‘Wie de hel dink regbank is hulle?’

Denver Kisting – “Waar kry hulle dié goddelike heilige gees-maniertjies vandaan?”

Só wou die leier van die Landless People’s Movement (LPM), mnr. Bernadus Swartbooi, gister weet ná die regbank teen kritiek op hulle te velde getrek het.

Die regbank voer dikwels aan hulle is nie verhewe bo kritiek nie, tog voel hulle gegrief sodra hulle gekritiseer word, sê Swartbooi.

“Geen kritiek op hulle is geregverdig nie. Wie de hel dink hulle is hulle?”

’n Ander LPM-leier, mnr. Ivan Skrywer, meen die hooggeregshof het in sy onlangse beslissing in ’n aansoek wat die eertydse onafhanklike presidensiële kandidaat, dr. Panduleni Itula, gebring het “klaaglik misluk om die Grondwet te beskerm en te verdedig”.

Dit sluit die demokratiese waardes in wat in dié dokument vervat is, sê Skrywer.

Hy het die beslissing vergelyk met uitsprake wat eie aan die apartheidsregime was.

“Hulle het nie daarin geslaag om ’n veranderende grondwetlike interpretasie in te lei nie, en het nie die gees van die Grondwet behou nie.”

Skrywer meen die regbank se reaksie op kritiek teen dié uitspraak is tekenend van hul verwaandheid “en hulle projekteer hulself as verhewe bo die reg en ’n stelsel op sy eie – buite die ruimte van die soewereine, wat die mense van Namibië is”.

’n Volbank, onder leiding van hoofregter Peter Shivute, het in die uitspraak bevind elektroniese stemtoestelle (EVM’s) mag net weer in ’n nasionale verkiesing gebruik word as dit van ’n naspeurbare papierspoor vergesel word.

Volgens Skrywer het die regbank se reaksie, wat Maandagmiddag by monde van sy woordvoerder, mnr. Ockert Jansen, uitgereik is, ten doel om kritici te boelie.

“Die onafhanklikheid van die regbank moenie net gesien word nie, maar moet ook gesien word dat dit gedoen word.”

Skrywer, nes Swartbooi, erken daar is uitsonderings.

Swartbooi het gister gesê hulle is vasbeslote om die parlement te gebruik om die regbank te kritiseer, maar sal die regbank loof indien dit geregverdig is.

Mnr. Toivo Ndjebela, redakteur van Republikein se susterkoerant Namibian Sun, het gister gesê: “Dit is nie ’n skoonheidswedstryd nie. Hulle kan die laaste sê hê. Die beginsel bly egter dat die president, as hoof van die uitvoerende gesag, nie regters moet aanstel nie. Hy moenie naby daardie proses wees nie. Die wet moet gewysig word.”

Namibian Sun het verlede Donderdag in sy redaksionele kommentaar kapsie gemaak teen die feit dat die staatshoof kragtens die Grondwet regters op aanbeveling van die Regterlike Dienskommissie (JSC) aanstel.

Jansen het Maandag gesê ’n neiging om lede van die regbank in die sosiale en hoofstroommedia te teiken, het sedert verlede jaar se presidensiële en Nasionale Vergadering-verkiesings kop uitgesteek.

Hy sê dié aanvalle het in die algemeen ten doel om die regbank of van hul lede uit te maak as óf bevooroordeeld óf nie in staat om onafhanklike, onpartydige beslissings te lewer nie.

“Hierdie ontluikende gebruik het baie ernstige gevolge vir Namibië se demokrasie, regsreëls en die onafhanklikheid van die regbank.”

Jansen sê dit is nie die norm vir die regbank om hulself in openbare verklarings te verdedig nie, maar die beweerde aanvalle neem kwaai toe.

Hul stilswye kan as aanvaarding of regverdiging van die kritiek gesien word, sê hy.

Die woordvoerder het gevra enigiemand wat rede het om te glo ’n regter bevind hom of haar midde-in ’n botsing van belange, geskoei op enige regsgronde, moet vra dat daardie regter van ’n saak verskoon word.

“Aanvalle op die regbank is veral betreurenswaardig as dit uitgevoer word deur dié in openbare ampte of deur diegene verantwoordelik vir ewewig, regverdigheid en om die publiek in te lig en op te voed.”

– [email protected]