Met die plaaslike rugby nog sterk besig in sy voorseisoenprogram, reis twee premierliga-klubs uit Windhoek die naweek om vriendskaplike wedstryde in Suid-Afrika te gaan speel.Die Namibiese kampioenklub van 2018, FNB Wanderers, se groep vertrek vanaand ná werk na Vredendal, sowat 250 km noord van Kaapstad. Saterdag speel die Wit Hingste daar met twee spanne, vyftienmanrugby oor 80 minute.Wanderers se tweede span speel om 16:30 teen die tweedebeste kombinasie van die Platteland Barbarians, voordat die eerste spanne om 18:00 slaags raak.Die Platteland Barbarians word saamgestel uit verskeie spanne in die omgewing en sluit spelers van Rawsonville, Ceres, Nuwerus, Clanwilliam, Vredendal, Citrusdal, Lutsville en Klawer in.Sedert die nuwe seisoen op die oefenveld hervat het, het Wanderers verskeie nuwe spelers bygekry. Twee van Trustco United se staatmaker-sneltreine, Tuna Amutenya en Nandivatu Karuuombe, het beide die blou trui vir die wit ingeruil. Nog 'n veelsydige blits, Riaan van Zyl, keer van United af terug na Pionierspark, hoewel sy jongboet Hanreco by die Filistyne aanbly.Wanderers se ander aanwinste sluit gewese nasionale onder 20-spelers soos Elmarco Beukes (senter/vleuel, van WHS), Jacques Theron (skrumskakel, WHS), Donaville Lebereki (vleuel, van Reho Falcon) en Riaan de Klerk (agtsteman, van Walvisbaai) in. Nog 'n potensieel interessante aansluiting is Elgeno Gamatham, 'n gewese Walvisbaaier wat as student die Tuks-trui op vleuel en heelagter gedra het.Die haker Petri Burger, terug ná twee jaar van klubrugby in Australië, en stut Ignus Tripodi is beide manne wat tevore Namibië o.20 asook die Welwitschias op senior provinsiale vlak verteenwoordig het. Die vaskopstut Adriaan Esterhuizen (Windhoek Affies) is ook 'n belowende vooruitsig wat laas jaar o.18 Akademieweek gespeel het.Wanderers se enigste beduidende verlies is Enem Kritzinger, wat met tye as skrumskakel of senter en soms waarnemende kaptein 'n bestendige staatmaker was. Sedert die geboorte van sy eersteling is dit nie seker of hy weer na die rugbyveld sal terugkeer nie.Die klub se nuwe voorsitter, Willem van Zyl, sê: “Ons manne het die laaste twee weke al saam geoefen onder die afrigters Vince Dreyer en Henry Kemp. “Ons moes maar werk met die manne wat kon toer. Verskeie spelers het werkverpligtinge, waarvoor ons heeltemal begrip het. Dus sal dit nie vol sterkte spanne wees nie. “Die naweek is een vir spanbou en om die kultuur in die groep te versterk. Ons gee ook verskeie nuwe manne kans om hulself te bewys.”Van Zyl sê Wanderers skryf vanjaar ook 'n derde span in die NRU-ligas in. “Dit is 'n groot skuif vir ons klub. Hierdeur kan ons vir meer spelers wedstrydtyd aanbied en so lok ons ook meer spelers.”Wanderers se spelersgroep vir die toer is:Voorspelers: Nian Berg, Frans van Wyk, Quintin Esterhuizen, Christo McNish, Gordon Biwa, Stefan Hattingh, JC du Plessis, Petri Burger, Zander de Klerk, Stef Botha, Kevin Vorster, Brendan Nortjé, Johan Meyer, Dirk de Meyer, Brian Roodt, Riaan de Klerk, Dawn Marondedze, DG Wiese, Kevin Thynsma, Sam Kuvare, Marnus van Wyk.Agterspelers: Elmarco Beukes, Edwardo Nell, Gurtley Beukes, MP Pretorius, Jurie Lootz, Francois Coetzee, Léan Stoop, Jamie Joseph, Francois Chikukwa, Allister Jacobs, Rudie Pretorius, Nandi Karuuombe, Donaville Lebereki, Ryan Coetzee, O'Neal de Wee, Luchiano Hilzebecher, Snyman van der Walt, Hardus Louwrens, Elgeno Gamatham.Die groep word deur Vince Dreyer en Henry Kemp as afrigters vergesel, asook die bestuurslede Willem van Zyl, Dirk Human, Henry Burnett en Billy Marais.• FNB Western Suburbs het gister in die pad geval na die Noord-Kaap vir hul deelname aan die Kakamas sewestoernooi, wat Vrydag begin en tot Sondag duur.Shaun Kaizemi bly die hoofafrigter van die Khomasdal-klub vir die komende seisoen, terwyl Llewellyn Winkler sover 'n groot betrokkenheid by die fiksheidswerk in die voorseisoen gehad het. Suburbs se toergroep na Kakamas kon gister teen druktyd nie verkry word nie.

Wanderers, Suburbs reis vir eerste aksie in RSA

Kommentaar

Republikein 2024-11-22

Meld asseblief aan om kommentaar te lewer

Wanderers, Suburbs reis vir eerste aksie in RSA

Kommentaar

Republikein 2024-11-22

Meld asseblief aan om kommentaar te lewer

MELD AAN

Advertensie