Wayde hardloop Dinsdag in Potch

Wim Pretorius – Wayde van Niekerk se atletiekseisoen is nog nie verby nie.Die Olimpiese kampioen en wêreldrekordhouer in die 400 meter het Maandag aangekondig dat hy onder die deelnemers sal tel by die eerste atletiekbyeenkoms wat sedert die uitbreking van die Covid-19-pandemie in Suid-Afrika gehou sal word.Die Vrystater het ingeskryf vir ’n vriendskaplike Noordwes-byeenkoms, wat Dinsdag by die Kenneth McArthur-stadion in Potchefstroom gehou sal word.Hy sal om 17:30 in die blokke sak in die 400 m en hoop om nog verdere roes af te skud voordat sy aandag volkome na sy oefenprogram verskuif met die oog op volgende jaar se Olimpiese Spele in Tokio, waar hy sy titel sal wil probeer verdedig.“Waar ek nie ten volle tevrede was met my terugkeer vanjaar nie nadat Covid-19 by my gediagnoseer is en ek nie aan die wedlope kon deelneem waaraan ek graag wou nie, is ek dank aan Atletiek Noordwes verskuldig vir die byeenkoms wat hulle aanbied sodat atlete weer mededingend kan deelneem,” het Van Niekerk op Instagram gesê.“Ek sien uit daarna om môreaand in die 400 deel te neem en is opgewonde om te sien hoe my liggaam in ’n wedloop-situasie voel.“Dit sal my wys waar ek is met my oefening en wat gedoen moet word om in die aanloop tot 2021 fisiek en geestelik positiewe momentum te bou,” het hy bygevoeg.Van Niekerk het in September die 400 gewen tydens sy enigste byeenkoms in Europa, toe hy in Switserland die eindstreep in 45.58 sekondes oorgesteek het.Dít het gevolg nadat hy op die vooraand van wat sy eerste oorsese wedloop in drie jaar sou wees, in Trieste in Italië, positief getoets is vir Covid-19.Ofskoon Van Niekerk se toetsuitslag uiteindelik na ’n vals-positief gelyk het nadat hy kort na dié toets weer getoets is en dit ’n negatiewe uitslag gelewer het, is hy steeds toe in kwarantyn geplaas waartydens hy vir ’n maand glad nie kon oefen nie.Teen die tyd wat hy weer kon deelneem, kon hy net een wedloop inwerk voordat hy en sy breier, Ans Botha, na Suid-Afrika moes terugkeer.Die wedloop in Switserland was sy eerste oorsese wedloop sedert 2017 toe hy ’n besering opgedoen het tydens ’n raakrugbywedstryd, wat as ’n vertoonwedstryd voor die toets tussen die Springbokke en die All Blacks op Nuweland gedien het. – Netwerk24

Wayde hardloop Dinsdag in Potch

Kommentaar

Republikein 2025-04-30

Meld asseblief aan om kommentaar te lewer

Wayde hardloop Dinsdag in Potch

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie